AGRIRIAW dagiti kakaduam iti panagtarayyo a naggapu iti locker room nga agturong iti football field. Ngem nakaul-ulimekka. Nagpaudika. Bitbitmo ti helmet-mo. Sumipngeten. Nakataltalinaay ti panawen. Awan man laeng ti palayupoy. Banag nga ad-adda a nangpabara iti bagim. Ket iti panangipalawlawmo iti panagkitam kadagiti nagkaadu a tattao nga agik-ikkis kadagiti naipalawlaw a bleacher iti football field, nagkuy-os ti tianmo. Makariknakan iti panagaripapa. Wenno buteng kadi? Maisangolkan iti pudpudno nga ay-ayam iti football. Saanen a dagiti ka-team-mo ti kaay-ayammo. Laban daytoy a pudno.
“Go, Wildcats! Go, Wildcats!” inyikkis dagiti fans-yo a nakatakder ken mangtadtadek iti aluminum a bleacher. Napnon iti ikkis ken ariwawa ti football field.
Iti igid ti football field, agsasala dagiti kameng cheering squad. Yik-ikkis ti pannakadauloda: “Give me W!” Sungbatan met dagiti kameng iti: “W!”
“Give me I!”
“I!”
NOBELA: Saan a Rosas Amin nga Ayat, Maria Emmanuelle (11)
Nalayus met iti lawag dagiti napipigsa a silaw ti pagay-ayaman. Iti bangir nga ungto ti football field, nakatakder dagiti kalabanyo a mangur-uray kadakayo, ti Palo Verde High School. Nalaingda. Sangkadagullit dayta ti assistant coach. Ngem no diyo kabaelan nga abaken ida, lumidlidem ti gundawayyo a makapan iti championship.
Miniram ida. Nagdadakkelen a tattao. Ad-adu nga amang ti nabisbisked ken daddadakkel ngem sika. Ket kinidagnaka ti panagduadua. Kabaelam ngata ida? Amangan no sikanto ti pagay-ayamanda a dungparen ken baliktaden,
Immangeska iti nauneg, sa met laeng impug-awmo.
Pagammuan la ta adda nangguyod iti lengnges ti unipormem. Ni Walter.
“You ready, yeah?” Uray la a nabennat ti unipormen a ginuyod ni Walter. “No aramidem dagiti insuromi kenka kadagiti adu a praktistayo, mangabaktayo... Maawatam?”
Nagtung-edka ngem saan latta a napukaw ti panagkuykuy-os ti buksitmo. Kasla makasarsaruaka payen.
Apay, agpannuray koma ti panangatiwyo kenka? Agdadamoka, ngem sikan ti pakaidas-alan ti amin a namnamada? Napawingiwingka.
“Sika ti kaagresibuan a guard ken tackler,” intuloy ni Walter. “No ipakitam ti laingmo, mabalin a maaringan dagiti kakaduata ket saysayaatenda met ti agay-ayam. No kasta ti mapasamak, dakkel ti namnamatayo a mangabak. Ket maikkantayto iti namnama a makadanon iti championship... Nangngegnak?”
Nagtung-edka manen. Kasla inalimonen ti amakmo ti bosesmo.
“Don’t disappoint us... clear?” kinuna pay ni Walter sa linipakna ti patongmo.
Nakigtotka ket uray la a napakietka. Nadayyeg manen ti barukongmo. Ngem sakbay a naipeksam ti rurodmo, nakaadayon ni Walter.
Nagkidemka. Immangeska iti nauneg. Breath in... breath out... Naminlima nga inaramidmo dayta. Masapul a dimo ipalubos nga iturayannaka ti napalabasmo. Ikupinmon dayta a lagip. Inulitmo ti immanges iti nauneg ken impug-awmo. Timmalinaay bassit ti riknam. Timmaliawka iti aglawlaw. Sapsapulen dagiti matam ni Dindo. Ngem saanmo a makita. Imbagana itay a naka-iskediul nga agtrabaho. Pinadasna kano ti nagkiddaw iti day-off ngem saan nga immannugot ti manedier. Adu kano ti trabahoda iti daytoy a rabii, ngem bareng no makaawidto met laeng a masapa ket mabuyanto met laeng daytoy ti dadduma a paset ti ay-ayammo.
Nasingaka iti nakapigpigsa a sultip. Naggapu kadagiti dua a referee. Addada iti tengnga ti football field. Ipakpakaammoda ti kickoff. Mangipallangatokda iti sensilio tapno maammuan no asino a team ti mangikugtar iti bola para iti kalaban a team. Kas team captain-yo, nagpatengnga ni Walter. Kasta met ti inaramid ti team captain ti Palo Verde High.
