(MAIKA-5 A PASET)
GAPU ta inkeddeng ni Maria Emmanuelle a saanen a gumatang iti sukat ti napukawna a cell phone, kayat a sawen dayta a saankon a mabalin a digaan babaen daytoy. Nagpanunotak iti sabali a pamuspusan tapno makapagdatonak kenkuana.
Napanunotko a suratan ni Maria Emmanuelle. Ne, apay koma a saan?
NOBELA: Saan a Rosas Amin nga Ayat, Maria Emmanuelle (7)
Ababa laeng ti suratko. Kinunak:
Emma,
I love you.
Romeo
Dayta laeng. Saankon a sinabsabongan. Kinunak, saanen a masapul nga agsuratak iti no mano a panid a love letter. Total, mangipudno met laeng iti panagayatko ti panggep ti surat, apay nga agpalpalikawak pay laeng?
Kalpasanna, nagpabulodak ken ni Ferdie iti libro ni Maria Emmanuelle. Ditoy ti nangisapitak iti suratko. Impaisublik met laeng ken ni Ferdie ti libro kalpasanna.
Nagurayak iti resultana. Sililimed, pinaliiwko dagiti reaksion ni Maria Emmanuelle. Pabarbaringringak a kitaen no kasta nga addakami iti uneg ti klase. No kasta nga agsabat ti panagkitami, pamrayak ti umisem. Nupay kasta, nadlawko a kasla awan nagbalbaliwan dagiti tignayna. Okey laeng kadi kenkuana a datonak iti panangilala?
Nakariknaak iti namnama.
UMATIBERRET ti tudo. Nakamattiderak iti waiting shed nga adda iti ampir ti ruangan a landok ti kampus ngem saanak a makastrek. Manipud iti ruangan, awan ti ania man a linong a kumamang iti main building ti unibersidad nga isu ti ‘yan ti klasek. Sigurado a madaripespesak no sarakusokek ti tudo.
Nakitak nga adda sumagmamano a babbai a dimsaag manipud iti bus a nagsardeng iti sanguanak. Nasaripatpatak a maysa ni Maria Emmanuelle kadakuada. Adda intugotna a payong.
“Emma!”
Napataliaw iti yanko. Inseniasko nga awan ti payongko. Inasitgannak.
“Umaykan,” inyawisna. “Sukob tayo.”
Nakipayongak kenkuana. Naimbag ta tudo laeng. Awan ti kabuyogna nga angin.
Nairisiris iti takiagko ti takiagna a nakaiggem iti payong.
“Apay ngamin a dika nangitugot iti payongmo?” dinamagna bayat ti pannagnami iti sementado a pathway iti kampus a kumamang iti main building ti unibersidad.
“Saanak met ngamin a Bombay,” kinunak.
Nasarangsang ti katawana. “Sika a talaga,” kinunana. “No mangngeg dagiti mangibagbaga a human rights advocates-da, ibagada la ketdi nga insensitiboka. Rasistaka...”
“Saan a panangimameg wenno pananglais iti maysa a puli ti panagsao iti pudno.”
“Kas pagarigan?”
“Kas kuna ni William Shakespeare, awagam man ti rosas iti sabali a nagan, isunto latta ti ikutna a kinabanglo. Iti sabali a bangir, uray no ibagam a nabanglo ti sabong ti bangar, agtalinaed latta a nabangsit. Kayatko a sawen, no nabanglo ti maysa a banag, agtalinaed latta a nabanglo uray no ibagam a nabangsit. Kasta met a no nabangsit, uray ibagam a nabanglo, agtalinaed latta a nabangsit. No awagam ti Negrito iti nangisit, saanmo nga uy-uyawen daytoy a kas puli. Ibagbagam laeng ti kinapudno a nangisit ti maris ti kudilna. Ad-adda nga insulto para kenkuana no ibagam a napudaw idinto ta saan met.”
Nagkatawa ni Maria Emmanuel. “Saanka a Bombay, awananka met iti payong.”
“Saan pay ngamin nga agtudtudo itay aggapuak idiay kaserak,” kinunak. “Sa laeng nagbuyat itay addaakon iti dalan.”
“Itay agrubuatka idiay balayyo, saan met ngata a nailaksid kenka a nanglangeb ti langit. Kayat a sawen dayta, agtudo la ketdi.
Ngem saanmo nga inkaskaso. Ammom nga agtudo ngem saanka latta a nangitugot iti payongmo.”
“Ammok ti turongen ti saom.”
“Ania?”
“Siak daydiay tao nga awanan iti foresight.”
Nagkatawa ni Maria Emmanuelle. “Sika ti nagsao iti dayta, saan a siak!”
Nagtuloy ti panagrinnisiris dagiti takiagmi bayat ti pannagnami. Adda mayabyabayaban nga aluten iti barukongko gapu iti daytoy.
“Kua, adda koma damagek,” kinunak.
“Ania?”
“Naisubli kadin ni Ferdie daydiay pinabulodko kenkuana a librom itay last week?”
“Wen. Apay?”
“A-awan kadi ti nakitam a nakaipit?”
“Nakaipit?” Nagmalanga. “Awan met. Apay, ania ti nakaipit iti libro?”
Saanak a nakasungbat a dagus. Ibagak kadi weno saan? Kas man agmarikadkadak. Ngem idi agangay, inkeddengko nga ibagak met laeng.
“K-kua, surat.”
Tinaldiapannak. “Akinsurat?”
“Siak.”
Kellaat, nagkatawa. “Ta apay met a napanunotmo a suratannak? Sika ketdi, pasuratsuratka pay. No adda kayatmo nga ibaga, ibagam lattan kaniak a personal. Saanen a nasken a suratannak pay. Kaska la sabsabali.”
Sabsabaliak a talaga, kinunak iti nakemko. Adda sabali a panggepko. Naisabsabali ti linaon daydiay.
Ngem nakagtengkamin iti main building. Saankon a naibaga pay kenkuana no ania ti linaon ti surat nga insapitko iti librona.
Sayang. Gundawaykon nga agpudno koma kenkuana, limbes pay.
(Adda tuloyna)
