NAGKINNITAKAYO nga aggayyem. Mailangaam latta ti nakaro a panagbuteng ni Dindo. Piniselmo ti abagana. Pangpakiredmo iti nakemna. Ngem ammom a saanmo a mapagtalna ti pan unotna. Mariknamon ti panagtigergerna. Uray sika, agduaduakan no kabaelam daytoy.
Waloda. Dadakkelda. Sabalin a ranget daytoy, no ranget ti sapsapulenda.
Impalawlawmo ti panagkitam. Awan makitam no di sipnget. Anaraar laeng ti lawag manipud kadagiti pangadaywen a silaw kadagiti poste ti mangsilsilaw kadakayo. Makitam ti barut nga alad a nanglawlaw kadakayo. Ngem awan ti pagruaran malaksid iti simrekan dagiti walo a lallaki.
Nagsawar manen dagiti matam. Awan ti uray ania a mabalinyo a gammatan a pangsalaknibyo iti bagiyo.
“Hola, Ferdie...” inkablaaw ti kadakkelan kadagiti lallaki nga umas-asideg kadakayo. Am-ammonaka. Nangnangngegmo metten dayta a timek. Ngem saanmo a masinunuo no asino ti akintimek.
NOBELA: Bastardo (10)
Sinaggaysam a kinita dagiti pito pay a nanglawlaw kadakayo.
“Sergio, ania ti kayat a sawen daytoy?” pagammuan la ta nagtimek ni Dindo.
Isu pay laeng ti pannakaamirismo, iti pannakaisiray ti rupa ti lalaki iti aragaag ti silaw manipud iti poste, a ti lalaki a nakalabanmo iti balay ni Rico ti kadakkelan. Ti lalaki a pinusim ti ngipenna. Ti lalaki a binettakmo dagiti bibigna ken pinagdardaram ti agongna.
Saan ngata pay laeng a nagbuteng iti inaramidmo kenkuana?
“Saanka a makibiang. Agpaigidka laeng,” imbilin ni Sergio ken ni Dindo.
“Ania ti masapulyo?”
“Ni laeng Ferdie.”
Nagwingiwing ni Dindo. “Nalawag ti saritaan. Inted ni Rico ti pammalubosna kaniak a sumina iti gang. Awan ti kalinteganyo iti daytoy.” Immasideg ken ni Sergio. “Awagak ni Rico. Saanna nga ipalubos daytoy.”
Ad-addan a nakapungtot ni Sergio. Induronna ni Dindo. Naiparusisi sa napatugaw ni Dindo.
Naklaatka. Ngem ammom a mapasamak dayta. Nalupoy ni Dindo.
Apagapaman a nagsabat dagiti matayo ken Sergio. Sika ti immuna a nagbaw-ing. Nagdardaraska a nagturong iti nakaitublakan ni Dindo. Pinatugawmo daytoy.
“Saankan a makibiang,” kinunam. Iniggamam ti agsumbangir nga abaga ti gayyemmo. “Don’t even get up.”
Pinerrengnaka ti gayyemmo. Iti aragaag dagiti silaw dagiti poste, makitam nga agmarabasan dagiti matana. “I’m sorry, Ferdie...” Nakapuy ti timekna.
Immisemka ngem nalab-ay. “Don’t,” kinunam. “Don’t be sorry...”
“Basolko... I’m trying to change our lives. Ngem tunggal kayatko nga aramiden, ad-adda met a maikursongta iti peggad. Idi koma pay la ngamin a dimngegak kenka.”
Piniselmo ti abaga ni Dindo. “I’ll handle this... saanka a makiraman.” Timmakderka. Sinangom ni Sergio sa liningaymo dagiti sabali pay a pito a taona a nanglawlaw kenka. “Mano con mano, Sergio... duata laeng. Saan a nasken a mairaman dagiti kakaduam.”
Nagkatawa ni Sergio.
“Come on, amigo! Ipakitam kadagiti taom a kabaelannak a maymaysaka.”
Pimmigsa ti katawa ni Sergio. Sineniasanna dagiti kakaduana.
