Kiniddaw ti Office of the Ombudsman ken ni abogado Levito Baligod a mangisubmiter iti apidabit ti tunggal maysa kadagiti 18 a dati a kameng ti Marines a nagkuna a nagitulodda iti binilion a pisos a kuarta kadagiti sumagmamano nga opisial ti gobierno kas kickback iti flood control project.
Naidatagen iti Office of the Ombudsman ti joint affidavit dagiti 18 nga ex-marines.
Segun ken ni Assistant Ombudsman Mico Clavano, dinutokanda ti National Bureau of Investigation (NBI) a mangberipikar iti kinasiasino ken kababalin dagiti 18 nga ex-marines, idinto nga adda agsusupadi a report mainaig iti kinasiasinoda ken no sadino ti dati a pagpapaayanda.
Innayon ni Clavano a sinuratanen ti Ombudsman ni Baligod a mangparnuay iti 18 nga apidabit a mangisalaysay iti kinapudno segun iti bukod a panirigan ti tunggal maysa kadakuada a dati a kameng ti marines tapno naan-anay ken nakappapati ti testimoniada. (Czarina Nicole Ong Ki/Manila Bulletin//Lito Hilidon/Bannawag)
