Mabalin a saan nga agpaut ti gubat maibusor iti Iran, ngem adda latta posibilidad a dumakkel ti gubat no madadael dagiti suplay ti lana iti lubong gapu iti Islamic Republic, a nangpili iti baro a nainget a kangatuan a lider, segun ken ni Presidente ti Estados Unidos (US) Donald Trump idi Marso 9.
Ngimmato iti kangatuan a presio ti lana sipud idi 2022, kalpasan a pinili ti Iran ni Ayatollah Mojtaba Khamenei a kas suno ti pimmusay nga amana a supreme leader ti Iran.
Iti biang dagiti investor, pagilasinan daytoy nga isagsaganaan ti Iran iti las-ud ti 10 nga aldaw, ti gubat a rinugian ti US ken Israel.
Ngem bimmaba met laeng ti presio ti lana idinto a ngimmato ti stock ti Estados Unidos gapu iti namnama a saanen nga agpaut ti gubat iti Iran.
Kalpasan ti sumagmamano nga oras, impaskil ni Trump iti social media ti mensahena a no adda ania man nga aramiden ti Iran a manglapped iti panaggaraw dagiti lana iti Strait of Hormuz, rauten ida ti Estados Unidos iti maminduapulo ti pigsana ngem daydi immuna.
Panagngato ti plete iti dyip, kdp. a PUV, inanamongan ti LTFRB
Ngem insungbat ti panakangiwat ti paramilitary Revolutionary Guard a ni Ali Mohammad Naini, ti Iran ti mangikeddeng no kaano nga agpatingga ti gubat. (The Associated Press/Manila Bulletin//Lito Hilidon/Bannawag)
