Inwaragawag ni Presidente Marcos Jr. ita nga aldaw, Marso 13, ti pannakasuspenso ti excise tax ti liquefied petroleum gas (LPG) ken kerosene (gaas), kas paset ti sayangkat ti gobierno a mangep-ep iti epekto ti ngumatngato a presio ti lana.
Maipatungpal a dagus daytoy a pammilin idinto a mangrugin a maipakat ti autoridad nga impaay ti Kongreso a mangikeddeng iti buis iti lana inton Abril 14.
Segun ken ni Marcos, daytoy ti mangitunda iti pannakissay ti gastos dagiti pamilia a Filipino.
₱3.36 ti maksay iti kada litro ti LPG, idinto a ₱5.60 ti maksay iti kada litro ti kerosene.
Impasigurado ni Marcos ti publiko nga umdas ti suplay ti taraon ti pagilian, kas iti bagas, karne, ikan, ken natnateng, idinto a natalged di presio dagiti kangrunaan a magatang agingga iti arinunos ti Abril.
Excise tax iti krudo, gasolina, saan a nasuspenso
Maysa laeng ti pannakasuspenso ti excise tax iti LPG ken kerosene kadagiti nasaksaknap a programa ti gobierno a mangep-ep iti parikut dagiti pamilia, ket agtultuloy nga ipatungpalda dagiti pamuspusan tapno agtalinaed a natalged dagiti presio ti magatang ken masalakniban dagiti pagsapulan iti baet ti sangalubongan a krisis. (Argyll Cyrus Geducos/Manila Bulletin//Lito Hilidon/Bannawag)
