“Ti nadur-as a komunidad mangrugi iti nasayaat a panagbinnadang ti gobierno ken ti lokal ken dagiti adda iti sektor ti negosio.”
Dayta ti kinuna ni Mayor Atty. JJ Bueno III ti Santa, Ilocos Sur iti panamagsapatana kadagiti baro nga opisial ti Entrepreneurs Association of Santa Public Market (EASPM) nga idauluan ni Jhemalyn V. Bueno, a nabutosan a presidente.
Iti okasion, a mangipakita iti natibker a panagkibin ken panagtinnulong iti nagbaetan ti LGU Santa ken dagiti negosiante iti merkado publiko, impanamnama ni Mayor Bueno III ti agtultuloy a panangitandudo ti administrasionna iti pannakapadur-as dagiti negosio ken pannakaorganisar ti tiendaan ti Santa. Binigbigna pay ti dakkel nga akem dagiti agnegnegosio a kangrunaan a mangbibiag iti ekonomia ti lokalidad.
“Babaen ti panagtinnulong ti LGU ken ti Entrepreneurs Association of Santa Public Market, maisiguro a mapasayaat pay ti maipaay a serbisio kadagiti consumer ken maipanamnama ti panagdur-as ti tunggal agtagilako iti tiendaan ken uray pay iti aglawlaw,” panangilawlawag ti mayor.
Innayon ti mayor a mangnamnama nga agbalin a mas produktibo pay ti masakbayan babaen ti grupo ti EASPM iti panangipangrunada iti panagsayaat ken pakalag-anan ti kasasaad ti kaaduan iti Santa. (MARILYN C. CONTILLO)