Impallangatok ti referee ti sensilio nga iggemna. Siniputanda ti panagdisso ti sensilio. Nagsubli ni Walter iti ummongyo. Dakayo ti mangikugtar iti bola iti kalabanyo isu nga inawagannaka ni Coach Devon. Maysaka pay a miembro ti special team a mangsalaknib iti panangitaray ti kalabanyo iti end zone. Atipaenyo ida a mangi-touchdown iti bola.
Naguummongkayo a miembro ti special team. Kaduayo ni Coach Devon. Impaganetgetna ti saanyo a panangipalubos a maka-touchdown ti kalabanyo. A no maabakkayo, marigatankayton a maki-playoff. Kalpasanna, ginuyodnaka ti coach.
“Ammomon no ania ti aramidem?” sinaludsodna kenka.
“Yes, coach,” insungbatmo.
“Laglagipem... no asino ti nakaiggem iti bola, isu ti tiradaem. Nalawag?”
“Yes, coach.”
“Then go! Ipakitam ti kabaelam!” kinuna ti coach sa linippaakna ti patongmo.
Napasarimaddengka. Ngem apagapaman laeng. Kinemkemmo lattan dagiti sangim. Shit, nakunam. No apay a patinayon a ti patongmo ti lippaakenda. Nagungorka lattan iti kaunggam.
Sangapulo ket maysakayo nga special team. Nagiintarkayo a nagaabay iti maikatlo nga uged nga agarup tallopulo a kadapan ti kaadayona manipud iti linia ti end zone. Nakasaganan ti kicker-yo a mangkugtar iti bola.
Iti ungto ti bangir nga end zone, nakasaganan dagiti kalabanyo a mangsippaw iti bola.
Nadlawmo, nakaul-ulimeken dagiti agbuybuya. Limneden dagiti ikkis ken riawda. Ammom, nakaturong ti panagkitada iti kicker. Nalabit, pampanunotenda no ania manen ti mapasamak. Ket agsipud ta home game-yo daytoy, taga-Las Vegas High ti kaaduan kadagiti agbuybuya. Mangnamnamada a mangabakkayo met itan.
Isu dayta ti pampanunotem. Numona ta umuna pay laeng nga ay-ayammo, impabaklayen da Coach Devon ken Walter kenka ti kadakkelan a responsibilidad.
Nariknam ti panagkapuymo a mangpanunot.
Immangeska iti nauneg. Nakaun-uneg. Ket nagampayag manen kenka ti arapaapmo. Ti kakaisuna a kalkalikagumam... a makapagkolehioka koma. Kasla nangngegmo met ti timek ni Dindo: “Ti laeng football ti namnamam a pakatungpalan ti arapaapmo, awanen sabali pay!”
Dimo ammo ngem no apay a naitanamitimmo lattan ti “Nanang...”
Nagsultip ti referee sa nagsenias. Mangrugin ti ay-ayam.
Nagtaray ti kicker. Kinugtaranna ti bola. Timmayok daytoy. Timmaraykayo nga agkakadua a nangdarup kadagiti kalabanyo. Masapul a mapasardeng ti asino man a makaiggem iti bola— a kas kuna ni Coach Devon: “Iti ania man a wagas.”
Nakaparpardaska a timmaray. Ngem nakasidsidap dagiti matam a nangsurot iti aglaylayag a bola iti angin. Nagdisso iti maysa a natayag ken nabisked a lalaki. Isu ti puntiriam. Masapul a matublakmo. Nasken a saanna a maitaray ti bola iti end zone. Saanmo a palubosan a makapuntos. Addaytan... Ginammatam. Ngem nagling-i ket ti laeng abagana ti naiggeman. Nakaruk-at. Ket umadayon kenka! Ken addaytan ti maysa pay a dakkel a kalaban a nakasaganan a mangsangdo kenka. Ngem impennekmo ti timmaray sa naglisika ket natublak iti karuotan. Kinamatmo ti nakaiggem iti bola. Napaspas a tumaray. Aganangsabkan. Awan a pulos ti makitam a ka-team-mo iti asideg. Natublaken dagiti kalaban dagiti dadduma, simmuko metten dagiti dadduma.
Dimo napupuotan ti nagrasaw. Nagriawka pay. Kasano a saankayo a maabak no kastoy a kasla awan a pulos ti panggepda a tumaray?
