Binabalaw ni Senador Rodante Marcoleta idi Marso 9 ti sungbat ti daulo ti Senate Blue Ribbon Committee a ni Senate President Pro Tempore Panfilo "Ping" Lacson kadagiti alegasion ti grupo dagiti dati a militar mainaig iti panagimbestigar ti Senado iti mapapati a naanomalia a flood control project ti gobierno.
Iti panagbitla ni Marcoleta, kinuestionarna ti insungbat ni Lacson kalpasan nga imparang ti maysa nga abogado ti joint affidavit dagiti dati a militar a nagkuna nga isuda ti nangitulod iti kuarta dagiti politiko ken opisial a nairaman iti kontrobersia.
Segun iti senador, inyebkas dagiti dati a militar ti iti publiko a situtulokda a mangpaneknek no ania dagiti nakitada, agraman iti maipagarup a pannakaibiahe dagiti dadakkel ti gatadna a kuarta a naidulin iti maleta, kahon, ken dadduma pay a container.
Ngem binabalaw ni Marcoleta ti sungbat ni Lacson a nangkuestionar iti kredibilidad dagiti 18 a dati a militar imbes ketdi a maikkanda iti gundaway a mangiparang iti ammoda iti pormal a panangbista ti Senado.
Impaganetget ni Marcoleta a masapul a palubosan ti komite dagiti 18 nga ex-marines nga agparang iti pormal a panangbista ti Senado tapno matingiting a naimbag dagiti testimoniada. (Dhel Nazario/Manila Bulletin//Lito Hilidon/Bannawag)
