Maisagsagana ti dua nga antolohia, sarita ken daniw nga Ilokano, dagiti mannurat iti Kamanilaan a kameng ti Gunglo Dagiti Mannurat nga Ilokano iti Metro Manila (GUMIL Metro Manila) kas paset ti pannakaselebrar ti maika-60 nga anibersario ti GMM inton Disiembre 2026.
Maawis amin a kameng ti GMM nga agidatag kadagiti sarita ken daniwda para kadagitoy nga antolohia (libro).
Pagalagadan iti panagidatag:
1. Iti sarita (short story), uray ania a tema ti suraten. Mabalin nga idatag ti naipablaaken (iti magasin, internet, kdp.) a sarita, ngem nasaysayaat no di pay naipablaak. No naipablaaken, masapul nga adda notasion iti baba ti sinurat mainaig iti detalye ti pannakaipablaak daytoy (nagan ti publikasion, website ken link, tawen/petsa a naipablaak, kdp.). Mabalin ti agidatag iti nasurok ngem maysa a sarita, ngem maysanto laeng a sarita ti mapili, segun iti pangngeddeng dagiti agpaay nga editor.
2. Iti daniw, uray ania a tema ti suraten, naipablaaken wenno saan pay. No naipablaaken, pasurotan iti detalye ti pannakaipablaak daytoy. Tallo agingga iti lima a daniw ti idatag. Maballin met a nasursurok. Piliento dagiti agpaay nga editor no mano wenno no ania dagiti daniw a mairaman iti antolohia.
Dati nga Editor ti Bannawag, mapadayawan iti KWF Dangal ng Panitikan 2026
3. Soft copy ti idatag a manuskrito, na-encode iti MS Word, iti document a letter size, Times New Roman wenno Arial a font, 12 font size, 1 inch a margin iti amin nga igid, doble espasio ken saan a nasursurok ngem 25 a panid no sarita. Saan met a makedngan ti kaatiddog dagiti daniw.
4. Mapakuyogan ti manuskrito (sarita, daniw) iti pakasaritaan ti biag ti autor wenno bionote (saan nga at-atiddog ngem maysa wenno dua a parapo), a pakairamanan dagiti contact information (adres, numero ti telepono/selpon, Facebook account no adda), ken kaudian a retrato iti .jpg a file format. Ipan ti bionote iti nakasina a document file.
4. Ipatulod ti manuskrito ken ti bionote iti [email protected].
5. Masapul a maawat dagiti manuskrito iti di naladladaw ngem Hulio 31, 2026.
6. Maipablaak dagiti antolohia iti wagas a tagnawa, wenno panidna, bayadanna. Maalanto a libro, a ti bilang ti kopia, maibatay iti kaibatogan ti naitagnawa a gatad. Mabalin met a maadaptarto ti wagas a print on demand, a no mano ti kayat wenno mabaelan ti autor a kaadu ti kopia ti alaenna, isu met ti bayadanna. Masumarto no mano ti eksakto nga itagnawa (bayadan) ti tunggal autor inton madesidir no manonto amin a kopia ti maimaldit.
7. Manamnama a mayalnag dagiti antolohia iti selebrasion ti GMM 60th Anniversary inton Disiembre 2026.