Pinaspasam ti nangkamat iti nakaiggem iti bola. Umas-asidegen ti kalaban iti end zone. Ngem masapul a saan a makapuntos! Uray la a nangurat ti tengngedmo iti panangipasnekmo a tumaray. Maymaysa ti puntiriam. Ti bola. Ngem biddutmo. Saanmo a liningay ti aglawlawmo. Ket sakbay a nagammatam ti lalaki a nakaiggem iti bola, nakapigpigsa ti panangbangdol kenka ti maysa a dakkel a bagi. Naparusisika. Simmaruno pay ti maysa a dakkel manen a kalaban. Nakapigpigsa ti pannakadungparmo. Saanmon a nabalanse ti bagim. Natublakka. Kasla natukkol dagiti tultulangmo iti panagriknam ket nagiluska. Ket idi kitaem ti end zone, adda sadiay ti taga-Las Vegas High a nakaiggem iti bola. Agsalsalan a manirtiris. Iti tengnga, iti ruar ti end zone, nakitam ti referee a nangitag-ay kadagiti dua a takiagna.
Touchdown! Palo Verde High: 6; Las Vegas High: 0.
Dinanogmo ti karuotan.
Nalabes kadi unay ti panagtalekmo iti kabaelam?
Timmakderka. Limmingayka iti ummong dagiti ka-team-mo. Nakadumogda amin. Kinitam ni Coach Devon. Agtabtabbuga. Ammom, marurod daydiay. Kasano, impalubosyo a maka-touchdown ti kalabanyo.
Nagsublikayo iti formation para iti panangkugtar ti kalabanyo a team iti bola. Maysa a point ti score no maipunta ti bola iti nagbaetan ti dua a landok a naipatakder iti end zone. Manmano, no adda man, ti agmintis iti dayta.
Nagsultip ti referee. Napardas ti kicker a nangkugtar iti bola. Timmayab ti bola. Simrek iti nagbaetan dagiti atitiddog a landok.
Nagsultip manen ti referee. Intayagna dagiti dua a takiagna. Mangipasimudaag a naka-score manen ti kalabanda.
Palo Verde High: 7; Las Vegas High: 0.
Nagtataraykayo a nagturong iti igid, iti ummong dagiti kakaduayo. Saanka a nagun-uni. Napanka nagtugaw iti naiputputong. Dimo kayat ti mapagsasawan. Dimo kayat nga adda mangngegmo a pammasakit.
Timmaray a simrek dagiti miembro ti offensive team. Sangapulo ket maysada amin. Nagdumogka. Mangemkemkemka. Kasla mariknamon ti upay. Saan gayam a kas kalakana daytoy nga ay-ayam. Pinaaymo ti coach-mo. Pinaaymo dagiti kakaduam. Saanmo a nalapdan ti kalabanyo a maka-score.
Nasingaka iti pannakatapik ti bukotmo.
“Good job.” Ni Coach Devon.
Naklaatka. Tinangadmo ti coach. Saan a good job. Pinalubosam ti kalabanyo a makapuntos.
“Sorry, coach,” kinunam ketdi.
“You did your best, son.”
Son? Kellaat, nagngarietka. Nagdalagudog ti barukongmo. Kasla mangmangngegmo ti timek ti lalaki a nangampon kenka. Kasla marikriknam dagiti dakulap daytoy nga agkarkarayam iti amin a paset ti bagim. Son... Pimmardas ti panagangesmo. Ngem sakbay a dimo matengngel ti bagim, natimek manen ni Coach Devon.
“Aginanaka,” kinuna ti coach sa timmallikuden.
Natdaka a nangbuya iti yaadayo ti coach. Di pay nagtalna ti panagbayo ti barukongmo.
Kimmitaka iti football field ta bareng mabaw-asanka. Nadlawmo a marigatan ni Walter a mangigunay iti bola. Itedna iti running back ngem napardas dagiti kalabanda a mangrugma kenkuana. Padpadasenna nga ited iti wide receiver ngem naiget ti pannakaguardiada. Kasla ubbing dagiti ka-team-mo nga ay-ayamen dagiti kalabanyo.
Third down. Siam pay a yarda ti daliasaten dagiti kakaduam tapno malpasyo ti first down. Desperado ni Walter. No saanda a maipasa wenno maitaray ti bola iti siam a yarda, sublaten manen ti kalabanyo ti bola.
