(MAIKA-14 A PASET)
AGARUP alas siete iti sardam idi dumsaagak iti linuganak a para pasahero a dyip iti asideg ti refreshment parlor iti asideg ti unibersidad a pagbasbasaan ni Tina. Idi sumrekak iti parlor, nakitak a nakatugaw iti maysa a bassit a lamisaan iti suli. Pinayapayannak.
Inasitgak.
“Nabayagka kadin?”
NOBELA: Bastardo (11)
Immisem. “Saan met,” kinunana.
Nagtugawak iti sangona. Ngem saankami a nagbayag. Rimmuarkami met laeng kalpasan ti sumagmamano a kanito.
Minulenglengak ni Tina. Simple laeng a maris-rosas ti spaghetti blouse nga insuotna, naka-jeans iti apagisu ti kipetna a maong. Awan ti ania man a pagpapintas nga inaruatna, malaksid iti apagapaman a lipistik ken makaay-ayo ti ayamuomna a bangbanglo a kasla banglo ti ilang-ilang. Pamudawen ti lengngesna, adda napino a kuentas iti tengngedna a nabitinan iti sinampuso. Apagisu ti sippukel dagiti barukongna a bumagay la unay iti simmansanniket a siketna.
Apo Dios, nakunak iti nakemko. Pudno a napintas daytoy a babai iti laksid ti kinasimplena. Daytoy daytay kinapintas a kunkunada a rumbeng laeng nga ikabil iti pedestal.
Manutsutil ti isem ni Tina. “Apay a kasta ti panangmulenglengmo kaniak?”
“Mabatbatombalaniak iti pintasmo,” kinunak. “Ken kua... kasla nakitkitaka idin. Diak la matandaanan no sadino...”
Nagkatawa. Kineddelna ti rabaw ti dakulapko iti rabaw ti lamisaan. “Intan,” kinunana. “Amangan no maalun-onnak pay dayta panagkitam kaniak!”
“Papananta?”
“Mabisinakon,” kinunana. “Agbirokta iti mabalinta a panganan.”
Timmakder ni Tina. Iniggamak ti kanigid a sikona idi rummuarkami iti refreshment parlor. Saanakon a nagsaludsod pay. Basta simmurotak lattan.
Simrekkami ti inaladan ti unibersidad a pagbasbasaanna.
“He’s my companion,” kinunana iti security guard.
“Good evening, sir,” inkablaaw ti securfity guard a babai a nagsaludo pay.
“Ania ti aramidenta ditoy?” kinunak ken ni Tina.
“Kukunin natin ang kotse ko,” kinunana.
Nagtaruskami iti parking lot. Saanak a nakatagari idi makitak ti kotse ni Tina. Kabaruanan a BMW a nakusnaw nga asul. Automatic transmission.
Saan a gagangay a babai daytoy, nakunak iti nakemko.
“Ammom ti agmaneho?” dinamag ni Tina kaniak.
Iti sidong ni Tina, siak ni Ardi. Ngem iti sidong ni Mania Emmanuelle, siak ni Romeo. Kasla aggargarawak iti dua a lubong iti dua a birngasko.
“Ammok bassit,” kinunak. “Idi addaak pay idiay Ilokos, napadasak ti nagmaneho iti dyip ti maysa nga ulitegko no kasta a panawen ti birhinia. Adda talier ti ulitegko a pagkaskaseraak. Sagpaminsan, siak ti mangti-test drive kadagiti makumpunina a lugan. Dyip, kotse ken four-wheeler a babassit a trak. Ngem awan pay lisensiak....”
“Apay?”
“Idiay probinsia ti nakasursuruak nga agmaneho,” kinunak. “Sadiay, masansan a dimo kasapulan ti lisensia no agmanehoka.”
Napaisem ni Tina ngem saan a nagtagari.
Nagturongkami iti D. Macapagal Boulevard. Inserrek ni Tina ti BMW iti parking lot iti sango ti maysa a restauran a kukua ti maysa a nalatak a singer a babai.
Sinabatnakami ti maysa kadagiti waitress a naka-kimona dress iti narangrang a maris. Manmano pay laeng kadagiti lamisaan ti okupado. Adda maysa nga entertainer a lalaki nga agtoktokar iti organ iti pideg ti counter.
“Kayo pala, ma’am!” inkablaaw ti waitress. “Good evening po!”
“Good evening din,” kinuna ni Tina.
Intulodnakami ti waitress iti maysa a lamisaan iti maysa a suli. Pinagtugawnakami. Inikkannakami ti waitress iti saggaysakami a menu card.
Adda immmasideg a naka-Barong-Tagalog a lalaki. Inyam-ammo daytoy ni Tina kaniak a kas manager ti restaurant.
“Ikkannakami ti drinks, Tony,” kinunana iti naka-Barong Tagalog.
“Kas iti sigud, ma’am?”
“Yes.”
“Kayo po, sir? Ano’ng drinks ninyo?”
“No ania ti order ni Tina, isu metten kaniak.”
Tinung-edan ti nakabarong Tagalog ti waitress a dagus met a nagtungpal. “Yegmo a dagus ditoy,” imbilin daytoy.
“Opo, sir.”
“Mag-oorder na kayo, ma’am?”
“’Nia ti kayatmo, Ardi?” dinamag ni Tina idinto nga us-isisaenna dagiti potahe a linaon ti menu card.
Alusiisinenak nupay diak kayat nga ipadlaw. Ania koma ti kayatko? Ita laeng a makastrekak iti restauran a kas iti daytoy. No diak pay ammo ti kayat a sawen dagiti awag dagiti taraon a nakalista iti napuskol a menu card.
“Makaammokan,” kinunak. “No ania ti maipuspusom a kanen, isu metten ti maipuspusok...”
“Ania ti kayat a sawen dayta?”
“What it means,” imparimrimko, “our taste are compatible. Your taste buds and mine are the same.”
Naglibbi. “You’re pulling my leg,” kinunana. Sa nagkatawa. “Sige, bolaennak latta... bareng no mamatiak!”
Nagkatawaak met. Ngem iti kaunggak, adda danag a mangdandanog iti barukongko. Kasanon no siak ti agbayad iti makanmi? Amangan no saan a makaaanay ti adda iti petakak. Apo Dios!
(Maituloyto)
