PINAGPASIARNA ti panagkitana kadagiti nagaarimutong a balbalay sa immulana iti bassit a balay nga adda iti di unay adayo iti ‘yanna. Nagulo daytoy a paset ti North Las Vegas ngem iti daytoy nga oras— agin-innagaw pay laeng ti sipnget ken lawag, sumagmamano laeng dagiti tattao a magmagna iti nailet a kalye nga agturong iti pagsadaan iti bus. Nupay adda iti uneg ti luganna a nakaparada, tumanaliaw no adda makitana a tao wenno lumabas a lugan gapu ta ammona a delikado ti kaaddana ditoy. Ayuyang ti adu a gang daytoy a lugar. Maibilang ditoy ti nadangkok a gang ni Rico.

Sisiimenna ti daan a bassit a balay nga iti sango daytoy, agkaiwara dagiti nagawangan iti serbesa, botelia ti no ania a mainum, aluminum a lata, plastik a naglamutan iti chips ken adu a rungrong ti tabako ken sigarilio. Nakaul-ulimek ti balay. Matmaturog siguro dagiti agyan dita.

Agar-arubos dagiti luana. Idi pay laeng rabii nga agsangsangit. Uray kayatna a teppelan, saanna latta a mapengdan. Mabuteng. Kabutengna ti dakes a mapasamak iti anakna.

Napukawnan ti asawana gapu iti gang. Nasapa a nipaidam iti anakna ti panangiwanwan koma ti maysa nga ama. Ita la ket ngaruden, nayaw-awan metten.

Maulit kadi manen ti napalabasna?

Nobela

NOBELA: Saan a Rosas Amin nga Ayat, Maria Emmanuelle (13)

Kinaemna dagiti bibigna. Saanen, nakunana iti nakemna.

Ginaw-atna ti tissue iti passenger’s seat. Siaannad a nangidapdap iti aglawlaw dagiti matana. Kinitana ti rupana iti rear view mirror sa inurnosna ti buokna. Nalesseb ken nalabaga dagiti matana ngem iti tawenna nga uppat a pulo ket lima, maanninawan pay laeng ti kinapintasna.  Adu ti agrayo kenkuana ngem liniklikanna dagiti lallaki.  Naituon ti panawenna ken ni Dindo nga anakna. Awanen ti sabali pay.

Ti anakna ti biagna.

Inlukatna ti ridaw ti luganna. Dimsaag sa inrikepna met laeng. Nakangngeg iti taul ngem dina ammo no sadino ti naggapuanna. Nagturong iti ridaw ti balay. Agkebbakebba. Ngem inakupna ti naan-anay a riknana.  Nagtoktok. Mariknana latta ti panagkutukot dagiti tumengna. Naguray. Kasla oras ti panagriknana kadagiti kanito nga aglabas.  Ngem awan ti nangilukat iti ridaw.

Nagtoktok manen. Napigpigsan. Nakangngeg iti dayamudom manipud iti uneg. Sinaruno dayta ti napigsa a suyaab, a sinaruno met ti kayaskas ken danapeg nga agturong iti ridaw.

Nailukat ti ridaw ket naibaskag ti nakauyos nga agkurkuridemdem a Mehikano.  Naka-boxer shorts. Maangot latta ti agat-arak a sang-awna.  Napunno dagiti takiag ken ti barukongna iti nagduduma a tattoo.

“Que paso, señora? What do you want? Cocaine... met... marijuana? Nakasapsapa...” indayamudom ti Mehikano. Makasursuron a nanglidlid kadagiti matana.

“Puedo hablar con Rico?” kinunana. Damdamagenna no mabalin a kasaritana ni Rico.

“Matmaturog pay laeng,” kinuna ti Mehikano sa minatmatan daytoy iti napigket.  “Hmmm, muy bonita... “

“Por favor, riingem. Nasken a makasaritak. Wenno ipannak iti kuartona,” impakaasina.

