Kaso a cyber libel ken perjury ti impila ni National Security Adviser Eduardo M. Año a maibusor kadagiti 18 a dati a kameng ti Philippine Marines ken ti abogadoda a ni Levito Baligod mainaig iti maipagarup a panangitulodda iti binilion a pisos a kuarta a kickback manipud iti flood control project.
Malaksid ken ni Baligod, nairaman a respondent da Belnard A. Tube, Rosebert M. Waupan, Benny S. Bulotante, Johnny a. Buduan, Rodante P. Orbillo, Reyneboy O. Julian, Christopher T. Esquivel, George O. Villalon Jr., Romeo Rommel O. Bobares, Gil N. Natividad Jr., Anselmo Taberdo, Joely G. Cadiao, Rommel C. Galapon, Cecilio S. Larroder Jr., Bernard A. Gumban, Crisanie L. Dado, Fidel M. Corpuz, ken Walter M. Manalansan.
Itay napan a lawas, nangipila ni Año iti reklamo iti Department of Justice (DOJ) a pananglabsing iti Article 154 ti Revised Penal Code (RPC) mainaig iti unlawful utterances and unlawful means of publication in relation to Republic Act No. 10175, wenno ti Cybercrime Prevention Act of 2012, a maibusor iti 18 nga ex-marines, Baligod, ken ni dati a kongresman Mike Defensor.
Segun ken ni Año, inadmitir ni Baligod iti publiko a minanipularna ti linaon ti affidavit, ken inaklonna a maysa a panangliway wenno biddut iti biangna.
"Kuna ti abogadok a maibilang a perjury dayta a banag," kinuna ni Año.
Apidabit ti tunggal maysa iti 18 nga ex-marines, kiniddaw ti Ombudsman
Ni Año ti maysa kadagiti inakusaran dagiti 18 nga ex-marines a nakaawat iti paper bag
kalpasan ti pannakitaripnongna kada dati a House Speaker Martin Romualdez, ken Mamamayang Liberal Representative Leila De Lima.
Iti umuna nga impilana a reklamo, kinuna ni Año nga inramanna ni Defensor ta inaklonna a tinulonganna dagiti 18 a dati a kameng ti Marines. (Rey G. Panaligan/Manila Bulletin//Lito Hilidon/Bannawag)
