APAGDATENGYO iti kalye a ‘yan ti pagtaengan ni Rico, nakitayo a dagus ti kotse ni Mama Lupe. Kinitam ni Dindo. Nakudrep ti rupana. Maibagasam ti kaririknana gapu kadagiti urat a timmaud iti pispisna. Ngem dimo kayat nga agaramid iti dinudursok. Ammom no kasano ti kinadakes dagiti tao ni Rico. Amangan no imbes a ni Mama Lupe laeng ti maisagmak, mairamankayo pay ken Dindo.
“Adda ditoy ni mama,” natangken ti timek ni Dindo. Insardengna ti lugan iti sango ti balay, iti igid ti kalsada.
“Diak kayat nga agdarasudoska. Sumrekta ngem masapul a tenglem ti riknam,” impatigmaanmo ken ni Dindo.
“No adda dakes a napasamak ken ni mama, diak maikari,” kinuna ni Dindo. Nangmesmes. Mangur-urat dagiti gemgemna. Ngem kasano nga isarangetna dayta a gemgem kadagiti nagtagiarmas a pasurot ni Rico?
Nagabaykayo ken Dindo a nagturong iti balay ni Rico. Tumanaliawka— kanigid, kanawan, likud ken sango ti balay. Tinangadmo dagiti sumagmamano a security camera. Ammom a nakitadakayon dagiti adda iti uneg.
NOBELA: Saan a Rosas Amin nga Ayat, Maria Emmanuelle (14)
Apagtoktok ni Dindo, nailukat a dagus ti ridaw. Sinabatnakayo ti uksob a nabisked a lalaki a namurumoran iti tattoo ti bagina. Umis-isem daytoy.
“Por que, Dindo? Eres tan temprano. No fuiste a la escuela?” kinuna ti lalaki. Damdamagen ti lalaki no apay a nasapa ni Dindo ken no apay a saan a simrek iti eskuela.
“Sadino ti ‘yan ni mama?” kinuna ketdi ni Dindo. Natangken ti timekna. Ginandatna ti sumrek ngem dinagdagus a ginammatan ti lalaki.
“Alto!” ngimmato ti timek ti lalaki. “Ditoyka laeng! Ania kadi ti kayatmo?”
“Ni mama!” Nagwagteng ni Dindo ngem nairut ti panangtengngel ti lalaki.
“Awan ni mamam ditoy. Agawidkan.” Induron ti lalaki ni Dindo.
Ngem saan a dimngeg ni Dindo. Inwagsakna manen ti imana. Nakaruk-at. Simrek iti balay. Simmurot ti lalaki. Simmurotka met. Nagtaray ni Dindo a nagturong iti nakarikep a kuarto. Ngem napardas ti lalaki. Nagammatanna ti kuelio ti bado ni Dindo. Ginuyodna sa inaklilianna ti tengnged ti gayyemmo.
“Agawidkan,” naturay ti agbambanang-es a timek ti lalaki, “sakbay nga adda dakes a mapasamak kenka.”
Ngem naggulagol ni Dindo. Nasikona ti agong ti lalaki ket nakaruk-at. Inarikap ti lalaki ti agongna. Agdardara. Nakitam ti panagminar ti rurod iti rupa daytoy. Intag-ayna ti takiagna.
“No siak ti sika, saanko nga ituloy dayta,” natibong ngem naturay ti timekmo. No agdisso ti gemgem ti nakabisbisked a lalaki iti rupa ni Dindo, malulo la ketdi ti rupa ti gayyemmo.
Napasardeng ti lalaki. Tinaliawnaka. Mangrukrukod ti ikikitana kenka. Nagkusipet dagiti matana. Nagkatawa sa nagngirsi. “Ulitem man ti kinunam?” kinunana.
“Nangngegnak,” kinunam a nakataltalna. Iti panagkunam, kabaelam ti lalaki ta nupay ub-ubingka nga amang, dakdakkel bassit ti bagim.
Nagkatawa manen ti lalaki. Inibbatanna ni Dindo sa immasideg kenka. “Siak ti balballaagam?” kinunana. Kasla kumilaw dagiti matana ngem saanka a nagpaabak. Nariknam ti isasallukob ti panagpangngadua iti rupa ti lalaki.
