Awan ti gandat ti Filipinas a mangbaliw iti diplomatiko a relasion ti pagilian iti Iran, iti laksid dagiti pasamak iti Muslim a pagilian, segun iti daulo ti Department of Foreign Affairs (DFA).
Kuna ni daulo ti DFA Ma. Theresa Lazaro a saanda pay a tingtingitingen ti diplomatiko a relasion ti Filipinas ken Iran kalpasan ti ipupusay ni dati a Supreme Leader ti Iran Ali Khamenei.
Prioridad ketdi ti gobierno ti panangtulong kadagiti 800 a Filipino sadiay.
Saan a kas iti Filipinas, awan ti diplomatiko a relasion ti Estados Unidos ken Israel iti Iran.
Nupay kasta saan pay a binigbig ti Filipinas ni Mojtaba Khamenei kas kangatuan a daulo ti Iran, a suno ti napapatay nga amana, ngem inlawlawag ni Lazaro nga aramidenda daytoy iti umno a panawen. (Joseph Pedrajas/Manila Bulletin//Lito Hilidon/Bannawag)