Dimmarup ti maysa iti sikigam. Maysa a right straight ti binulosanna. Nagling-ika. Binitogmo iti babaen ti paragpagna. Nakusbo a kasla nakapukawna ti angesna. Ngem pagammuan la ta nariknam ti napigsa a kugtar iti bukotmo. Napakiadka. Dika pay nakapagplastar, maysa met a danog ti nagdisso iti pangam. Nakakinkintal ti panagdissona ket nagkulalanti pay ti panagkitam.
“Ferdie, iti likudam!” inriaw ni Dindo.
Sipapardaska a nagpusipos. Ngem kellaat a dimmarup ti sabali pay. Intibabmo ti puon ti dakulapmo iti timid ti lalaki. Napatangad a naganikki. Pinasarunuam iti muay thai kick— napardas ti panagpuligosmo a nangiwasiwas iti sakam iti saka daytoy. Nanabtuog iti daga.
Maysa pay ti dimmarup. Tinublakmo pay daytoy. Ngem waloda a kalabanmo. Makadua wenno makatallo a danogka ngem agsasaruno met dagiti danog ken kugtar nga agdisso iti bagim. Natangkenka. Saanmo nga ipalubos a matumbaka. Ngem mariknamon ti panagkapuymo. Mangrugin a kumali ti sakit iti bagim. Uray no kasano ti panangsalaknibmo iti bagim, adda latta sumrek a danog.
“Stop it! Stop it!” kasla arasaas laengen iti panagdengngegmo iti pukkaw ti panagpakpakaasi ni Dindo.
Agingga a napuntaan ti pispismo. Nagkuy-os ti tianmo. Nagkulalanti pay ti panagkitam. Kasla nambaanka a nanabtuog iti karuotan. Ti kanawan nga abagam ti immuna a nagdisso. Nangngegmo ti kasla pannakaligsay ti suopmo.
Ngem bimmangonka. Simmubbotka. Ngem law-asen dagiti danogmo. Maysa pay a napigsa a kugtar ti kimmali iti buksitmo. Napateppapka. Maulawkan. Ngem inkarigatam ti timmakder.
“Ferdie, don’t get up! Stay down!” kasla dardarepdep ti panagdengngegmo iti riaw ni Dindo.
Ngem saanka a dimngeg. Timmakderka. Sinabat ti napigsa a danog iti rusokmo. Bimmaleska. Napigsa pay laeng ti danogmo ngem kasla saanen nga iginggina dagiti kalabanmo. Nakalaklakan ti pananglisida kadagiti kugtar ken danogmo. Kasla slow-motion-en ti garawmo.
Pagammuan la ta adda nanglengnges kenka. Kalpasanna, pinagsaggaysaanda a binitibit dagiti takiagmo. Immasideg ni Sergio kenka ket impakaw-itna iti paragpagmo ti gemgemna. Nangngegmo ti kasla panagrittuok dagiti tulangmo. Natukkoldan sa matten!
“Daytoy ti paginlalaingmo?” kinuna ni Sergio ket maysa manen a napigsa nga straight ti nagdisso iti rupam. Natulidka ngem adda pay laeng puotmo. Nagkaradapka. Kayatmo ti tumakder. Ngem nariknam ti pannakakugtar manen ti barukongmo. Nagtiritirka iti sakit. Napasarunuan pay ti kugtar. Manen. Ken manen. Manggapun nga agpukaw ti panagdengngegmo iti panagpakpakaasi ni Dindo ken agsipngeten ti lubongmo.
AGTUGTUGAW nga agmaymaysana iti sango ti nagtimbukel a lamisaaan. Naipigket ti panagkitana iti nakarikep a ridaw a pagtaktakderan ti nagtagi-armas a babai a guardia. Padpadaananna ti iruruar ti inana dita. Makabulanen a saanna a nakita daytoy. Mailiw. Napnuan iti iliw.
Pagam-ammuan, nagmalanga. Kasla nagballasiw ti panunotna iti sabali a panawen. Malagipna manen daydi panangbagsolna ken ni Ronaldo iti namin-adu a daras. Pinatayna. Kayatna nga alawen ti naidadanes a dayawna. Ngem inako ti inana ti basolna. Isu ti nagtungpal iti pagbaludan. Isu ti agikarkaro iti krimen a saanna nga inaramid.
