Sarita ni CRISPINA J.B. BRAGADO
DUA a ministro ti agdindinniskutir no ania ti pudno a relihion a binangon ni Kristo. No dumteng ti batang ti maysa nga agsao, basaenna ti Bibliana. Maymaysa a libro ti pagadawanda kadagiti sawenda ngem saanda nga agsabat ta aggidiat ti kapanunotan ken panangitarusda iti mabasada.
Kiniddaw dagiti tao ti kapanunotan ni Padre Antonio. “Awan ti masaok no di ti panangituloy dagiti kakabsat iti panggepda. Ta kaniak la a maysa, maymaysa ti papanantayo amin nupay aggidiat laeng dagiti lugantayo. Kas pagarigan, adda mayat nga aglugan iti trak. Adda eroplano. Adda magmagna.”
Di nagbayag, nagpakada ni Padre Antonio. Dimtengda iti pagiballasiwan. Pinagbatinan ni Maning.
“Uray ket nasapa pay met laeng,” kinunana. “Apagisunto a sumipnget no dumanonak idiay ili.”
KLASIKO A SARITA: Padre Antonio (1)
Iti kalesa nga agpaili, kasla kitkitaen ni Padre Antonio ti ladawan ni Sita. Ay-ayenna unay ti balasang. Kasta met ni Maning. No matay ni Sita, anianto a kita ti saem ti marikna ti baro? Nalagipna ni Celia. Ti kinapusaksak ni Celia a kaarngi ni Dalen. Ket itan, nalagipna manen ti napalabas.
Mangal-ala idi iti Artes Liberales iti maysa nga unibersidad iti Manila. Nakaadalanna ni Dalen. Napintas ni Dalen. Mestisilia. Adu ti agrayo iti daytoy. Idi addada iti maikatlo a tukad, nasangal ti ayan-ayatda iti arubayan ti batonlagip ni Rizal idiay Luneta. Ngem iti panagserra ti klase iti dayta a tawen, nakitaray ni Dalen iti maysa met laeng a kaadalanda. Manipud idin, nagbaliwen ti panagkitana iti lubong. Ket simrek iti seminario.
Adu a sangit idi ni nanangna. Kasta met ti ulitegna a tumultulong iti panagadalna. Inkari pay idi ti ulitegna nga ituloyna ti adalna idiay Amerika. Pinadas ti ulitegna a pasulisog iti nalapsat a babai ngem dina intulok ti bagina.
Dimteng iti poblasion a dina napupuotan. Iti kombento, nadanonna ni Celia. Itay pay la kano alas singko nga agur-uray. Nagawiden ni Lita a kinakuyogna.
“Ket?” nakuna ni Padre Antonio.
“Panggep ti Legion of Mary ti dumawat iti tulong kadagiti umili, father, ta pabaruentayo koma ti pinta ti simbaan. Asidegen ti piesta.”
Nakaisem ni Padre Antonio. Adtoyen ti maysa nga ima a kasinnaranayna.
“Nasayaat unay dayta a napanunotyo,” kinunana.
“Ammom, panggepko ti agpatulong iti Konseho Munisipal a mangbuangay iti salip iti kinapintas. Pagbuligan nga isayangkat ti simbaan ken ti ili.
Agpaay ti mapastrek iti pannakatarimaan ti simbaan, kampanario ken pagay-ayaman dagiti agtutubo. Nasken daytoy tapno mayadayo dagiti agtutubo iti dakes. Addada la dita kalkalsada wenno agsusugal wenno agtutungtong.”
Narimat dagiti mata ni Celia idi agpakada. Idi awanen ti balasang, kasla kitkitaen pay laeng ni Padre Antonio ti napusaksak a ladawan ni Celia. Kaarngi ni Dalen, nakunana manen. Ngem maraem ni Celia. Kasla maysa a langit. Saan a kas ken ni Dalen a narasi; addaan iti apuy a lasag.
LIMA a bulanen ni Padre Antonio iti Santa Catalina. Iti dayta a bigat a panagtan-awna iti kombento, kinasalip ti isemna ti sinamar ti ubing nga init nga addan iti alimpatok ti bantay.
Iti arubayan ti simbaan, pumanekpek dagiti wasay iti puon ken sanga ti baliti. Iti bangir a sikigan ti simbaan, dagiti mangkiwkiwar iti darat ken semento a pangtarimaanda iti naruka a diding.
Immanges ni Padre Antonio. Apaman a malpas dagita, maisarunonton ti basketball court, nakunana. Tinangadna ti init. Dina makita nga agpangpangato. Ngem ammona nga agpangpangato.—O
