(MAIKA-16 A PASET)
INLEPPASKO nga umuna ti dadaitek a pantalon sakbay nga immakarak iti welding ken auto repair shop ni Tio Tante. Nadanonko a mangsuksukimat iti makina ti maysa a Pajero. Makumikom met dagiti tallo a katulonganna a welder, mekaniko, ken helper. Adu ti awatda a lugan a tarimaanen, dandani awan ti itiitan iti talier.
“Naimas man dagidiay insangpetmo a taraon idi rabii, kaanakan,” kinuna ni Tio Tante apaman a nakitanak. “Naggapuanna dagidiay? Inalmusarko itay ti dadduma.”
“Adda dinar-ayak a birthday party ti maysa a kaeskuelaak idi rabii, angkel,” inulitko ti pambarko ken ni Tia Caring. “Nagsobsobraan ti sagana, naitulok a yawidmi dagiti dadduma a makan....”
NOBELA: Bastardo (12)
“Kasta? Rinabii koma ngarud a kasdiay, aya?” inkatawana.
Sinakayak ti angawna. “Mabalin met, angkel,” kinunak. “”Suna laeng ta adda dakkel a problema.”
“Ania?”
“No rinabii nga ag-birthday daydiay nagkasangay idi rabii, angkel, rinabii met a manayonan ti tawenna. Bumaket a dina oras...”
Pimgaak ni Tio Tante. Namrayak laeng ti immisem.
Nakadlaw sa ti ulitegko ta pinabaringringannak a kinita. “’Gurayka man ketdi,” kinunana. “Sinapsapam sa ti immallatiw ditoy talierko,” kinunana. “Panagkunak, adda kayatmo nga ibaga kaniak.”
Nagkatawaak. “Bilibak a talaga kenka, angkel,” kinunak.
“Apay met?”
“Pudno daydiay atapko nga adda sixth sense-yo.”
“Ania a sixth sense?”
“Nonsense, Angkel!” inyangawko. Sa nagseriosoak idi pangkisannak a kitaen. “Daydiay galadyo a makaibaga iti mapasamak iti masakbayan ti kayatko a sawen. Napugtuanyo nga adda rantak kadakayo ita.”
“Pues, ania daydiay?”
“Di met adda kustomeryo ditoy talier a taga-LTO, angkel?”
“A, ni Mister Ludi Tamayo? Apay? Adda masapulmo kenkuana?”
“Adda ngarud, angkel. Agtulongak koma kenkuana a mangala iti driver’s license-ko.”
“Suerteka,” kinuna ni Tio Tante. “Luganna daytoy,” insungona ti Pajero a kutkutingtingenna ti makinana. “Kunana a dumagas ita ditoy. Ngem dina imbaga no ania nga oras. Di met adda lisensiamon nga agmaneho?”
“Awan pay ngarud, angkel.”
“Ania?” namulagatannak ti ulitegko. “Diamontreska nga ubing, wen. Sika pay met ti masansan a mang-road test kadagiti lugan ditoy. Kunak man no nakaalakan iti lisensiam idiay probinsia?”
“Saan pay ngarud, angkel.”
“Apay a dimo imbagbaga kaniak, diamontreska?”
“No diyo met damdamagen.”
Nakudkod ni Tio Tante ti teltelna. Intuloyna ti ar-aramidenna. “Bay-am ta no pudno nga umay ditoy ni Mister Tamayo, dakamatek kenkuana ti problemam. Kabayatanna, isaganaam metten dagiti masapulmo. Nasken nga agpirmaka iti application form. Siguro, tallo wenno uppat nga ID picture. Ken kangrunaanna, ti pagbayadmo.”
“Wen, angkel.”
Adda nagsardeng a lugan iti sanguanan ti talier. Expedition. Dimsaag ti maysa a lalaki, agarup panuroken nga uppat a pulo ti tawenna. Pangtayagen. Napudaw. Maibagay kenkuana nalabaga a T-shirt nga inasmangan ti dapuen a pantalon. Nasileng ti lalat a nangisit a Florsheim a sapatosna.
“Speaking of the devil,” inkatawa ni Tio Tante iti nakapsut a dinanggayak met.
“Senior Tante!” kinuna ti lalaki idi makaasideg.
“Mister Tamayo!”
“Ania ti damag?” dinamag ni Mr. Tamayo iti Tagalog.
“P’wede na ho ninyong ilabas ito bukas,” kinuna ni Tio Tante a nangisungo iti tartarimaanenna a Pajero. “Teka ho pala sandali. Hindi ho ba Ilokano rin kayo?”
“GI na GI, Senior Tante!” inkatawa ni Mr. Tamayo. “Taga-Santa Maria, Ilocos Sur-ak. Apay?”