Nailansa dagiti matam ti formation ti kalabanyo. Napigsa ti depensada. Saan a kabaelan ti running back nga itaray ti bola a saanda a magammatan. Ti wide receiver ken ti running back laeng ti namnamada. Nakapormasionda amin a nakakubbo. Nagpukkaw ti quarterback. Naggunay ti wide receiver ken ti runningback a nagpaigid iti agsumbangir ti football field. Pinidut ti center ti bola sa impasana ken ni Walter, a nagsanud met. Imbakal ni Walter ti panagkitana iti running back ken iti wide receiver. Natarayda nga agturong iti end zone. Ngem nataray met dagiti kalaban a mangsursurot kadakuada. Naiget ti pannakabantayda. Awan ti pagpilian ni Walter. Umas-asidegen kenkuana dagiti defensive guard ken tackle. Nakitana ti wide receiver a kellaat a nagsardeng sa binaliwanna ti panagtarayna a mangliklik iti mangsursurot kenkuana. Sangapulo a yarda ti kaadayona iti end zone. Naadaywanna ti mangsursurot kenkuana. Nalubsaken ti offensive guard-na. Nawayan ti defensive tackle nga umas-asideg ken ni Walter. Masapul a maipasana ti bola. Ania pay ti aramidenna? Hail Mary! Itirona ti bola iti adayo a mangnamnama a ti receiver-na ti mismo a makasippaw. Apagisu a maibbatan ni Walter ti bola idi rugmaan ti defensive tackle. Naganikki a nabaliktad iti karuotan.
Napatakderka a nangbuya iti bola nga aglaylayag iti angin. Tinengngelmo ti angesmo. Nakasagana ti wide receiver a mangsippaw. Agpababan ti bola. Agmaymaysa pay laeng ti wide receiver. Ngem pagam-ammuan lattan ta addan ti maysa a defensive lineman iti sango ti wide receiver ket isu ti nakasippaw iti bola. Nagriaw dagiti agbuybuya.
Interception!
Anian nga iriak dagiti fans ti Wildcats. Agilunodda payen. Pinagsawsawanda iti dakes ni Walter.
“You are an idiot, Walter!” impukkawda.
Nakadagdagsen met ti panangibaddekmo iti daga sa pinasarunuam pay iti mamedmedmedan a rasaw.
Pati dagiti ka-team-mo, napangangada, agririawda. Masuronda.
“Stop that son of a bitch! Stop him!” nakapigpigsa ti riawmo iti pannakakitam iti defensive lineman a mangitarayen iti bola iti bukodda nga end zone.
Napataliaw dagiti tao kenka.
Napardas ti panagtaray ti defensive lineman. Pinalawlawan dagiti kakakaduana. Salaknibanda tapno awan ti maka-tackle. Pinadas dagiti ka-team-mo ti kumamakam ngem kas man laklakaen a padsuen dagiti kalabanyo.
Nangngegmo ti nagsasaruno a panagilunod ni Coach Devon. Iti panangtaliawmo, apagisu la unay ti panangibato daytoy iti headphone-na. Leppay dagiti abagana.
KINITA ni Dindo ti relona bayat ti napardas a pannagnana nga agturong iti pagparkingan a yan ti luganna. Awan ti adu a kustomer ti Roberto’s Tacos isu a pinalubosanda nga agawid a nasapa. Alas siete iti rabiin. Kayatna a kamakamen ti umuna nga ay-ayam ni Ferdie.
Yus-usongnan ti tulbek iti ridaw ti luganna idi mailukat ti ridaw ti lugan iti abayna. Saan a timmaliaw. Inlukatna ketdi ti ridaw ti luganna. Ngem adda nangiduron ket nanalbaag a nairikep.
“Hola, Dindo! Como esta, amigo?” natangken ti timek ti parsua nga addan iti abayna.
Naklaat ni Dindo. Sinalikepkepan ti buteng. Uray no panipngeten, malasin ti ilulusiawna. Am-ammona unay dayta a timek. Pagbutbutngan ti adu a kapatadanna.
“H-hola, Rico...” adda banarbar iti timekna. Nagmaga ti karabukobna.
“Umik-ikaykan kadakami, amigo... Mailiwkamin kenka...” ad-adda a panglais ti pannakayibbet dagiti balikas.
“Sori, Rico,” insungbatna sa impalawlawna ti panagkitana. Uppat dagiti kakadua ni Rico a nanglawlaw kenkuana. Agdudusol dagiti sabbikelda nga ammona lattan a paltog.
