Saan a naimbag a damag ti napaay a panagsarita ti Estados Unidos (US) ken Iran, ket ti kumaro a riribuk iti Middle East ti mangitunda iti pagngato latta ti presio ti lana iti sangalubongan, segun iti Malakanyang.
Iti press briefing a naangay ita nga aldaw, Marso 13, kinuna ni undersecretary ti Presidential Communications Office (PCO) Claire Castro a makipaset ti Filipinas kadagiti nadumaduma pagilian iti sangalubongan a mangidawdawat iti natalna a pannakarisut ti risiris.
Inlawlawag ni Castro a maysa ti Filipinas kadagiti pagilian a nakaro a maapektaran iti panagngato ti presio ti lana iti sangalubongan gapu ta agpannuray pay laeng ti pagilian kadagiti maangkat a lana.
Nupay kasta, kinuna ni Castro a saan pay nga agkurang ti suplay ti lana ti pagilian, nangruna ti imbilang ti Iran ti Filipinas a kas "non-hostile country," ngem mabalin latta a lumanlan ti situasion no agtultuloy ti gubat. (Argyll Cyrus Geducos/Manila Bulletin//Lito Hilidon/Bannawag)