“Malagipko man laeng, Mister Tamayo,” kinuna ti ulitegko iti Ilokano. “Daytoy kaanakak ti mangi-test drive itoy luganyo apaman a matarimaanko.”
“Ania ti naganmo, iho?”
“Reynaldo ti buniagko, sir. Ngem birbirngasandak dagiti am-ammok iti Romeo wenno Ardi,”
“Apay met a kasta?”
“Ditoy balay ken am-ammok, sir, Romeo . Ngem kadagiti girlfriend-ko, Ardi.” Inipusak iti katawa.
Nagkatawa ni Mister Tamayo.
“Agbasbasa iti kolehio daytoy kaanakak, Mister Tamayo. Malem ti serrekna.”
“Sige. Ania nga oras no bigat ngarud nga i-test drive-na ‘toy lugan?”
“Agarup siguro kastoy nga oras.”
“No sika ti mangi-test drive iti daytoy, Ardi, urayennak.”
“Sige, sir. Adda laeng bassit a problema.”
“Ania?”
“Awan pay ti lisensiak, sir.”
“Kasta? Ngem apay ngarud nga agte-test drive-ka no awan lisensiam?”
“Tured-pakinakem laeng, sir.”
“’Dino ti nakasursuruam nga agmaneho?”
“Idiay probinsia, sir. Idiay ngamin, masansan a di kasapulan ti lisensia no agmanehoka... basta naannadka la ketdi.”
Nagkatawa ni Mr. Tamayo. “Isu nga ita, kayatmon ti maaddaan iti lisensia?”
“Koma, a, sir, no matulongandak. Nasao ngamin kaniak ni Tio Tante nga empleadokayo ti LTO.”
“Okey, kastoy ngarud ti aramidem, iho,” kinuna ni Mr. Tamayo. “Kasapulanta ti ID picture-mo. Uppat a kopia.”
Nalagipko dagiti ID picture nga adda iti petakak. Inruarko dagitoy. Nayon dagitoy dagiti ID picture nga intedko iti unibersidad a sumsumrekak.
“Mabalin kadi dagitoy, sir?” Impakitak dagiti retrato nga iggemko.
Kinita ni Mr. Tamayo dagiti ID picture. “Mabalin dagitoyen,” kinunana. Kalpasanna, pinayapayanna ti drayberna a nakatambay iti asideg. “Anton, kitaem man ‘diay folder-ko idiay likud no adda application form para iti lisensia. No adda, ikkannak iti uray dua a kopia.”
“Wen, sir,” kinuna ti drayber.
Saan a nagbayag, addaytan ti drayber. Inyawatna dagiti papel nga iggemna ken ni Mr. Tamayo. Inusisana dagitoy.
“Fill up-am daytoy ita met laeng,” kinunana. ”No malpasmo, isublim kaniak tapno maikuyogko a dagus idiay opisina. Okey?”
“W-wen, sir!” diak mailemmeng ti ragsakko. Apagbiitko nga inleppas ti panang-fill up-ko iti aplikasion. Idi malpasko, pinalabsak nga umuna sakbay nga inyawatko ken ni Mr. Tamayo.
Inusisa ni Mr. Tamayo ti aplikasionko. “Okey daytoyen,” kinunana.
“E, sir, kaano kadi a maalak ti lisensiak, kas pagarigan?”
Immisem ni Mr. Tamayo. “Iti kastoy met laeng nga oras,” kinunana. “Itugotkonton ditoy no umayak no bigat.”
“Romeo,’” kinuna ni Tio Tante, “dimo liplipatan ti bayadmo, barok.”
“M-mano kadi ti damage-ko, sir?”
“Inton bigaten a pagsaritaanta dayta, iho. Ania, Tante... agsubliakto laengen no bigat?”
“Wen, Mister Tamayo,” kinuna ni Tio Tante. “Agyamankami iti tulongyo itoy kaanakak.”
Nagkatawa ni Mr. Tamayo. “Trabahok dayta,” kinnunana.
Uray idi nakapanawen, adda sungsungkaen ti utekko ti kinaasino ni Mr. Tamayo.
“Kasla dakkel man ti natugawan ni Mister Tamayo idiay opisinada, ‘nia, angkel?” kinunak ken ni Tio Tante. “Kunana nga isunton ti makaammo iti amin maipapan iti lisensiak. Ti imasna, ikuyognanto payen inton bigat.”
“Apay, barok?” pinabaringringannak a kinita ni Tio Tante. “Saan kadi nga imbaga ni Mister Tamayo no ania ti posisionna idiay Land Transportation Office?”
“Saan ngarud, angkel.”
“Isu ti hepe ti Licensing Division ti LTO!”
(Maituloyto)
