Iti baet ti yaadu ti "masirib iti linteg" iti social media, nagsaon ti Integrated Bar of the Philippines (IBP) no ania ti taktakderanda iti saludsod no legal met laeng ti naaramid a sesion iti Senado idi Hunio 3.
Ti IBP ti nailian a gunglo dagiti abogado a nabukel tapno maital-o ti pagalagadan ti legal a propesion iti pagilian, ket kinunada a balido ken maitunos iti linteg ti sesion.
Segun iti statement ti IBP a rimmuar idi Hunio 4, balido ken legal ti sesion ti Senado idi Hunio 3 kas maitunos iti Avelino doctrine, gapu ta adda 12 a senador a nangbukel iti quorum.
Kinuna ti IBP a maibilang a legal ken opisial amin a naaramid, resolusion, ken desision nga inaramid ti Senado iti sesionda idi Hunio 3 no suroten ti makunkuna a "presumption of regularity" iti panangtungpal dagiti senador iti annongenda.
Mairaman daytoy ti pannakaikkat ni Sen. Alan Peter Cayetano a kas presidente ti Senado kas inkeddeng ti baro a mayoria, kasta met ti pannakapabaro dagiti nadumaduma a komite, agraman ti Blue Ribbon.
Signal 1, naibayog iti 12 a lugar iti Luzon gapu ken ni Bagyo Kiyapo
Inlawlawag ti IBP ti panagkanaig ti Article VI, Section 16(2) ti 1987 Constitution ken ti kaso ti Avelino vs. Cuenco a dinesisionan ti Korte Suprema idi 1949 iti panangbukel iti quorum.
Kinuna ti IBP a saan a kuestion no ania a Konstitusion ti pagibasaran iti daytoy ta agpada dagiti balikas ken sagudayen iti Article VI, Section 16(2) ti 1987 Constitution ken ti Article VI, Section 10 (2) ti 1935 Constitution.
Innayon ti IBP nga impaganetget ti Avelino doctrine ti praktikal a pamay-an: masapul nga ipatarus ti Konstitusion iti wagas a mangitunda iti panagandar ti Senado, saan a tapno malapdan gapu iti kaawan dagiti senador a saan a mapilit a dumar-ay. (Aaron Recuenco/Manila Bulletin//Lito Hilidon/Bannawag)