Immisem ti Mehikano.  “Babainaka ni Rico?”

“Saan, ngem kayatko a kasarita.”

Iniggaman ti lalaki ti shoulder bag-na. Situtulok a nangruk-at. Kinalkal ti lalaki ti bag a kasla adda sapsapulenna. Idi malpas, insublina met laeng ti bag. Sineniasan ti lalaki a sumrek ket nagabayda a nagturong iti maysa a siririkep a kuarto. Nagtoktok ti lalaki ngem awan ti simmungbat.

“Matmaturog pay laeng. Baliwamto laengen ti umay.”

“Nasken a makasaritak.” Ginammatanna ti seradura ket sakbay a malapdan ti lalaki, nailukatnan ti ridaw.

“Kayatmo ti matay?” nakapungtot ti lalaki. Ginammatan daytoy ti takiagna tapno iguyodna nga iruar.  Ngem isu met a nagareng-eng ni Rico. Agkurkuridemdem a nagmulagat.

“Apay? Matmaturogak!” imbugkaw ni Rico. Makasuron.

“Sorry, Rico... nagpilit a simrek daytoy a babai... Rummuarkamin...”

Linidlid ni Rico dagiti matana. Nagmulagat. Dimmakkel dagiti matana. “Espera!” kinunana. “Agurayka!”

Bimmangon ni Rico ket nagtugaw iti iking ti kama. Minatmatan daytoy. Mangrukrukod nga ikikita. Pagam-ammuan la ta ginammatan  ni Rico sa imbaltog daytoy iti kama.

Naklaat. Agikkis koma ngem nalmes dagiti balikasna iti barukongna. Nagkidem lattan ket nariknana ti pannakaingato ti blusana.

AGARUP timmaray ni Dindo a nagturong iti driveway. Sipapaspaska met a simmaruno. Limmugan ni Dindo iti kotsena. Inlukatmo ti passenger side ket limmuganka met. Bimmanerber ti lugan iti panagandarna, sa nag-backfire a kasla limmitog a lusis. Agtigtigerger pay daytoy ngem awan ti un-uniyo nga aggayyem. Nairuamkayon iti kastoy a kasasaad ti lugan. Ken saan a dayta ti pampanunotenyo. Ti linaon ti papel a natinnag iti datar:

Dindo, hijo,

Mapanak iti pagtaengan ni Rico. Risutek ti parikutmo. Kalpasan daytoy, saankanton nga agsubli iti gang ni Rico. Saannakanton a riribuken pay. Ti laeng kayatko nga ikariyo kaniak, ti panagbasayo. Isu laeng ti namnamayo a mangbalbaliw iti biagyo.

Mama

Adu a banag ti agsalsala iti panunotmo. No nagturong ni Mama Lupe iti pagtaengan ni Rico, agpeggad kadagiti ima ti nadangkok a lalaki.  No saan a patayen ni Rico, sigurado nga adda aramiden daytoy a di nasayaat.  Nupay nataenganen ni Mama Lupe, napintas pay laeng.  Mabalin a gundawayan ni Rico.

Immangeska iti nauneg.  Pinasikigam a kinita ni Dindo. Nakataltalna daytoy ngem ammom no ania ti pampanunotenna.  Ipatpategna ti inana ket dina met kayat nga adda dakes a mapasamak iti daytoy.

“She is gonna be okay, Dindo,” impatalgedmo. Ngem ammom nga agul-ulbodka. Uray sika, madanaganka.

Saan a simmungbat ni Dindo.  Nakatuon latta dagiti matana iti sango ti manibela, iti kalsada a taltaluntonenyo, kadagiti manggapun nga umadu a lugan. Ngem buybuyaem ti sikigan ti gayyemmo ket nakitam dagiti lua a nagkarayam iti pingpingna.

