(MAIKA-8 A PASET)
ALAS otso iti sardam idi dumtengak iti kompleanio. Uneg daytoy iti maysa a panakkelen a subdibision iti Marikina.
Sinabatnak ni Vicky, ti birthday celebrant. Inyawatko ti regalok, kinagiddato ti agek iti pingping.
“Happy birthday,” kinunak.
NOBELA: Apo Baboy Party-List (28)
“Thank you,” inyisem ni Vicky.
“Manipud ita a rabii, saankan a tin-edier.”
“Wen ngarud,” immisuot ni Vicky sa nagkatawa. “Hindi magtatagal, magiging damatan na rin ako!”
“Hindi pa ba dumating?”
“’Sino?”
“’Daydiay someone special-mo, asino koma pay?”
“Awan ngarud, e!”
Impalawlawko ti panagkitak. Iti panakkelen a minuyongan ti nakaiwarasan dagiti lamisaan. Sumagmamanon kadagitoy ti okupado. Agas-assisaw dagiti nakauniporme iti puraw a waiter a masansan a nakatapaya kadagiti tray a naglaon iti baso wenno pulotan. Adda ti bar iti maysa a suli ti hardin, adda nakapuesto a bartender dita. Nalawa met ti carport, dita ti yugyogan. Napalikmutan daytoy iti babassit a bombilia nga addaan iti agduduma a maris. Nangrugin ti sala.
“Bongga itong birthday celeb mo,” intagalogko.
“Hindi naman,” inyisem ni Vicky.
“Totoo pala ‘yong nababalitaan ko tungkol sa iyo.”
“Ania?”
“Spoiled ka kina papa at mama.”
“Hindi, oy,” insipat pay ni Vicky iti abagak. “Mahal lang nila akong talaga!”
Husto ti kuna ni Vicky. Saan a malibak a kasta. Unica hija daytoy. Nakakotse no sumrek iti unibersidad. Nupay kasta, ammo ni Vicky ti makilangen. Awan ti anginna, kas pagsasao. Saan a kas kadagiti dadduma a kapadpadna iti kasasaad ti biag a nangato ti timidda. Dagitay no maitibbakol wenno maitublak, ad-adda a katawaam imbes a tulongam.
“Ni Ferdie, addan?”
“Itay pay apagsipnget a simmangpet,” inkatawa ni Vicky. Insungona ti yan ti bar iti maysa a suli. “Nakaadun san!”
Agpayso, addan ni Ferdie iti yan ti bar. Adda iggemna a kopa a naglaon iti arak.
Adda immasideg a waiter a nagtapaya iti tray a naglaon iti sumagmamano a baso nga adda kargana.
“Drinks, sir?” dinamag ti waiter.
“’No ba ‘yang mga paninda mo?”
Nagkatawa ti waiter. “Softdrinks, sir,” kinunana. “Ngem adda whisky, beer, wine....”
“White wine, adda?”
“Wala akong dala, sir. Bay-anyo ta yalaankayo....”
“Thanks,” kinunak. “Siakon ti mangala iti inumek iti bar.”
“Sige ngarud,” kinuna ni Vicky. “TY iti daytoy regalom. Ania kadi daytoy, ha? If you don’t mind...”
“Ania koma ti rumbeng nga iregalo iti maysa nga agkasangay nga adda aminen kenkuana?” imparimrimko.
Nagkatawa ni Vicky iti sungbatko. Bulonko met daytan ti nagna a nagturong iti yan ti bar.
“In-inumem, pards?”
“O, pards!” kinuna ni Ferdie a dagus a nangidiaya iti dakulapna. “Itay pay laeng nga agur-uray ti sukmonmo!” Nagkatawa.
“’Nia kad’ dayta?” insungok ti linaon ti ig-iggamanna a kopa.
“I just kept on walking,” inyisemna. Ti anunsio ti maysa a nalatak a whisky ti kinunana. “Whisky?”
Naglingalingak. “Madamdaman dayta hard,” inkedkedko. “Serbesaak nga umuna.”
“That’s a wrong choice, pards.”
“Apay?”
“Whisky over beer, never fear,” kinunana. “But beer over whisky, very risky! Kas ‘tay kunadan, take it from the masters!”
“Bay-amon dagiti agkunkuna iti kasta,” kinunak. “Siak met ti uminum, saan nga isuda. Ken... saanka met a master.”
Pimgaak ni Ferdie.
Kinidagko. “Nakitam kadin ni Miss McTickle?”
“Apay, ania ti panggepmo nga aramiden kenkuana?”
“I just want to tickle her tonight,” inyangawko.
“Itay pay la nga adda dita yugyogan!”
Kimmitaak iti yan dagiti agiddeiddep a babassit a bombilia iti carport. “Diak mailangaan.”
