Sarita ni FELIPE R. BACRICIO
LINUKATAN ni Inciong Mababa ti piambrera a naglaon iti kanenna. Inangotna ti sinigang a bangus nga impabalon ni Rosa kenkuana.
Apagisu nga ilumlomna ti kutsara iti innapuy idi nakitana ti maysa a lalaki nga adda ar-aramidenna iti trak a disdiskargaenda itay. Nakemkemna dagiti sangina. Kinalubanna met laeng ti pangaldawna, binitbitna ti karbinna.
“Hoy! Hoy!” gimluong ti timekna.
Timmaliaw ti lalaki ngem intuloyna latta ti aramidna. Napardas dagiti narapis nga imana a nagakup kadagiti naregreg a bagas nga ikargana iti supot.
KLASIKO A SARITA: Rimat iti Kasipngetan (2)
“Sin’ ti nangibaga nga alaem dagita?” Ginammatan ni Inciong ti supot ti lalaki.
Saan nga inibbatan ti lalaki ti supot. “Kabsat!” Naemma a kas karnero ti timekna: sumaranget a kas naipasuli a marabutit dagiti mata ken tignayna. “Kaasiannak. Masakit ti asawak ken ti tagibimi. Dida pay nakaraman iti kalluto iti dua nga aldaw!”
Nagassideg dagiti kiday ni Inciong. Nagsubli a kas i'tay pagay-ayatna a kanta ti Kailokuan dagiti balikas ni Major Dimasagid. “Asino man kadakayo ti agliway iti uray maminsan, maikkat. Awan ti pakawan.”
“Saan a mabalin, gayyem. ‘Mo da’ta.”
Nagsanud ti lalaki. “Kabsat, mangngaasika! Ipagpagapum iti asawak ken anakko. Masakitda. Utangko a naimbag a nakem kenka, kabsat. Mangngaasika!”
Nalunag ti puso ni Inciong Mababa. No awan la ketdit’ makakitkita, palubosakon! napanunotna. Inwarasna ti panagkitana. Awan matatao. Mangal-aldawda amin.
Iti sango ti opisina, nakaparada pay laeng ti dyip ni Major Dimasagid. Saan met a mangal-aldaw iti ruar ti panguloda.
‘’Ala, inkan. Darasem! Dika agpakpakita, wen?”
Nagyaman ti lalaki.
Immisem ni Inciong Mababa sa manen inwarasna dagiti matana. Ngem kas pay nagungap ti daga a pagtaktakderanna. Agan-andaren nga umasideg iti yanna ti dyip ni Major Dimasagid!
Sinalikepkepan ti lalaki ti supot a kas man napateg a gameng a rumbeng a taginayonen nga ikutan; a kasla ketdin katimbeng ti maysa a masakbayan, napateg a kas iti biag, ket nagtayaren.
“Agsardengka! Agsardengka!” impukkaw ni Inciong.
Umas-asideg latta ti dyip ni Major Dimasagid.
“Agsardengka!” Kinaem ni Inciong dagiti ngipenna, intag-ayna ti igamna, ket sakbay a makadanon ti lalaki iti barut nga alad, immawengen ti uni ti karbin.
“ADDA kalintegak, ania, sarge? Isu—“ ket intudo ni Inciong Mababa ti bangkay. Naiwaris ti bagas iti nabasa pay laeng a daga, “basolna. Timmaray! Diak koma paltogan, ngem—ngem—“
Imbakalna dagiti matana iti rupa ti nalukmeg, tung-ed a tung-ed ken agsursurat a polis; immallatiw kadagiti trabahador, ni Angel Pilapil, sa nagsaltek ken ni Major Cesar Dimasagid. “Kusto ti inaramidko, saan kadi, sir?”
Kadagiti simmaruno nga aldaw, kusokuso ti panunot ni Inciong Mababa. Mano dagiti aldaw a kasla kaangepan ti lubong a paggunggunayan met dagiti adu a parsua a kasla tirtiris; tirtiris a pagtigtignayen ti saan a makitkita a bileg, ket pasaray bumangon iti kaltaang dagiti rabii nga aglingling-et, agim-imtuod. Nainkalintegan met la ngata ti panangpaltogko kenkuana? Asino itan ti mangtaraon iti anak ken asawana?
Pinadasna, ngem saan a makapnek dagiti sungbat a maarikapna.—O