“Basolko... basolko,” nakaun-uneg ti naggapuan ti timek ti gayyemmo.  Mariknam pay ti pannakaalut-ot ti saem iti barukongna. “Diak la ketdi mapakawan ti bagik no adda dakes a mapasamak ken ni mama...”

“Awan ti dakes a mapasamakna...” impasingkedmo latta.

“Saanak a dimngeg iti balakadna... Nagbalinak a nasubeg.”

“Narigat ti mangliklik... maawatak ti kasasaadmo.”

“Natay ni Papi gapu iti ikakappengna iti gang. Ita, isu met laeng ti ar-aramidek. Apay a saan a mapugsat daytoy nga aramid? Saan kadi a maliklikan?”

Nagkidemka gapu ta ammom a saan nga agmaymaysa ni Dindo iti dayta a kasasaad.  Adun a padayo nga agtutubo ti naiwawa. Kas kenka, naganus ti panagpampanunotda. Agresiboda. Ngem dida ammo no umno ti ar-aramidenda. Paset dayta ti panagadal. Ti panagdakkel. Adda dagiti nasapsapa a makariing iti kinapudno. Agbalbaliwda. Surotenda ti nalinteg a dana. Ngem dagiti dadduma— wenno kaaduanna?— maikaranukon iti kinadakes. Maukomda iti dayta a lubongda. Saanda a makaliklik. Kas ken ni Dindo...

“Saan kadi a kunak a tulonganka? I want you to get out,” kinunam a sitatangken.  Ngem ammom a narigat dayta. Kasla imposible nga agballigi ti mangkontra iti gang ni Rico. Kasla bulsek ken tuleng dagiti pasurot ni Rico a nakasagana nga agtungpal iti ania man a pagayatan daytoy.  Ket sakbay a makagteng ken ni Rico ti asino man a komontra, nasken nga agdalan nga umuna kadagiti pasurotna. Narigat.

Napaangeska manen iti nauneg. Ta ad-addan a nagbalin a komplikado ti situasion iti pannakibiang ni Mama Lupe.

NAKATAKDER ni Leilani iti likudan ti natayag a sarming a diding. Buybuyaenna ti swimming pool, nga agarup kadakkel ti maus-usar iti Olympics, a puspusuakan ti medio nangato met a water falls. Makaray-aw ti panagsisinnukat dagiti nagduduma ti kolorna a silaw a pumsuak manipud iti uneg ti danum. Anian a sin-aw ti danum. Iti kinasalimuotna iti ruar, kasla kayatna ti mapan agdigos. Ngem rabiin. Kinitana ti oras iti relona, alas dies iti rabii.

Kasla saan pay laeng a mamati nga adda iti kasla mansion a pagtaengan ni Vhong. Mano pay laeng a bulan nga agam-ammoda? Ngem nagbalin a nakaas-asideg kenkuana ti lalaki.  Manipud daydi aldaw a napan iti studio daytoy tapno agaplikar a kas modelo, isun a mismo ti nangtaming kenkuana kadagiti rinabii a panagpraktisna. Saan nga intalek daytoy kadagiti taona. Nakaan-anus. Masansan a mapanda kadagiti nalalatak a restauran. Adu ti mapatpataliaw kadakuada. Ket iti kinalatak ni Vhong iti lubong ti panagmodelo, ad-adda met nga isuna ti nakaiturongan ti panagkita dagiti tattao.  Masmasdaaw. Ket sungbatan ni Vhong dagiti saludsodna kadagiti kanito nga addada iti uneg ti restauran.

“Adu ti maawis iti kinapintasmo,” umis-isem a kuna daytoy.

Lummabbasit met.

Ket ad-adda nga umisem ni Vhong. “Rumbeng nga agragsakka!” kunana.

“Mapataliawda gapu kenka, sir!”

Agtung-ed ni Vhong. “Mabalin... Ngem masulekda iti naidumduma a kinapintasmo.  Adun ti namalbaliwam. Kabaelamon nga ipagna ti high heeled a sapatosmo. Ken ti kinnim... nakasulisog, makagargari...”

