(MAIKA-18 A PASET)
ITI Makati ti nagturonganmi ken Tina. Kalpasan a nangaldawkami iti maysa a nalatak a restauran iti Makati Avenue, nag-shopping ni Tina. No mano a department store ti sinerrekmi. Siak ti para bitbit kadagiti ginatgatangna. Kawes. Alahas. Sapatos. No ania ditan a pagpapintas nga us-usaren ti babai. Nadumaduma a credit card ti inusarna.
Salsaludsodek met iti bagik: kastoy kadi a talaga ti kinabaknang daytoy a babai?
“Pasensiakan,” kinuna ni Tina kaniak. “Inaramidka a baggage boy.”
NOBELA: Saan a Rosas Amin nga Ayat, Maria Emmanuelle (17)
“Okey la'ng,” impatiray-okko met. “No kas kenka la ketdi ti kapintas, willing akong magpaalipin!”
Nasakit a keddel iti bakrangko, a dinanggayan ti nasam-it a katawa, ti insungbatna.
Iti maysa a department store a sinerrekmi, namrayak ti nangusisa iti record bar. Nakitak ti seksion dagiti kankanta nga Ilokano. Natiliw ti imatangko ti maysa a CD album ti maysa a kumakanta nga Ilokana.
“Napintas dagiti kankanta dita, sir,” kinuna ti adda met pamuyaan a sales girl a saan unay a napuskol ti make-up-na no idilig kadagiti dadduma a kaduana iti trabaho.
“Ilokanaka gayam, aya?”inyisemko.
“Wen, sir, Taga-Laoag-ak.”
“’Nia ti naganmo?”
“Manang Biday,” inkatawana. “Ti husto, Garvida. No awagandak ditoy, Vida.”
“Nice meeting you, Vida,” impatiray-okko. “Kadagiti amin a Manang Biday a naam-ammok, sika ti kapintasan.”
Kampay idi ket kinusilapannak ti kailiak a sales girl sa nagkatawa iti nakasamsam-it.
Pinasubokko iti daytoy ti CD.
No lumgak ‘diay init idiay daya
Malaglagipko ti inka ididiaya
Ta kaska man la ‘tay naipinta
Ditoy panunot nga agrayo kenka.
No mapagbalinmo a diamante
‘Diay bukel ti salamagi
Ay, wen, Manong, diakon agkitakit
A mangyetnag kenka ‘toy bagik
No mapurosmo adu a bitbituen
Kas kasukat’ ‘toy puso ken nakem
Ay, wen, Manong, uray dikan agar-arem
Siakon mangibaga kenka a sikat’ ay-ayatek
No masukdalmo naslag a bulan
Kas ikoronam kaniak a pagdatonan
Laglagipem a sikan ‘tay kapatgan
Ditoy biagko inggat’ kanibusanan
No matiliwmo atap nga alimuken
Kas iregalom kaniak nga abalbalayen
Wen, manong, sikan ‘tay innak suroten
A pakitumpongan ken kapimpinnunganen
Ngem no awan matungpalko
Kadagitoy a yar-areng-engko
Sapay koma ta awan basbasolko
No daytoy ayat ikitakitko
Binayadak ti CD kalpasanna.
“Agsublikanto manen, sir, wen?” inyisem ti salesgirl. “Bareng no addanto manen magustuam a CD nga Ilokano.”
“Sigurado nga addanto manen magustuak inton agsubliak, Manang Biday,” kinunak. “Ket saanto laengen a CD ti gatangek.”
“Ania, sir?”
“Gatangekton dayta pusom,” inkiddayko. “Bayadakto iti ayat dayta ayatmo.”
“Alla, ni sir!” insipat ti salesgirl iti abagak. ”Ti la ibagbagana!”
“Apay, saanmo a patien?”
“Dayta ngarud ti rigatna, sir... amangan no patiek!”
“Saan, dimo patien... ta isu ti pudno!”
Nagkatawa manen ti salesgirl sakbay a timmallikud. Insursurotko ti panagkitak iti napudaw a lakkona. Daytoy laeng ti Ilokana a di nangisit dagiti sikona, nakunak iti nakemko.
Agarup alas saisen iti sardam idi malpas ni Tina nga ag-shopping. Napno ti compartment, ken uray ti akinlikud a tugaw, ti kotse, kadagiti ginatgatangna.