“Datay’ laeng a tallo ti adda ditoy, saan kadi?” kinunam nga awan pulos panagbuteng a naibinggas iti timekmo. Liningaymo ni Dindo. Nakanganga daytoy a mangbuybuya kadakayo iti lalaki.
“Asinoka kadi ta kasla kalkalainganka nga agsasao?” sinaludsod ti lalaki. Nakasaganan dagiti gemgemna.
“Saan a nasken no asinoak. Ti napateg, maammuanmi no adda ditoy ni Mama Lupe... Dayta laeng.”
“Ket no ibagak nga awan? A saanko nga am-ammo dayta a Mama Lupe?”
“Agsawarkami.”
“Nalastogka!” Nadagsenen ti timek ti lalaki. Nagsubli ti rissik kadagiti mata daytoy. “Pumanawkayon sakbay a diak makapagteppel!”
“Saankami a pumanaw, amigo, no dimi makita ti gagarami...” impettengmo.
“Awan ditoy!” naikiraud ti timek ti lalaki. “Ken saanka a gayyem!”
“Adda iti sango daytoy a balay ti kotse ni Mama Lupe isu a masiguradok nga adda ditoy...” kinunam manen.
“Hijo de puta! Immub-ubinganka ngem no agsasaoka, kunam no asinoka! Panagkunam, adda mababaelam kadakami?” imper-ak ti lalaki sa sipapardas a nangibulos iti danogna.
Nagling-ika. Limmaw-as ti danog ti lalaki. Ad-addan a nasemsem daytoy. Pinasarunuanna iti kanigid a danog. Nagkummogka. Law-as manen. Induronmo ti lalaki. Naparusisi. Ad-addan ti pungtotna. Dimmarup manen ngem pinasabtam iti napigsa a danog. Nagdisso ti gemgemmo ti subsobna. Napaatras. Sinagidna ti ngiwatna, ti nabtak a bibigna. Adda inruarna a napuri a ngipenna. Sumsumgiaben dagiti matana iti pungtot.
Kinitanaka ni Dindo. Masmasdaaw latta a mangbuybuya kenka. Kas iti panagsidsiddaawna idi insalakanmo iti panangdangran kenkuana dagiti uppat a nabibisked nga agtutubo iti uneg ti pagbaludan. Daydi kasla awan aniamanna a panangpadsom kadagitoy.
Ngem natennebkan iti ranget!
Nagmaymaysaka iti nailet a lubong a nakaipadpadam kalpasan ti panangipaampon kenka ti ipatpategmo nga inam, iti lugar nga awan man laeng ti arapaapmo a makatan-ay. Sangapulo laeng ti tawenmo idi rugian ti “amam” nga Amerikano ti mangmolestia kenka. Agburburek ti daram kenkuana. Ngem mabutengka. Ket kadagiti kanito a malpasnaka a sagiden, rummuarka. Agtarayka a mangpanurnor iti nawatiwat a desdes a nangbeltak kadagiti kataltalonan ti Omaha, Nebraska. Paspasam ti agtaray. Agingga iti dandani mapukawmo ti angesmo. Agsardengka iti katengngaan ti nalawa a katriguan. Sadiay danogdanogem, gurnugurnotem, ken kugtakugtaram dagiti dandanin maapit a trigo. Ket inton maungaranka, sumangpetka ket agbuyaka kadagiti pelikula a karate. Inidolom ni Bruce Lee. Ni Jackie Chan. Ni Chuck Norris. Ni Steven Seagal. Aduda. Ket iti garahe ti balayyo, iti bassit a gym ti amam, nag-weight lifting-ka. Bassibassit. In-inut. Agingga a kabaelamon nga i-bench press ti nasurok a tallo gasut a libra. Timmangken dagiti takiagmo. Dimmakkel dagiti maselmo. Ket no mapalaluan dagiti kapatadam wenno in-inauna bassit ngem sika ti mangkarit kenka, tutopam ida. Nairuamka a makikabil. Tinuladmo ti gunay dagiti paboritom a karatista. Pelikula laeng ti nakakitaam. Ngem naduktalam a makatulong ket inan-anusam a pinalinis. Ta iti kaunggam, agsagsaganaka a makigubat. Plinanom no kasano a maputedmo ti panangmolmolestia ti amam kenka.