“Ni sir, met...” Lumabbasit manen. Umanges iti nauneg ket mauyos ti isem iti kaunganna.

Nataer ni Vhong Ramirez. Nakayawan ngata daytoy kenkuana? Ngem agwingiwing met laeng. Nataengan unayen a para kenkuana ni Vhong.  Kasla amanan daytoy. Nakarikna iti bain.

Nagturong iti nalayus iti lawag a den. Tinangadna ti dakkel ken atiddog nga eskaparate a nakaurnosan dagiti adu a plake, estatua ken kasuratan ti pammadayaw iti kontribusion ni Vhong iti modelling industry iti Filipinas. Adda plakena manipud iti Professional Models Association of the Philippines (PMAP) ken nagduduma nga asosasion dagiti modelo. Adu pay dagiti retratona a naibisti a kaduana dagiti nalalatak nga artista iti pelikula ken dagiti mabigbigbig a tattao.

Pinagsawarna dagiti matana kadagiti ladladawan. Adda sapsapulenna. Ngem awan ti makitana.

Awan kadi ti babai iti biag ni Vhong?

“Nakitam ti sapsapulem?” timek manipud iti likudanna. Nagpusipos. Ni Vhong a nakaiggem iti dua a baso. Indiaya daytoy kenkuana ti maysa a baso.

“Soda laeng dayta.” Immisem ni Vhong.

Inawatna ti baso. Kinitana  ni Vhong. Apagapaman. Sa kinitana ti baso.  Linansad dagiti matana ti nagyan daytoy. Dina ammo no apay ngem mangrugin nga agtigerger dagiti imana. Ket umagibas latta manen ti napasamak kenkuana iti daydi rabii nga inikkan ti lalaki nga imbilangna nga ama iti droga ti ininumna a soda.

“Are you okay?” sinaludsod ni Vhong a nakadlaw iti apagapaman a panagtigerger ti ima ni Leilani.

Timmangwa ni Leilani. Immisem iti apagapaman. “Okey, sir... okey-ak laeng...” insungbatna. Nakisinnabat dagiti matana kadagiti dadakkel a nakangisngisit a bukel ti mata ni Vhong. Nakipinnaut Ngem naabak. Saanna a maturdan ti mangbatok iti kaunggan dagiti mata ti lalaki.

“Dimo pay sinungbatan ti saludsodko...”

“Saludsod?” Nagmalanga ni Leilani.

“No ania ti sarsarakem iti diding itay. Binuybuyaka kabayatan ti panangunormo a nangmatmatmat kadagiti ladawan...” kinuna ni Vhong. Simmimsim iti arak manipud iti basona.

“Ah,” nakuna ni Leilani a nagkatawa iti apagasngaw. “Kitkitaek laeng dagiti ladawam, sir... a kaduam dagiti nalalatak a modelo ken artista...”

“Laeng?”

Limmabbasit ni Leilani ta panagriknana ket kasla nasukalan. “Sir...” nayesngawna.

Intangad ni Vhong ti basona. Inibusna ti nagyan daytoy. “Saan ngata a ti sapsapulem ket ti ladawak a nakaterno iti abay ti babai a naka-wedding gown?”

Ad-addan ti labbasit ni Leilani. Saan a nakauni.

“Dika agdanag. Saan a sika ti immuna a nangaramid iti dayta. Amin a babbai nga inserrekko iti daytoy a balay, sapsapulenda dayta. Masmasdaawda.”

“Apay ngamin nga awan, sir?” saan a napupuotan ni Leilani dagita a balikas a nagtaud manipud kadagiti bibigna. Napatured ti nakemna iti kinaprangka ni Vhong nga agsao.

“Saanko pay siguro a nasarakan ti babai a kayatko nga ikasar...”