“Grabeka gayam no ag-shopping-ka,” kinunak. “Dandani gatangem ti sibubukel a department store!”
Nagkatawa laeng ni Tina. “Dayta ti serbi ti kuarta,” kinunana. “Ken... never mind about my shopping. Kastoyak a talaga...”
“Agawidtan?”
Kinitana ti relona. “Rabiin,” kinunana. “Mangrabiita pay...”
Iti maysa a restauran iti Macapagal Boulevard ti nangrabiyanmi.
“Nabo-bore ako sa bahay,” kinuna ni Tina bayat ti pannanganmi. “Ibig kong, mag-relax muna bago tayo umuwi. Hindi ka pa ba pagod?”
Nagkatawaak. “Saan pay met,” kinunak. “No sika ti kaduak, ganggannaet ti pannakabannog kaniak. Awan ti mabannog a lalaki iti napintas a babai a kas kenka.”
“He, nag-umpisaka na naman!” kineddelna ti bakrangko. “Kanina ka pa, a. Parang ibig ko nang maniwala sa mga bola mo!”
“Dayta laeng ti maibagam nga assetko,” kinunak. “Ang marunong mambola.”
Manen, kineddelna ti bakrangko. Iniggamak ti dakulapna. Ne, saanna a linapsut. Mayat sa ketdi, aya?
“Ano ngayon ang gagawin natin?” inamadko.
“Gaya ng dati,” kinunana. “If you don’t mind. Let’s go barhopping!”
“You’re the boss!”
“Agpakadaka ngaruden ken ni Tia Caring.”
NANGRUGIKAMI kadagiti night spot iti aglawlaw ti Macapagal Boulevard. Sumrekkami iti maysa, uminumak iti beer idinto a margarita ken ni Tina, agsalakami no dadduma (isu ti ad-adda a mangguyod kaniak iti dance floor), awan ti pilpilienna a tokar. Naparagsit. Sweet. Balse. Ken no ania ditan. Agpautkami dita iti awan pay maysa nga oras, rummuarkami tapno sumrekkami man met laengen iti sabali. Kasta a kasta ti napasamak agingga idi umakarkami iti Makati.
Addakami iti dalan nga agpa-Makati idi adda malagip ni Tina.
“Di met adda ginatangmo itay a CD?”
“Adda.”
“Patokarem man ketdi.”
“Amangan no saanmo a maawatan.”
“Bakit?”
“Mga awiting Ilokano ang nilalaman ng CD.”
“Basta patokarem.”
Tapno awan ti masaona, insubok ti CD iti stereo player ti kotse.
Diak kayat a pagkasaran
‘Tay sibil a mapirmaan
Kaykayatkonto ‘diay simbaan
No magna marupikaran.
No siakto ‘tay agasawa
Piliekto ‘tay adut’ kuartana
Makadominggonto ti padaya
Maawisto amin a kaarruba.
Ket inton agkasarak
Balbaliwakto ‘toy pustorak
Agpaligpaligto ‘toy abagak
Agkinnikinninto pay ti pannagnak.
Inton agawidakon
Kakuyogto ‘tay pito ken tambor
Agpalingpalingto a kas dalluyon
Agkinnikinninto ‘pay ‘toy patong.
“Napintas!” kinunana.
“Apay, naawatam”?
“Wen, a!”
“Kasano a naawatam?
“Hindi mo natatanong,” kinunana, “Ilokana ti sigud a yayak. Maysa daytoy a kanta ti lullabye song-na kaniak. Taga-Sudipen, La Union ni Nanay Trining.”
Sanay nga uminum iti nasanger ni Tina. Ngem siak, agpatinggaak laeng iti maysa a serbesa kada klab a serkenmi. Diak kayat ti sibabartek nga agmaneho.
“Ano ba sa mamaya?” dinamagko. “Ihahatid ba kita sa inyo?”
“Ako ang maghahatid sa iyo.”
“Kung gayon, saanka koma nga unay nga uminum,” kinunak. “Ikaw na ang magmamaneho mamaya.”
“Sanay na akong magmaneho, kahit na ako’y nakainom,” inkatawana.
Mangrikriknaak. Apay ngata a dina kayat nga itulodko iti balayda?
(Maituloyto)
