Sarita ni BENJAMIN F. AURELIO
ITI sumuno a malem, Domingo, addakami manen nga agaayam iti sigud a pagay-ayamanmi. Nakitak nga immasideg manen ni Carding iti pagaayaman. Kas kadawyanna, saan met a simminsina ni Nero iti kabsatko.
“Hey, adda man ditoyen ni Piek!” impukkaw ni Nardo a kasla siak ti pabasolenna. “Diak met imbaga kenka, aya, a diak kayaten a makita ti rupana ditoy?” Nagsardeng pay ni Nardo a nagay-ayam. Inasitganna ni Carding. Nagulimekkami amin.
“Apay nga addaka manen ditoy?” nagubsang ti panagsaludsod ni Nardo.
“Adda la pagatang ni nanangko idiay tiendaan, ngem dimmagasak la ditoy iti mabiit,” insungbat ni Carding.
KLASIKO A SARITA: Nasaem a Pannakabales (1)
“No dita tiendaan ti papanam, apay a ditoy ti nagnaam? Adda kadi tiendaan ditoy? Ala, Piek, pumanawkan! Kagurak ti rupam no kunak, kagurak! Pumanawka ditoy!” Induron pay ni Nardo ti kabsatko ket napatugaw.
“Ara, Nero!” kinuna ketdi ni Carding iti aso idi asitgan daytoy ti kabsatko. Kasla kimat ti aso a limmagto ket nakagatna ti tengnged ti bado ni Nardo. Naray-ab ti badona. Nakapungtot ni Nardo. Dinanogna ti karabukob ti aso ket nagtartarayen nga agal-alang-ang. Igaygay-at metten ni Carding ti tumakder.
“Makitam ti inaramid dayta asom, Piek? Agbayadka!” Immasideg ni Nardo ken ni Carding ket danogenna koma ngem inkuy-at ti kabsatko iti napigsa dagiti gurongna ket nagdisso ti ulona iti rusok ni Nardo.
Nagsaiddek daytoy iti pannakasangdo ni Carding. Nagsallapid dagiti sakana. Nagtirtiritir gapu iti sakit ti rusokna agingga iti daga.
Saan a napnek ni Carding iti balligina. Sinakayanna ni Nardo. Ginagarana a sinulong ti tengnged ken rupa ni Nardo a saan a makapisipis gapu iti sakit ti rusokna ta dandani la saan a makaanges. Nagas-asug ni Nardo.
Idi makitak a gagaraen unayen ni Carding iti sulog ni Nardo, immasidegak kadakuada. Tinengngelko ti abaga ti kabsatko. Ngem diak nasiputan ti panangsulong ni Carding kaniak. Nagdisso ti gemgemna iti maysa a matak.
Simleng met ti panagkitak. Naulawak ket diak maimulagat ti matak. Diak napuotan ti pannakapadatak ket nagdisso ti ulok iti puon ti kayo a masansan a pagtugtugawan ni Carding.
“Manong! Manong!” timek ni Carding ti nangngegko.
“Pakawanennak, manong! Saanko nga inggagara! Saanka a gandat a ranggasan. Impagarupko ngamin a kadua ni Nardo ti nangtengngel kaniak. Manong, pakawanennak!”
Inkarkarigatak ti timmakder.
“Ading,” kinunak ket sinallabayko ti kabsatko, “awan ti aniamanna kaniak daytoy. Ay-ayatenka... kabsatka...
natangsitak gapu kenka! Manipud ita, awanton ti mangaw-awag kenka iti Piek!”
Nasiputak a nakaungaren ni Nardo. Timmakder ngem saan a nagtagtagari. Nagkummeg ket nagar-arudoken a pimmanaw.
“Awan ti gidiatna iti kawitan a naipabatok iti sangaburnay a suka!” nangngegmi nga inkatawa dagiti ubbing a kaduami ta agawidkami metten.—O