Dina lattan nalapdan ti panagarubos dagiti luana.
“Leilani, anakko...” naragsak wen mail-iliwan ti timek a nangsinga kenkuana. Ti inana.
Timmangad. Timmakder. Inarakupna ti inana. “Mama...” nayesngawna. Riniknana ti bara ti arakup ti inana. Napinon ti bagi daytoy.
“Komustaka, anakko?” Tinengngel ti inana ti agsumbangir a takiagna. “Adun ti dimmakkelam... Nakapimpintaska!” kasla arasaas ti timek daytoy.
Minirana met ti inana. “Adun ti kimmuttonganyo...”
“Dinak pakadanagan, anakko. Kabaelak daytoy.”
“Saan koma a rumbeng a sika ti...”
“Saan a ti la sasawem...” imputed ti inana. Nakapsut ken naturay ti timek daytoy ngem napnuan panangigigir. “Saan pay laeng a mamati dagiti pannakabagi ti linteg a siak ti nangpapatay ken ni Ronaldo. Atapenda latta a sika...”
“Saanmo koma ngamin nga inaramid daydiay, ‘ma. Bareng koma no na-dismiss ti kaso iti rason a self-defense.”
“Nasaysayaat a siak ti agsagaba ngem sika, anakko. Dita met ammo no kasta koma ti nagtungpalanna. Ammom metten ti kinabulok ti hustisia iti pagiliantayo...”
Saanen a nagrason ni Leilanie. Apagapaman met a nagulimek ti inana.
“Komusta ti panagsanaymo a modelo? Okey met laeng?”
Immanges iti nauneg ni Leilani.
“Adda problema?” magagaran ti inana a nagsaludsod.
“Ur-urayek laengen ti umuna a panagparangko iti runway...”
Nagrag-o ti inana. “Naragsakak, anakko. Maipagpannakkelka iti daytoy. Ngem apay a kasla mariribukanka?”
Minatmatan ni Leilani ti inana.
“Ibagam kaniak, ania ti problemam?”
Immanges iti nauneg ni Leilani. Kasla nangukkon iti makaanay a kiredna. “Ni Vhong, ‘ma...”
“Ti instructor-mo? Ginundawayannaka met?” insippaw a dagus ti inana.
“Saan, ‘ma. Saanna a maaramid dayta.”
“Ania ngarud ti parikutmo?”
“Ay-ayatennak kano... ken nakasagana a mangikasar kaniak.”
Napamulengleng ti inana. Minatmatan daytoy. Sa kinuna daytoy: “Ay-ayatem kadi?”
Isuna met ti naikuleng iti apagapaman. Sa nakisalip ti imatangna kadagiti mata ti inana ngem simmuko. Nagsala dagiti matana iti aglawlaw— kadagiti padana a simmarungkar kadagiti naibalud nga ipatpategda iti biag. Sa naglayag ti panunotna ken ni Vhong. Nataer ni Vhong. Pagrukrukbaban ti adu a tao. Baknang. No isu ti maasawana, saannanton a parikut pay ti pangalaanna iti kanenna. Nasaliwanwanto ti biagna. Nalatakto a runway model. Daydayawendanto met.
Ngem lakayen ni Vhong.
Nakamuttaleng met ti baket a mangmatmatmat iti anakna. Naidumduma ti kinapintas daytoy. Iti laksid dagiti trahedia ti biagna, iti panangtallikud ti amana, iti panangrames ti lalaki nga imbilangna a bukodna nga ama, saan a naawanan iti namnama. Sikikired a nangsango iti masakbayanna. Inakemna ti biagna a kasla awan ti rigat a nagpasaranna.
“‘Ma, nangngegnak kadi?” sininga ti timek ti anakna.
Saan latta a nakaasngaw ti baket. Nangin-inut ketdi a nagarubos ti luana. Sumaleksek manen iti lagipna ti ama ti anakna a nangtallikud kadakuada.
“Saanka nga umanamong?” nalab-ay ti timek ti anakna.
Pinerrengna ti anakna. “Nakasaganaka kadin?” ti balikas a nagaon kadagiti bibigna.
