(Immuna a naipablaak iti Bannawag mangrugi iti Pebrero 18, 2013 a bilang.)
(MAIKA-3 A PASET)
MANIPUD pay idi damo, agkurkurangakon iti allowance nga ipawpaw-it dagiti dadakkelko manipud idiay probinsia.
NOBELA: Apo Baboy Party-List (27)
Ngem saanko ida a mapabasol. Kas nakunakon, gagangay a mannalon ti dakkelko a lalaki. Saan a maibilang nga agsursurok wenno naan-anay ti sapulna iti panagtalon, kas iti panagmula iti pagay wenno tabako. Kasta met ti panagdait ni inang. Sa maysa, limakami nga agkakabsat. Siak ti inaunaan. Agbasa met aminen dagiti kakabsatko. Fourth year iti hayskul ti adiek a babai, idinto a ti maikatlo—lalaki a kas kaniak—addan iti first year iti sekundaria. Ti maikapat, a lalaki manen, adda iti Grade V idinto ta Grade II ti buridekmi a babai
Saan nga ang-angaw ti mangpaadal iti lima nga annak. Maawatak daytoy a kasasaadmi. Sa kalpasanna, adtoyak a panggepna pay ti agarem.
Kinapudnona, nagastos a bisio daytoy panagarem-arem. Kasano a makaaremka iti kas ken ni Maria Emmanuelle, kas pangarigan, no dimo met ammo ti gumastos? Iti sabali a bangir, kasano koma a gumastoska no mamirmirautka met, nasangsangkitka pay ngem iti bao iti panawen ti gawat?
Nagpanunotak iti pamuspusan tapno mapataudko dagiti gastuek nga agarem ken ni Maria Emmanuelle. Gapu ta ammok ti agtabas ken agdait iti polo ken pantalon, kinasaritak ni Tia Caring. Kinunak, ilatangannak iti puesto iti shop-na ken igatangannak iti makina a pagdait. Agdaitak iti bigat agingga iti pangngaldaw. Ania man a masapulak iti daytoy, inayonko iti gastuek iti eskuela.
Immannugot ni Tia Caring. Maawatanna kano ti kayatko nga aramiden. Kinapudnona, dinayawna pay ketdi ti panggepko ta dakkel kano a tulong daytoy kadagiti dadakkelko.
Saanakon a nagtagtagari. Saan nga ammo ni Tia Caring a ti ania man a masapulak iti panagdaitko, aramatek iti panagdatonko ken ni Maria Emmanuelle.
ADDA madmadlawko ken ni Ferdie. Masansan, kasla napasnek ti pannakisarsaritana ken ni Maria Emmanuelle. No dadduma, agin-innarasaasda pay sa aggiddanda nga agkatawa wenno agpaggaak. Masansan a sipaten ni Maria Emmanuelle ti abaga ti gayyemko.
Adda kadin panggep ni Ferdie a pomorma ken ni Maria Emmanuelle? Kasla kasta ti itudo dagiti pasamak. Nagun-odna kadin ti simpatia ni Maria Emmanuelle? Wenno napasungbatnan daytoy?
Tunggal kanito nga isapsapulak dagitoy iti umno a sungbat, adda mariknak a panangtugkik ti di makita a natirad a punial iti barukongko.
Ngem iti panagriknak, saan a rumbeng nga agtalinaedak lattan nga agpugpugto. Iti maysa a vacant period, inawisko ni Ferdie nga agmeriendakami iti canteen ti unibersidad.
“Ne, milagro!” inkatawa ni Ferdie. “Pudno kadi ti nangngegko, ha? Nagawis ni Ilokano iti merienda!”
Inisemak ti angaw ni Ferdie. Bikolano ti gayyemko. Masansan a sutilennak iti kastoy gapu iti mangmangngegna a kinakirmet dagiti Ilokano, ngem saan a pananglais. Ikalkalintegak met a managinut laeng ni Ilokano a kas puli, saan a nakirmet, kas kunkuna dagiti dadduma. Nayanak ni Ilokano iti lugar a ‘yan dagiti adu a bantay, nakikipet a kataltalonan, ken akikid nga aplaya, kinunak, isu a rumbeng laeng nga aginut no kayatna ti agbiag.