“Nakudrepen ti panagkitam, pards,” kinuna ni Ferdie. ”Nasken nga uminumkan. Sinangona ti bartender.
“Make my friend keep walking also,” intung-edna iti daytoy. “Make it double!”
Nagrungiit ti bartender. “On the rocks, sir?”
“On the rocks.”
Pinisokan ti bartender ti maysa a kopa iti naburakburak a yelo. Tinugayanna daytoy iti whisky sa inyawatna kaniak.
“Thank you,” kinunak.
Sinimsimak ti whisky. Manen, pinadasko a minira dagiti agsasala iti carport.
“Uray ti whisky, pards, saanna a mapalitnaw ti panagkitak,” kinunak. “I need to walk!”
Rinungiitan ni Ferdie ti angawko. Immasidegak iti carport. Iti gilapgilap dagiti nagtagimaris a bombilia, binirok dagiti matak ti yan ni Maria Emmanuelle.
Adda ni Maria Emmanuelle iti tengnga ti salonan. Agsalsala iti moderno. Maysa kadagiti bakla a kaeskuelami ti kaparehana.
Miss McTickle, kinunak iti nakemko. I’ll tickle you tonight....
NAGSARDENG ti nagarampang a tokar. Nagsisina dagiti agsasala nga asmang iti pinakasalonan. Sinaruno ni Maria Emmanuelle ti bakla, ni Tonette—Antonio Galapate (nupay kunana a Calapate kano ti pudpudno)— a parehana a rimmuar manipud iti pagsasalaan.
Nakitanak ni Tonette.. “Hoy, Papa Rom!” impallilit daytoy idi makitanak. “Naka-arrive ka na pala, ha? Kailan pa?”
“Sangsangpetko,” inyisemko.
Kimpet ti bakla iti takiagko. “Kuyogennakami ken ni Marielle nga agtugaw,” kinunana.
Kinuyogko ida iti maysa kadagiti lamisaan a saan pay nga okupado iti hardin. Pinayapayak ti waiter nga adda tapayana a tray. Immasideg daytoy.
“Pare ko, ikkam ida iti mainum,” inyisemko iti waiter. “Daytay makaagas iti bannog, wen? Kas makitam, napalalo ti al-alda!”
Tubbog ti kahel ti pinili ti Tonette, maysa kadagiti baso nga ipaspasiar ti waiter. Brandy met ken ni Maria Emmanuelle, nga inyeg ti waiter kalpasan ti sumagmamano a kanito.
“Apay a dika agsala?” kinuna ti bakla. “Wenno dimo kayat a kaparehanakami ken ni Marielle?”
“Mabalin kadi ti tallo nga agpapareha?”
“Why not?” imparimrim ni Tonette. “Mabalin met a duata laeng, no type-mo. Cheek to cheek!” Inipusanna daytoy iti paggaak a timmaliawan dagiti dadduma a bisita iti ‘yanmi. “Type mo ba ako, Papa Rom?”
“Apay koma a saan?” insurdok met. “Magiging type kita... inton saanen nga uso ti babai.”
“Hudas! Hestas! Barrabas!” imbir-it nga immisuot ni Tonette. “Ganyan ka na ngayon dahil nasipsip mo na ang aking nektar! Pero magbabayad ka rin!”
Nagdanggaykami ken Maria Emmanuelle a nagkatawa iti drama ti bakla.
“Umaykan,” ginuyod ni Tonette a pinatakder ni Maria Emmanuelle apaman a naibusda dagiti linaon dagiti basoda. “Sayang dagiti tokar. Duata laengen nga agsala. Kalseb a talaga dagiti lallaki ditoy. Dida pulos ammo ti dumiskarte kadata a beauty of the night. Tse!”
Napakatawaak. “Sayaw tayo mamaya, ha?” kinunak met. “’Yong cheek to cheek!”
“Gumatangka iti kasaritam!!” imbir-it ni Tonette a pinaipusanna iti garikgik.
Brandy ti in-inumen ni Maria Emmanuelle. Kayat a sawen, ammona ti uminum iti nasanger. Ayos, nakunak iti nakemko.
Ngem iti laksid daytoy, adda mariknak a kebbakebba. Maibturko ngata a digaan ni Maria Emmanuelle iti personal? Adda aligagaw nga agap-apon iti kaunggak.
Kadagiti sabali a dayag nga immuna a nagdatonak, awan ti kastoy a panagamak a nariknak. Ngem kas man sabali ni Maria Emmanuelle. Kayat kadi a sawen daytoy a saanen a manglimlimo, ken ang-angaw no di napasnek ken napudno ti kayatko nga ipeksa nga ayat kenkuana?
Kayatko a patien a kasta.
(Maituloyto)