Natawanka idi mariknam ti napigsa a danog a nagdisso iti boksitmo. Inappupom ti buksitmo bayat ti panagtiritirmo gapu iti sakit a nariknam. Napasanudka pay. Ngem sipapardas ti lalaki a simmurot kenka ket addayta manen ti gemgemna. Insanggam ti kanigid a takiagmo. Sa timmayab ti kanawanmo. Nagdisso iti tengnged ti lalaki. Napaatras daytoy a mangtengtengngel iti tengngedna. Agtultulakak. Pinasarunuam iti kugtar. Napaatras manen. Ngem saan a nabaltog. Ig-iggamanna pay laeng ti tengngedna ken agtultulakak.
“Isunan!” Napasardengka iti naturay a timek a sinaruno ti lanitek ti naikasa a paltog.
Liningaymo ti naggapuan ti timek. Uksob a nabisked a lalaki. Namurumoran ti barukongna iti batek a kabubuddakan ti dakkel a beklat a nakaammal iti ulo ti tao. Am-ammom daytoy. Nakitkitam idin. “Rico...” naitanamitimmo.
“Ania ti mapaspasamak?” kinuna ni Rico.
“Ni mama,” insungbat ni Dindo. “Kayatko a maammuan no sadino ti ‘yan ni mama...”
“Nagpilitda a simrek, Rico,” kinuna met ti lalaki a mangap-apros pay laeng iti tengngedna.
“Shut up, Sergio!” imbugkaw ni Rico.
Isu met a nakitam ti iruruar ni Mama Lupe iti kuarto. Ur-urnosen daytoy ti nakunes a blusana. Nagtibbayoka. Kellaat a naikuadro iti lagipmo ti langa ti inam no kasta a rummuar idi iti kuartona, wenno iti banio, a kaduana ti maysa a lalaki. Nangmesmeska.
Nagtaray ni Dindo a nangarakup iti inana.
Umasidegka koma met ngem pagam-ammuan la ta nanalpaak iti danog ti pispismo. Nagsakiten. Naulawka pay. Simleng ti panagkitam. Immulo a dagus ti daram.
Liningaymo ti naggapuan ti danog. Ni Sergio nga agdardara pay laeng ti subsobna. Dimmanog manen ngem siniggawatmo ti pungopunguanna sa tiniritirmo ti takiagna. Binagkatmo sa imbaltogmo iti datar. Nanabtuog a napadata. Nagangek pay. Sinakayam. Dinanogdanogmo ti rupana. Nagsardengka laeng idi mariknam ti nalamiis a banag a naideppel iti ulom.
“Tumakderka!” Naturay ti timek ni Rico.
Timmakderka. Sinangom ni Rico a nakaiggem iti paltog a sipapaturong iti rupam.
“Mano ti tawenmon?” sinaludsodna.
Kinusilapam.
“Mano ti tawenmo, kunak!” imbugtak ni Rico. Makaunget a talagan. Ngem saanka a nagkir-in.
“Anak ti— natangkenka a talaga, aya...” Nasiputam ti panangirut ni Rico iti panangiggemna iti paltog.
“Eighteen!” inyagaw nga insungbat ni Mama Lupe. Pagarupem a nakitana met ti panagkuti dagiti ramay ni Rico.
Minatmatam ti wangawangan ti paltog a napaiturong kenka ngem awan latta pangilasinan ti panagamak iti rupam. Nabayagen a kinaay-ayammo ni patay. Kalpasan ti inar-aramid kenka ti “amam,” awanen ti panagamakmo iti uray ania a mapasamak. Awanen ti serserbi ti biagmo. Bayanggudawkan iti daytoy a lubong. Awanan ina. Awanan ama. Maysaka a bastardo!
“Saysayangem ti laingmo... Ania ti naganmo?” Ni manen Rico.
“Ferdie...” ni manen Mama Lupe.
“Ferdinand Washington... Genuine Filipino,” inkiraudmo pay ti panagsaom.
Nagkatawa ni Rico. “Magustuak man ti panangipannakkelmo iti kina-Filipinom.”
“Gapu ta idaydayawko ti nagtaudak a puli. Filipino-ak.”
“Hijo de—” Nasingakayo iti riaw ni Sergio. Liningaymo. Nakaiggem iti paltog daytoy. Inkasana ti paltog sa impaturongna kenka. “I’ll kill you, son of a bitch!”