“Napilika siguro, sir. Nagadu a babbai ti aggusto kadakayo. Iti kinalatakyo, nalaka la koma a makasapulkayo.”

Immanges iti nauneg ni Vhong. “Awan ti makapagpitik iti pusok. Ken maysa, lakayakon,” kinunana sa immasideg iti balasang.

“Nalabes siguro ti kinangato ti pagrukodanyo iti maysa a babai, sir. Ken saan met a malasin ti edadyo. Ubing ti langayo,” in-inut a bimmassit ti timek ni Leilani ta umas-asideg ni Vhong kenkuana. Mariknana payen ti bara ti anges ti lalaki. Mariknanan ti iseseggar dagiti dutdotna.

“Saan met. Kayatko laeng ti manigurado. Ken maysa, iti daytoy a sasaadek, kaaduanna kadagiti babbai nga umasideg wenno agkalikagum kaniak, maymaysa ti puntiriada. Wenno dua... Fame and money.”

“Sabagay, sir. Narigaten no ti la adda ditan a masarsarakanyo...” Alusiisenen ni Leilani.  Nakakali dagiti mata ni Vhong kenkuana. Padpadasenna ti makipinnaut ngem awan ti kiredna.  Apay a kasta ti kinapigket ti panangkita ti lalaki kenkuana? Ngem saanen a damo daytoy. Namin-adun a nakitana ti panangmatmatmat ti lakay kenkuana. Apay nga ita laeng a mariribukan?

“Ngem panagkunak, nasarakakon ti babai nga inar-arapaapko...”

“Sir...” agtigergeren ti boses ni Leilani.

“Awagannak lattan iti Vhong...” kinuna ni Vhong. Siniketna ni Leilani.

“Sir... V-Vhong...” Marigatan payen ni Leilani nga agbalikas aglalo ket indennes ni Vhong ti bibig daytoy iti pingpingna. Simriam pay. Dina ammo ti aramidenna. Aggilapgilap ti napalabas iti panunotna ngem awan kiredna a mangiduron ken ni Vhong aglalo ket nairakusen daytoy ti takiagna iti siketna. Iti apagdarikmat, nagdisson dagiti bibig ti lalaki iti bibigna. Kasla nasul-oy ti aminna.  Nagkidem. Ket naglayag ti panunotna iti lagip a kayatna a lipaten.

Nagpatangken. Ngem aggubgubal ti riknana. Mariknana pay laeng dagiti nabara a bibig ni Vhong iti bibigna. Kayatna a riknaen koma ti sam-it ti agek ti maysa a lalaki.  Ngem sumalsallin ti napalabas. Ti pannakasagid ti amin a paset ti bagina. Ti sakit a nariknana, dagiti luana, dagiti pakpakaasina, dagiti ikkisna nga awan ti nakangngeg.

Induronna ni Vhong. Nagsanud. Kawaw ti rupana a nangkita ken ni Vhong a nabati met a kasla bulto. Saan a nakaasngaw. Nainsulto kadi?

“Sorry... Did I scare you?” nababa ti timek ni Vhong a nagsaludsod.

Napardas ti panagwingiwing ni Leilani. “Saan, sir. S-saan...”

“Saannak kadi a kayat?”

“Saan a kasta, sir... Ngem... adu ti dimo ammo maipapan kaniak...”

“Awan bibiangko iti dayta. Saan a napateg kaniak. I like you...”

“S-sir...” agarup saanen a makaasngaw ni Leilani. Kasla agkeppet ti aangsanna.

“I really care about you, Leilani... I love you...”

“S-sir...” Nakagat ni Leilani dagiti bibigna. Dina ammo ti sawenna. Nagaliston dagiti pasamak!

“And I wanna marry you...”

Ad-addan a saan a makapagsao ni Leilani. Ta ania koma ti ibagana? Agdudupudop ti riknana!

“Sir... no dimo tagirigaten, kayatko koman ti agawid...” nakarawana nga imbaga.

