Rugian nga isayangkat ti Department of Education (DepEd) ti panagbalin laengen a three-term ti umay nga school year (SY) 2026–2027, kalpasan nga inaprobaran daytoy ni Presidente Marcos Jr.
Naipaulog daytoy a direktiba kas inrekomendar ti Economic and Development (ED) Council iti naangay a taripnong iti Malakanyang idi Marso 19.
Agbaliw manipud iti uppat a grading period, nagbalinen a tallo a grading period iti unos ti makatawen (school year), tapno mataming dagiti nabayagen a parikut a napekpek a tiempo iti panagadal a gapuanan ti pannakasuspenso dagiti klase gapu iti didigra ken maigiddan a dakkel nga okasion ti pagilian.
Maibasar iti three-term academic calendar, adda 54 nga aldaw a panangisuro ken 10 nga aldaw nga assessment period, agraman ti lima nga aldaw a pananglukat iti klase, iti first term. Mairaman iti second term ti 55 nga aldaw a panangisuro ken 10 nga aldaw nga assessment period; idinto a maaddaan ti third term iti 61 nga aldaw a panangisuro ken ab-ababa nga assessment period (innem nga aldaw).
Segun kadagiti opisial ti DepEd, ti naaprobaran a wagas ket manamnama a pagnumaran dagiti adalan gapu iti pannakaipaay iti ad-adu nga oras ken saan a masinga, nga aldaw ti panangisuro, mangkissay iti panangkissay iti pannakabingaybingay ti leksion, a mangitunda iti naurnos a panawen ti panagsanay ken panangpasayaat iti pakabuklan a panagtaray ti panangisuro.
TRO kontra iti proseso ti Kamara iti impeachment ni VP Duterte, kiniddaw dagiti abogado
Nupay saan pay a naipakat iti pilot testing, kuna ti DepEd a makiumanda kadagiti nadumaduma nga institusion ti edukasion sakbay nga isingasingda daytoy.
Impaganetget ti presidente a nasken nga agtalinaed a 180 nga aldaw ti serrek dagiti estudiante iti laksid dagiti posible a pannakasinga ti klase. (PNA//Lito Hilidon/Bannawag)