Immangeska iti nauneg a kasla gagangay laeng ti mapaspasamak. Napardas ketdi ti kanigidmo a nanggaw-at iti pungopunguan ni Sergio, ginammatan met ti kanawanmo ti paltog sa inakkalmo. Kalpasanna, impennekmo nga insiko ti rupana. Napadata daytoy iti datar. Agar-aruyot ti dara manipud iti agongna.
Impaturongmo ken ni Rico ti paltog a naagawmo ken ni Sergio. Naklaat ni Rico ngem kas kenka, awan man laeng ti maibuksilan a panagbuteng iti rupana.
“I could kill you right away.” Bangbangir ti isemna.
“Kastaak met. Agpadata a matay,” kinunam.
“Awan ti matay,” insengngat ni Mama Lupe. Nagtakder iti nagbaetanyo ken Rico.
Naklaatka iti tured ni Mama Lupe a bimmallaet idinto a nabati ni Dindo nga agtigtigerger nga agbuybuya.
Awan ti nagkir-in kadakayo ken Rico. Agpada a nakapaturong dagiti paltogyo iti tunggal maysa kadakayo. Ngem madamdama bassit, imbabam met laeng ti paltog nga iggemmo. Imbaba met ni Rico ti paltogna.
“Vamos a la casa.” Agawidtayon, kinuna ni Mama Lupe. Iniggamanna ti dakulapmo. Kasla nariknam ti dakulap ti bukodmo nga ina.
Indissom ti paltog iti lamisaan a bassit iti asidegmo.
Nagaabaykayo a tallo — sika, ni Dindo ken ni Mama Lupe— a nagturong iti ridaw.
“You haven’t heard nor seen the last of me, Ferdie!” impakamakam ni Rico. “I know I’ll see you again.”
Saanka a simmungbat. Awan met ti timmaliaw kadakayo a tallo.
DADAKKEL dagiti anges ni Rico. Napalaus a pungtotna. Kasla saan pay laeng a mamati iti napasamak. Immanges iti nauneg sa ginammatanna ti timid ni Sergio a nakataltalna a nakamattideren iti sangona. Lumtegen ti bibig daytoy ken bimmalayen dagiti dadduma a dara iti rupana. Agar-aruyot pay laeng ti dara iti agongna.
“Ania ti klasem a badigard?” imbugkaw ni Rico.
“P-perdoname, boss... Saanton a maulit pay,” naalumamay ti timek ni Sergio.
“Ubbingda! Ubbingda laeng!” inridis ni Rico.
“Napigsa, boss...”
“Shut up!” imbugkaw manen ni Rico. “Ket ania ti serbi ti patinayon a kaaddam iti gym? Awan la kadin ti dinalanna?”
“Boss...”
“Kunak nga agulimekka! Diak kayaten a mangngeg ti timekmo.” Makapungpungtot ni Rico a nagpagnapagna. Sumagmamano a kanito ti napalabas, inasitganna ni Sergio. “Dumngegka...” kinunana. “Ammuem ti amin a maipapan iti daydiay a Ferdie.”
“W-wen, boss...”
“Diak kad’ kuna a diak kayat a mangngeg ti bosesmo? Dumngegka laeng!”
Nagtungtung-ed ni Sergio a mabutbuteng. Binuybuyana laengen ni Rico nga agdaydayamudom.
“Saan a kas kenkuana nga ubing laeng ti makabael a mangsaranget kaniak...” Dinanog ni Rico ti diding.
PINAGSINNUBLATMO a kinita dagiti agina. Adda iti likud ti manibela ni Dindo idinto nga adda ni Mama Lupe iti abayna. Addaka a nakatugaw iti likud. Makatitileng ti ulimek iti nagbabaetanyo. Mangngeg pati ti panagangesyo, a singaen laeng ti ilalabas ti sumagmamano a lugan. Addakayo pay laeng iti igid ti kalsada, iti sango ti balay ni Rico.
“Maladawtan iti eskuela, Dindo,” panangburakmo iti ulimek. Ngem ammom nga awan iti panunot ni Dindo ti eskuela ita.
“Mama, ania ti napasamak iti uneg?” nagraed ti timek ni Dindo. Ngem makaunget.
Saan a simmungbat ni Mama Lupe.
“Mabainak iti inaramidmo, mama... mabainak...” Napait ti timek ni Dindo. Dinanogna ti manibela.”
