Ti amian (northeast monsoon) ti agtultuloy a mangyeg iti nasalemsem a paniempo iti nadumaduma a paset ti pagilian a kas iti Siudad ti Baguio a nakarikna iti kalam-ekan a temperatura a 9 degrees Celsius (°C) ita nga aldaw, Marso 14, segun iti Philippine Atmospheric, Geophysical and Astronomical Services Administration (PAGASA).
Dimmanon ti salemsem iti Metro Manila, a nakarikna iti 19.7°C (Quezon City) -- maysa kadagiti kalamiisan a temperatura iti National Capital Region ita panawen ti amian.
Segun iti datos ti PAGASA, nakarikna ti kalamiisan a tiempo ti dadduma pay a lugar iti Northern ken Central Luzon ita nga aldaw, kas iti Basco, Batanes (17.2°C) ken iti Casiguran, Aurora (18.4°C).
Nasalemsem met iti Aparri, Cagayan (19°C), Laoag City iti Ilocos Norte (19.6°C), Quezon City iti Metro Manila (19.7°C), ken Dagupan City iti Pangasinan (20°C).
Kinuna ni PAGASA weather specialist Loriedin de la Cruz-Galicia nga agpaut ti panagpigsa ti amian iti sumaruno a 24 nga oras. (Ellalyn De Vera-Ruiz/Manila Bulletin//Lito Hilidon/Bannawag)