“Nakalipatkan....”
“Saan, Rico... Ammom metten, adda part-time a trabahok... sa sumrekak iti eskuela...” Sipsiputanna dagiti uppat a kadua ni Rico.
“Ammom nga adda latta agur-uray a trabahom iti bunggoytayo.”
Nagwingiwing ni Dindo. “Saan laengen, Rico...”
“Ti masapulam iti maysa a rabii kadakami, makalawas a trabahuem ditoy.”
“Sorry, ngem kayatko koma a...” kinuna ni Dindo a kasla sumupiat ngem uray la a nagarukong iti panagdisso ti napigsa a danog iti bakrangna.
“Gapu iti gayyemmo a Pinoy, saan kadi? Napatpategen ti gayyemmo ngem dakami. Isu kadi ti nangibaga kenka a liklikannakami?” makaungeten ti timek ni Rico.
“Saan, Rico... Awan ti pakaibinganna iti daytoy,” inkalintegan ni Dindo.
“Ket apay ngarud a simminakan?”
Maysa manen a danog ti nagdisso iti bakrangna.
“Pangngaasim, Rico, diak kayat ti makiapa kadakayo....”
Nagsanud ni Dindo ngem tinengngel ti dua a kadua ni Rico.
“Ta apay? Kabaelamon ti makiapa kaniak?” Nagdisso ti gemgem ni Rico iti rupa ni Dindo.
Nagungor ni Dindo. Napigis ti bibigna. Nagaruyot ti dara.
“Por favor, Rico....” agpakpakaasin ni Dindo.
“Ammom nga awan ti asino man a mapalubosan a makisina ti bunggoytayo,” kinuna ni Rico. Ginammatanna dagiti pingping ni Dindo sa binistradna ti ngiwat daytoy. “Agikkatka iti trabahom!”
Makaluluan ni Dindo ngem saan a nagpadlaw. Saannan a kayat ti agsubli nga aglako iti droga. Kayatnan ti agbalbaliw. Kayatnan ti mangabaruanan. Namin-adun nga imbagana iti inana a liklikannan ti gang.
“Rico, pang—” saanna a naituloy ti nagsao ta pinarusokan manen ni Rico. Nakusbo. Nagtiritir iti sakit.
“Agikkatka iti trabahom, kunak!” Saanen a kiddaw no di ket bilin.
Nagsabat dagiti matada. Nakakarkarit dagiti mata ni Rico. Naturay.
Adun ti binaldado ni Rico. Sumagmamanon ti pinapatayna. Ket mangrugin nga agkutukot ti tumeng ni Dindo. Ammona a saandanto nga inggaan. Mabalin a papatayenda pay.
“Agsublika kadakami, comprende?”
Saan a simmungbat ni Dindo. Agpakpakaasi ketdi dagiti matana. Ngem asino ti lunagenna? Kas ken ni Rico a naigameren ti kinadakes iti entero a bagina?
“Me escuchaste? Nangegnak kadi?” dimmakkelen ti timek ni Rico. Pinaboksitanna pay naminsan ni Dindo.
Iti buteng ken sakit a nariknana, saan a napupuotan ni Dindo ti nagtung-ed.
“Bueno...” kinuna ni Rico. Tinapikna ti agsumbangir a pingping ni Dindo sa sineniasanna dagiti dua a kaduana a ruk-atanda daytoy. Induronda iti luganna. “Ammomon no sadino ti umayam no rabii no bigat....” Nagturongdan iti bukodda a lugan. Napaspasda a pimmanaw.
Nabati ni Dindo a maikulkuleng ken mangpaspasanaang iti ut-ot pay laeng ti buksitna. Pinunasanna ti agar-aruyot a dara iti nabtak a bibigna. Dina pay laeng malinteg ti takderna iti sakit ti buksitna.
Immanges iti nauneg. Kasano nga agsubli iti gang idinto nga inkarina iti inana a saanen a makibunggoy pay? Kayatna a baliwan ti nakiro a biagna. Kakaasi ti inana a mangisaksakad iti biagda. Adun ti nagarubos a lua ti inana. Pinanawanda ti nagulo ken nakurapay a biagda idiay Mexico ngem isu met laeng ti nagtungpalanda iti Amerika.
Ngem kasano a liklikanna ti gang? Papatayenda no agsalungasing iti pagayatan ni Rico. Awan ti pagpilianna.
Kellaat a nalagipna ni Ferdie. Ti ay-ayam ti gayyemna!