Naklaat ni Vhong. Nagkidem a nangapros iti rupana. Nalpay dagiti abagana. Limmabbasit kadi payen ti rupana? Nagadu a babbai ti agruknoy kenkuana.  Artista pay. Babaknang.  Nalalatak a tattao. Ngem daytoy a babai...  Awan ti naganna.  Saan nga am-ammo. Ngem saan a ginundawayan daytoy!

Imbulosna ti nabuslon nga angin a nabunnong iti barukongna.

Ngem napintas, naitanamitimna.

“S-sir, please... kayatkon ti agawid,” agpakpakaasin ti timek ni Leilani.

“Paitulodka iti driver-ko,” napardas a napidut ni Vhong dayta a balikas.  Ammona, saan a nasken nga apuraenna ti balasang a mangeddeng iti daytoy a kiddawna.

Nagwingiwing ni Leilani.  “Saanen, sir... agtaksiak laengen.” Timmallikuden.

“Awan ti lumabas a taksi ditoy,” kinuna ni Vhong. “It’s a gated community...”    Nagsardeng ni Leilani ngem saan a timmaliaw.

“Agur-uray ti driver-ko iti ruar. Itulnognaka iti sadino man a kayatmo a papanan.”

“Thank you, sir,” insungbat ni Leilani sa nagnan.

“Umaykanto agpraktis no rabii?” impakamakam ni Vhong.

“W-wen, sir,” naibingas ti panagduadua iti boses ni Leilani. Saan a timmaliaw, intuloyna ketdi ti nagna. Idi ilukatna ti ridaw, sinabat ti nasalimuot nga angin.

Nagsadag iti natayag a mohagony a ridaw. Tinangadna ti nangisit a langit. Gapu iti makapurar a lawag dagiti bombilia iti kalsada, awan man laeng ti anaraar dagiti sumagmamano a bituen. Immanges iti nauneg. Nagkidem. Ket nariknana ti irurukuas dagiti luana.

Nalagipna ti inana. Mailiwen iti daytoy. Kayatna a makita ken makasarita.

DI am-ammo ni Rico daytoy a babai. Ita laeng a makitana. Makasuron ngem ad-adda pay a kasuronna ti taona gapu iti panangipalubos daytoy a sumrek iti kuartona. Nabayagen a sisiimen ida dagiti kameng ti Las Vegas Metropolitan Police Department, ti Federal Bureau of Investigation, Drug and Enforcement Agency, agraman ti Bureau of Alcohol, Tobacco, Firearms, and Explosives ta kayatda ida a tiliwen. Ngem naannad ket saan a masagid dagiti pannakabagi ti linteg. Awan ti masagapda a pangigapuanda a mangtiliw kenkuana.

Mangemkemkem a nangipangato iti blusa ti babai agingga iti tengnged. Kinarawana ti likud ti bra daytoy. Pinadatana. Naggunay manen dagiti imana. Apagapaman a simgar ti dutdotna kadagiti naarikapna. Nagkulaidag ti babai ngem awan gaway daytoy iti pigsana. Awan ti naarikapna a waya wenno listening device iti bra daytoy.

Impapaba ni Rico a piniselpisel dagiti luppo ken gurong ti babai agraman ti pus-ong. Napakay-ot ti babai. Naggulagol iti isusupiatna ngem kaskasdi nga awan ti maaramidan daytoy iti pigsana.

“Asino ti nangibaon kenka?” naturay ken nabangag ti timek ni Rico. Sinakayanna ti babai.

“Awan,” insungbat ti babai.

“Ania ti masapulmo?”

“Adaywam ni Dindo...”

Dimmakkel dagiti mata ni Rico. Minatmatanna a naimbag ti babai a sinakayanna.  Nakangato pay laeng ti blusa daytoy. Naparammag ti nasippukel a barukongna a binungon ti nalamuyot a bra. Nataenganen ngem awan ti makitana a karenken iti boksit daytoy.  Makagargari pay laeng.

