Ad-adalen ti gobierno ti Filipinas ti mabalin a pannakaiparit ti nalatak nga online game a Roblox, idinto nga ipangpangrunada ti kinatalged dagiti ubbing, kalpasan a ginutigot ti Cybercrime Investigation and Coordinating Center (CICC) dagiti kompania ti telecomuunications (telco) nga agsaganada iti posibilidad ti pannakaiparit ti Roblox iti entero a pagilian.
Segun iti CICC ita nga aldaw, Marso 25, naikkan ti Roblox iti 15 nga aldaw tapno tamingenda dagiti parikut iti panangsalaknib kadagiti ubbing ta no saan, maipariten ti panagusar iti daytoy iti pagilian.
Innayon ti CICC a nagkumit dagiti telco iti panangsigurado ti epektibo a pannakaiparit ti Roblox, a maitunos iti pammilin ti gobierno.
Kinuna ti CICC saan a tinaming ti Roblox dagiti nakaro a peggad a mangapektar kadagiti ubbing, agraman ti pannakaisarangda kadagiti makadadael a digital content.
Kuna ni CICC Executive Director Undersecretary Renato Paraiso nga inikkanda ti Roblox iti 30 nga aldaw a maudi a pakdaar, a sumungbat mainaig kadagiti report nga adda dagiti pedophile ken drug trafficker a mangpunpuntiria kadagiti ubbing a mangus-usar iti platform.
Excise tax iti krudo, gasolina, saan a nasuspenso
Ngem gapu iti kainget ti kasasaad, pinagbalin ti CICC daytoy a 15 nga aldaw.
Dinagadag met ti CICC kadagiti nagannak ken mangbambantay kadagiti ubbing a kitaenda a nalaing ti kababalin ti ubbingda iti online. (Merlina Hernando-Malipot/Manila Bulletin//Lito Hilidon/Bannawag)