Uray no nasakit ti bagina, pinardasanna ti limmugan iti kotsena. Nangala iti tissue sa pinunasna dagiti dara iti bibigna. Kalpasanna, pinagandarna ket uray la a naganit-it dagiti ligay iti pardasna a rimmuar iti pagparkingan.
SCORE: Home: 0. Guest: 21
Nakadumogka a mangtaptapaya iti mugingmo. Addaka iti bench. Nabannogkan. Uray no ania ti aramidenyo, saankay latta a makapuntos. Katkatawaandakayo payen dagiti kalabanyo. Maibbongkayon!
Panagriknam, ad-addan pay a dimmuldog ti team-yo iti kaaddam. Mabainkan. Dimo payen taliawen da Walter ken Coach Devon. Saan gayam a nalaka daytoy nga ay-ayam.
Ket nalagipmo ni Dindo. Isu ti nangpilit kenka nga agay-ayam. Isu ti napalalo ti panagtalekna iti kabaelam. Naimula iti panunotmo ti ubbaw a panagtalek. Saan a daytoy ti lubongmo.
Ngem no saan a daytoy, ania? Agtalinaedka kadi lattan nga awan ti pagmamaayanna iti daytoy a biag? Wenno agtungpalkanto met laeng a mangalkalsada a kas kadagiti adu nga agtutubo iti North Las Vegas? Kumapponka iti gang? Agbalinka a bugaw. Aglakoka iti droga. Agtakawka iti lugan. Pumatayka wenno sika ti matay.
Agsansanaltekka a nagwingiwing. Tinaliawmo dagiti player iti tengnga ti football field, dagiti defensive player ti team-yo a marigatan a mangpasardeng iti pannakaidanon ti bola iti end zone.
“Fuck, what happened?” timek manipud iti likudam.
Am-ammom dayta a timek. Nagpusiposka. Naungaran ti riknam iti pannakakitam ken ni Dindo. Addan ti gayyemmo. Ngem ania ti isungbatmo?
“Apay a sero ti score-yo?” masmasdaaw a nagsaludsod ni Dindo.
Ngem napangangaka. Sabali ti matmatmatam, ti nabtak ken limteg a bibig ni Dindo.
“Ania ti napasamak kenka?” sinaludsodmo ket immasidegka ken ni Dindo.
“Ania ti mapaspasamak?” inulit met ni Dindo ti saludsodna. “You, guys, are wasted... You are supposed to be winning...”
Ginammatam ti agsumbangir nga abaga ni Dindo. “Ania ti napasamak kenka?” kinunam. Pinerrengmo.
“A-awan,” naalumamay a sungbat ni Dindo.
“Ania nga awan? Nabtak ‘ta bibigmo, sa ibagam nga awan?”
“Kunak la ngarud nga awan. Naidukmemak.” Inwalin ni Dindo ti takiagmo a nakaigggem pay laeng iti abagana.
“Ni Rico ti akin-aramid iti daytoy?” inuntonmo.
“Shit, kunak man no kabaelam daytoy nga ay-ayam?” kinuna ketdi manen ni Dindo. “Saankay’ man laeng a naka-score?”
Nakarurodka. Ginammatam manen dagiti abaga ni Dindo. Pinekkelmo dagitoy. Nairut.
“Ibagam... ni Rico ti akin-aramid iti daytoy? Ni Rico?” nupay nakapsut, nakatangtangkenen ti timekmo.
Kinitanaka ni Dindo. Ngem saan a naguni. Nakalim ketdi kadagiti matana ti buteng. Am-ammom ni Rico. Nadamdamagmon ti kinauyongna. Namin-adun nga imbaga ni Dindo kenka dayta. Namin-adun a naballaagan a saan a mabalin a makisina iti bunggoyda.
“Saanka a makibiang, Ferdie...”
“Let’s go find them!”
“This is not your war... let me handle it,” impakpakaasi ni Dindo.
Nangemkemka. “This is also my war... they messed up with you, they messed up with me.” Agtigergerkan iti rurodmo.
“Napatpateg ti ay-ayammo. Forget about Rico. Forget about me. I want you to focus. Concentrate on your game. This is your life. This is for you. Come on, saanmo a gandaten a tarayan daytoy a laban gapu laeng iti napasamak kaniak. Kayatko nga agsublika nga agay-ayam. Tell Coach Devon to put you on the defensive line! Stop those sons of a bitch before they embarrass the hell out of you guys!”
(Maituloyto)