“Dindo Castellano?” inimtuod ni Rico.

Nagtung-ed ti babai. “Diak makaanges,” inreklamona.

Linamut manen dagiti mata ni Rico ti bagi ti babai. Napangirsi. Rinuk-atanna ti babai a nagdardaras met a bimmangon ken nangibaba iti blusana.

“Agpakpakaasiak kenka, Rico... palubosam koma ti anakko a sumina iti gang-yo...”

Nagkatawa ni Rico. Pimmidut iti sigarilio iti tokador. Dinardaras ti taona ti nangsindi babaen ti lighter. Ginammatan ni Rico ti takiag ti taona kabayatan ti panangammalna iti sigariliona. Impug-awna ti asuk iti rupa daytoy.

“Maminsan pay nga adda palubosam a sumrek iti kuartok, papatayenkan.  Maawatam?” inyungetna iti taona. Tinungpana daytoy.

Nagtigerger ti taona iti buteng. “Saanen a maulit, boss,” kinuna daytoy.

“Get the fuck out of here!” indil-ag ni Rico.

Nagdardaras ti taona a rimmuar ken nangirikep iti ridaw.

Sinango manen ni Rico ti babai.

“Cual es su nombre?” sinaludsod ni Rico ti nagan ti babai.

“Lupe...”

“Ania itayen ti kayatmo nga aramidek?”

“Palubosam ni Dindo a sumina iti gang-yo... “

Nagkatawa ni Rico. “Saanto a mapasamak dayta, Lupe... ammom dayta.”

“Por favor, Rico. Diak kayat nga adda dakes a mapasamak iti anakko. Agmaymaysana nga anakko. Natayen ti amana. Pangngaasim...” Linukatanna ti ig-iggamanna a bag sa adda kinautna.

Naalibtak ni Rico a nangiggem kadagiti ima ni Mama Lupe ngem nairuaren daytoy ti maysa a sobre.

“Para kenka,” kinuna ni Mama Lupe ket inyawatna ti sobre.

Inawat ni Rico ti sobre. Linukatanna daytoy sa inruarna ti sumagmamano a sagsasangagasut a doliar. Miningminganna dagiti papel de banko.

“Sangaribu a doliar...  Bayadko iti panangpalusposmo iti anakko.”

Naggarakgak ni Rico. “Daytoy laeng a gatad ti kaibatogan ti anakmo? Ania a kinalakanan!”

“Dayta laeng ti kuartak... Por favor...”

Saan a simmungbat ni Rico. Minatmatanna ketdi ti babai iti napigket bayat ti panangap-apirasna kadagiti imingna. “Talaga kadi a desperadoka a mapasublim ni Dindo?” sinaludsodna. Inasitganna ni Mama Lupe. Inyapirasna ti bukot ti dakulapna iti nalinis a pingping daytoy.

Nagsanud ni Mama Lupe. Manggapun a makarikna iti buteng. Ngem napanunotna, desperado a makaruk-at iti daytoy a gang ti anakna. Awanen ti pagsanudanna. Nakasagana kadi a mangipaay iti aminna maalawna laeng ti anakna iti gayonggayong ti kinadakes?

Immasideg ni Rico ken ni Mama Lupe. Indingpilna ti dakkel a bagina iti nalamuyot a bagi ti babai.

“Palubosam ni Dindo?” sinaludsod  manen ni Mama Lupe uray no agtigergeren ti bosesna.

“Down payment,” kinuna ni Rico. “Ti kuarta ken sika...”

Nagkarayam ti dakulap ni Rico iti barukong ni Mama Lupe. Napakiet ti babai ngem napakidem. Saan a nagkitakit. Simriam aglalo idi nagtungpal ti dakulap ni Rico iti pus-ongna.

(Maituloyto)