“Inaramidko para kenka... Nawayakan. Saannakan a riribuken pay ni Rico. Saankan nga agsubli iti gang-na...” Agarubosen dagiti lua ni Mama Lupe.
“Ania ti sukatna, mama?”
“Itedko ti biagko no isu laeng ti pamuspusan tapno maispalka.” Nagsaninglot ti baket. “Diakon kayat a mapasamak pay ti kas iti napasamak iti amam, iho. Saanen...” Linukatanna ti ridaw ti lugan. Rimmuar.
Saan a nakauni ni Dindo.
“Inkayo idiay eskuela. Isu laeng ti namnamayo a makalung-aw iti daytoy a biag...” Tinaliawnaka ni Mama Lupe. “Ferdie, stay out of trouble. Napeggadka met nga ubing... Go to school...” Inrikepna ti ridaw.
Naungap dagiti bibig ni Dindo. Nalabit nga adda wenno adu pay dagiti kayatna nga ibaga iti inana ngem nairikepen ti ridaw. Ken immadayon ni Mama Lupe.
Immangeska iti nauneg.
Napeggadka met nga ubing, naitanamitimmo ti insawang ni Mama Lupe kenka. Ammom dayta, ta kas ken ni Dindo, nayaw-awanka met. Adda kenka no kayatmo a balbaliwan ti biagmo.
NAKATAKDER ni Rico iti batog ti na-laminate a tawa iti salas. Nalawag a makita iti ruar ngem saan a makita ti adda iti ruar ti uneg. Nairanta a kasta tapno awan ti makaammo nga adda iti tawa. Buybuyaenna dagiti taona a nakatugaw iti sidiran ti alad. Agmatmattider iti luganda dagiti sabali. Agiinum dagiti dadduma.
Nagrupanget. Namin-adun nga imballaagna kadagiti taona ti saanda a panaginum agingga iti dida malpas dagiti rumbeng nga aramidenda. Ngem narigatda a maisuro. Nailasagen dagiti dadduma ti arak. Saanda a mapengdan ti bagida nga aginum.
Nagsennaay. Nakaun-uneg ti panangsusopna iti sagariliona. Agkawkawikaw ti asuk nga impug-awna.
Madamdama bassit, nariparna ni Sergio a nagsardeng iti sango. Bimmaba daytoy iti luganna. Sinaruno dagiti dua pay a kaduana.
Nakaanges iti nalukay. Isuda ti padpadaananna. Adu ti kayatna a maammuan ken ni Sergio... maipapan ken ni Ferdinand.
Nangngegna ti pannakailukat ti ridaw iti sango. Nagturong iti den. Umababan ti sigariliona. Indupudopna daytoy iti ash tray. Nagtugaw iti lamisaanna.
“Adda kenka dagiti impormasion a kasapulak?” kinuna a dagus ni Rico apaman a makastrek dagiti taona iti den.
“More than you need, boss,” insungbat ni Sergio. Indissona ti iggemna a dakkel a brown nga embelop iti lamisaan ni Rico.
“Ania daytoy?” Nakasuron ni Rico a nangkita iti embelop. Tinangadna ni Dindo a nakatakder iti sangona. “Diak kayat ti agbasa. Ibasam kaniak.”
“Pasensiakan, boss...” impadipensar ni Sergio. Dinagdagusna a pinidut ti sobre. Linukatanna.
“Anything interesting?” sinaludsod ni Rico.
“Barrairong nga ubing, boss. Nayanak idiay Filipinas. Inampon ti maysa a puraw iti Omaha, Nebraska. Sadiay, bin-ig a riribuk ti biagna. Assault. Detention at school. Expulsion... Nagallaalla. Tunggal siudad a papananna, adda rekordna. Pannakikabil... Kasla agbirbirok iti riribuk.”
“Hmm...” nayesngaw ni Rico.
“Simmangpet iti Las Vegas duan a tawen ti napalabas... “
“Dagiti dadakkelna?”
“Natay ti amana. Ngem ti nakakaskasdaaw, addaan iti sealed record.”
“Ania ti kayatmo a sawen?”
“Naserraan a criminal record... gapu ngata iti kinaubingna pay bayat ti pannakapasamak ti krimen.”
Pinidil ni Rico ti timidna. “Ania pay ti natakuatam?”
“Football player iti Las Vegas High School...”
“Nalaing?”
