Ni Mojtaba Khamenei, ti anak ti pimmusay a supreme leader ti Iran a ni Ayatollah Ali Khamenei, ti napili a suno ti amana, segun iti waragawag ti estasion ti telebision iti Iran ita nga aldaw, Marso 9, bayat ti panagtultuloy ti gubat.
Ni Mojtaba Khamenei, a saan pay a nakita wenno nangngeg ti publiko sipud nangrugi ti gubat, ti nabayagen a napigsa a kandidatonga agtakem kas kangatuan a daulo, sakbay pay ti panangraut ti Israel a nakatayan ni Ali Khamenei, nupay saan pay a nagakem daytoy iti ania man pagsaadan iti gobierno.
Nadutokan ni Mojtaba Khamenei kalpasan a rimmuar dagiti pagilasinan nga adda panagsususik iti biang dagiti opisial ti Iran bayat ti panagurayda iti desision ti Assembly of Experts, ti grupo dagiti kleriko a mangpili iti supreme leader.
Ni Mojtaba Khamenei ti adda itan iti sentro ti theocracy ti Iran nga addaan iti maudi a pangngeddeng kadagiti amin a banag a pakaseknan ti Iran, ken agpaay a kas commander-in-chief ti militar ken ti nabileg a Revolutionary Guard.
Imatonanna met ti nabaknang a suplay ti uranium, a mausar a pangaramid iti nuklear nga armas, no kayatna.
Agtultuloy a pannakidangadang ti Iran, impakdaar ni Mojtaba Khamenei
Dinayaw ni Ali Larijani, maysa a nangato a security officer ti Iran, ti kinatured dagiti Assembly of Experts a nagtataripnong iti laksid ti agsasaruno a pannakaraut ti Tehran, ket kunana a kabaelan ni Mojtaba Khamenei a tenglen ti situasion ta sinursuruan daytoy ti amana.
Iti sabali a bangir, bayat ti agtultuloy a pannakasinga ti produksion ken panangibiahe iti lana iti rehion, nasuroken a $100 kada bariles ti presio ti lana. (The Associated Press/Manila Bulletin//Lito Hilidon/Bannawag)