“Napateg a banag, pards,” kinunak.
“Life and death kadi?”
“Medio.”
“Ne, talaga a seriosoka, aya? Okey ngarud!”
Self-service ti kantina. Orderna, bagkatenna. Manmano ti agmermerienda idi sumrekkami.
“Mangalaka latta iti kayatmo,” kinunak ken ni Ferdie idi addakamin iti counter.
Manutsutil, a natibnokan iti siddaaw, ti panangkitana kaniak. “Talagan sa ketdi a paldoka ita, aya, pards?”
“Saan met,” kinunak.
Manutsutil latta ni Ferdie. Ti kanginaan a hamburger ken nailata a Coke Zero ti inorderna. Binaybay-ak latta. Ammok a subsubokennak. Siak, ordinario a ham & sandwich ken Coke Zero.
Pinilimi ti maysa a lamisaan iti suli ti kantina, adayo bassit kadagiti dadduma nga agmermerienda.
“O, ania ti problemam, pards?” inamad ni Ferdie bayat ti panagngalngalna. “Grabe kadi?”
“Saan met. Adda laeng kayatko a lawlawagam.”
“Ania?”
“Maipanggep kadakayo ken Maria Emmanuelle.”
Napanganga. “Maipanggep kadakami ken Marielle?”
Nagtung-edak. “Pasensiakan, pards,” kinunak, “ngem adda laeng ngamin madmadlawko. Panagkitak, kasla nasingedkayo unay iti tunggal maysa. Agar-aremka kenkuana?”
Nagsubli ti manutsutil nga isem ni Ferdie. “’Gurayka man... agil-ilemka?”
“Sungbatam ti saludsodko, pards.”
“Sungbatan nga?”
“No agar-aremka kenkuana, agpudnoka laeng kaniak. Saankan nga aglibak. Ipabaratokon ni Maria Emmanuelle kenka. Peks man, awan ti nasakit a nakemko. ”
“Ania nga ipabarato?” Nagkatawa ni Ferdie iti dakkel. “Ania dayta? Pitsas ti madiong?”
Nagtung-edak. “Ammok met ngamin nga awan ti mabalinko nga ilaban kenka, pards. Sa gandang lalaki na lang—"
“Hoy, agsardengka man!”
“Isu ti pudno, pards.”
“Awan panggepko a mangporma ken ni Marielle,” kinuna ni Ferdie. “Kapatangak laeng.”
Minulenglengak. “Ang-angawennak laeng, pards?”
“Sika a talaga, wen. Panagkunak, saan la a rinibu a kappi no di arimbukeng ti mangigusgusugos iti utekmo. Agabaykami iti tugaw, natural laeng nga agkapatangankami. Saan a mabalin a diak kasarita. Kunananto pay a supladoak.”
Iti dayta a sinaona, nariknak a kasla adda naikkat a nadagsen a banag a nangpandag iti barukongko, iti batog ti puso.
“Totoong hindi mo siya nililigawan, ha?” panangpennekko. “Sao ti lalaki dayta.”
“Peks man, pards. Mamatay man ang lahat ng pusa sa amin!” Nagkatawa. “Agurayka, masama bang talaga ang tama mo sa kanya?”
Iti umuna a gundaway, napaisemak. “Hindi masama, pards,” insungbatko. “Ti kunam ketdi, napintas. Ken awan umasping iti kinapintas!”
“Dayta, nagpudno met laeng!” inkantiaw ni Ferdie. “Ammom, dayta met ti ibagbagak ken ni Marielle.”
“Ibagbagam nga ania?”
“Nga adda panagkursonadam kenkuana.”
“I-imbagam dayta?”
Nagtung-ed. “Dika pay nakaporma, ammon ni Marielle no ania ti kaririknam. Ngarud, adda kenkan ti first move, pare ko!”
(Adda tuloyna)