Nagtung-ed ni Sergio. “Adu ti mangdaydayaw kenkuana... uray no nabiit pay laeng nga agay-ayam.”
Napaisem ni Rico. Nagrimat pay dagiti matana. “Siimenyo ta bisitaentayo iti kabiitan a panawen. Adda pakasapulak kenkuana...”
KAMKAMATEM ti angesmo. Kalkalpasmo laeng a nagtaray. Saanmon a matandaanan no namin-anon a linawlawmo ti oval. Dimo payen ammo no mano a minuto wenno oras a nagtartarayka. Nakatakderka ita iti tengnga ti oval a mangtangadtangad iti nasipnget a tangatang a namurumoran kadagiti agrimatrimat a bituen. Kasla kidkidmatandaka. Ngem nagrupangetka. Nabayagen a limmidem ti biagmo. Panagriknam, awanen ti bileg ti ania man a bituen a mangparaniag pay.
Immangeska iti nauneg ta nalagipmo ni Mama Lupe. Saan latta a mapunas iti panunotmo ti pannakakitam iti iruruarna iti kuarto ni Rico. Nakapatpatak latta iti panunotmo ti panangpulpulinglingna iti sayana, ti panangurnosna iti nakunes a blusana ken ti panangap-aprosna iti rupana. Buya a mangpalangto iti lagipmo ti bukodmo nga ina.
Nagkidemka. Dimo kayat a panunoten nga inlako met ni Mama Lupe ti bagina tapno laeng maakkalna ti anakna iti nakaisalungsongannan a gang.
Liningaymo ni Dindo a nakadumog a mangur-uray kenka iti bleacher. Ammom, mariribukan iti inaramid ti inana. Namin-adu nga impeksana dayta kenka itay bigat.
Nagturongka iti pagtugtugawan ni Dindo. Nakadumog pay laeng. Saan a limmingay uray no ammom a nadlawna ti yaasidegmo. Immabayka a nagtugaw. Insadaymo ti kanigid a takiagmo iti abagana sa inawidmo. Situtulok a nagsanggir iti abagam. Nalablabesen ngem maysa a gayyem ti langenlangenyo. Imbilangmon a kas kabsat.
“Cheer up, dude!” kinunam. Kayatmo a ray-awen.
Intangwana ti rupana. Dagiti tugot ti lua iti pingpingna ti nakitam.
“Basolko,” nakaal-alumamay ti timekna.
“Ammok. Ngem saan a nasken a babalawem ti bagim iti agnanayon. Ti napateg, naamirismo a nagbiddutka.”
Immanges iti nauneg ni Dindo. “No apay a saanak a dimngeg kenka idi... Naidumdumaka unay a gayyem.”
“Dimo laeng ammo, ngem ad-adu nga amang ti naimbag a nakem nga utangko kenka. No awanka, diak ammo no sadino ti nakaisadsadsadak. Ken diak ammo no sibibiagak koma pay laeng ita. Gapu kenka, naikkanak iti gundaway a mangilinteg iti biagko...”
“Mapanunotmo dagita ngem dimo mapanunot a naminduan nga insalakannak? Siak a dimo kaan-ano. Idinto a siak, diak man laeng ammo nga isalakan ti bukodko nga ina...”
“Saantan a pagsaritaan dayta. Everything is gonna be okay. Mamatika kaniak,” kinunam ket inirutam ti sallabaymo ken ni Dindo. Ngem ammom nga ad-adda a nagbalin a komplikado ti amin. Nakasangdomon ti gang ni Rico. Ammom nga addan gandat daydiay nga agibales.
Saan a nagtimek ni Dindo. Ngem simmimbeng ti panunotmo. Ta mariknam, agtaleken a mamimpinsan kenka ti gayyemmo.
“Agawidtan, rabiin,” kinunam.
Timmakderkayo. Ngem saankay pay a nakaadayo iti bleachers, kellaat a naiddep amin dagiti silaw iti playground. Nagtaltalangkiawkayo. Ngem nasipnget. Awan ti makitayo a sabali a tao iti uneg ti playground. Pagam-ammuan, nangngegyo ti pannakaulod ti rehas a ruangan ti playground. Limmingayka. Walo a dadakkel nga agtutubo ti agturong iti ‘yanyo. Nabibiskedda. Natatayagda. Aglanglangada a football player.
(Maituloyto)
