CAMP MARCELO A. ADDURU, Tuguegarao City, Cagayan — Inarestar dagiti polis ti uppat a mapapati nga agaagab (cattle rustler) ken nakapasublida iti walo a nuang iti maysa nga anti-cattle rustling operation sadiay Palanan, Isabela idi rabii ti Mierkoles, Marso 25.
Segun ken ni Police Brig.Gen. Antonio P. Marallag Jr., Director ti Police Regional Office-2, napasamak ti insidente iti Barangay Dialawyao ken Culasi. Taga-Divilacan, Isabela dagiti suspek a da “Jok,” “Tur,” “Jhud,” ken “Boy.”
Nakita ti Palanan Municipal Police Station (MPS) a nangisayangkat iti mobile patrol ti dua a nakauggor iti sagduduada a nuang iti kalsada. Nakiddaw kadagiti suspek a mangipakitada iti pammaneknek ti panagtagikuada kadagiti ayup ngem awan ti naiparangda. Awan met ti pakabigbigan kadagiti ayup.
Maysa a follow-up operation ti naisayangkat a nangitunda iti pannakatiliw ti dua pay a suspek iti Barangay Culasi, nga addaan met iti ikut nga uppat a nuang nga awanan met laeng ti umno a dokumento.
Agdagup iti walo a nuang ti napasubli.
Excise tax iti krudo, gasolina, saan a nasuspenso
Naammuan iti pakpakauna nga imbestigasion a nagatang kano dagiti ayup manipud iti maysa nga agnagan iti “Sadam”– a saan pay a natiliw ket sapsapulenen dagiti pannakabagi ti linteg.
Naipan dagiti suspek iti Palanan Police Station agraman dagiti napasubli nga ayup para iti umno a dokumentasion ken manamnama a makasuan dagitoy iti panaglabsing iti Presidential Decree 533, wenno ti Anti-Cattle Rustling Law.
Impalagip ni Marallag iti publiko nga agtalinaedda a nasiput ken ireportda kadagiti otoridad ti ania man a mapagduaduaan nga aktibidad tapno makatulongda a mangtaginayon iti talna ken seguridad ti komunidad.
(Freddie Lazaro/Manila Bulletin)