Nakipinnerreng kenkuana ti anakna. “Natalingenngento ti biagko, ‘ma... Saantanton a sublian ti kinarigat ti biag. Saantanton a panunoten no kasano ti panagbiagta...”
“Ayat… Ammom kadi dayta a balikas? Ay-ayatem kadi? Kunam a kasla amamon...”
“Ayat...” dinagullit ti anakna. “Kitaem ti napasamak kenka, ‘ma... ti napasamak kadata. Inay-ayatmo unay ti amak. Intedmo amin a riknam kenkuana. Insadagmo amin nga arapaapmo kenkuana.
“Ania ti napasamak? Pinanawannata, ‘ma. Tinallikudannata. Saan man laeng a nagpakada. Basta nagpukaw lattan. Ania a klase ti ayat dayta? Awan kuentana.”
Kasla adda nagtukel a nagserra iti barukongna. Mababalawna kadi ti anakna no kasta ti paniriganna iti biag? Ngem... “Isu pay laeng ti amam. Saanmo a liplipatan dayta,” timmangken ken timmuray ti timekna.
Nagwingwing ti anakna. “Uray no surat laeng ti pakomusta, awan man laeng ti naawatta...”
Ad-addan a nagarubos dagiti lua ti baket. “Diak la kayat a maulit dayta iti biagmo, anakko... Diak kayat a pagbabawyamto met... Ken maysa, ubingka pay.”
“Sangapulo ket walokon, ‘ma...”
“Ubingka pay unay a sumrek iti biag a naestaduan.”
“Ngem talkek ni Vhong... Mariknak, saannakto a baybay-an... ta talaga nga ay-ayatennak. Mariknak dayta. Ken maysa, isu laeng ti makatulong kaniak iti panagballigik nga agbalin a modelo.”
“Anakko, diak ammo ti sawek. Mabutengak...”
“Ti laeng pammalubosmo ti kasapulak, ‘ma. Mamatika, husto daytoy nga ar-aramidek.”
MAUL-ULAWKAN. Nakasaksakiten ti sibubukel a bagim. Daradara ti rupam. Mapukpukawmo payen ti puotmo. Ngem nagkaradapka pay laeng. Kayatmo ti bumangon. Kayatmo ti lumaban. Awan kenka ti sao nga isusuko. Ngem addayta manen a nagdisso ti maysa pay a nakintal a kugtar iti paragpagmo. Nagkietka. Rittuok kadi ti natukkol a paragpagmo ti nangngegmo?
Ngem saanka a nagasug. Ammom, awanen kiredmo. Saanmon a kabaelam ti makiranget, ti mangsalaknib iti bagim. Agsipngeten ti lubongmo ngem saanka a nagasug.
“That’s enough!” nakaturturay ti nangngegmo a timek. Uray no kasla aggapu iti kaungam, kabesadom dayta a timek.
Narabsut ti badom. Napadataka. Agkulkulalanti dagiti bituen iti law-ang. Wenno dagiti laeng matam? Nakasipsipnget ti tangatang.
“Sayang laeng ti kinalaingmo a makiranget, Ferdie,” kinuna ti naturay a timek.
“Rico...” Nagkuti dagiti bibigmo ngem ammom nga awan simngaw a timekmo.
Kinemkemmo dagiti sangim, saan a gapu iti rungsot no di ket gapu iti sakit a mariknam iti entero a bagim. “Addanto met tiempom kaniak...” kinunam ngem kas iti damo, saan a simngaw ti timekmo.
Nangngegmo ti panaggarakgak ni Sergio. “Mangipangpangtan sa pay! Saanen a makakunail ngem nalastog pay laeng!”
Pinunggos ni Rico ti kuelio ti badom. Inyasidegna ti rupam iti rupana. “Dumngegka, dagmel... no saan a gapu kaniak, sigurado a bulbulluendakan dagiti taok. Ngem saanko nga ipalubos dayta. Kasapulanka pay laeng. Nangngegmo?” imbugkaw ni Rico.
Kawaw dagiti matam a nangmatmat ken ni Rico.
“Saanka pay a nalpas kaniak. Ngem no matungpalmonto ti kalikagumak, palubosanka nga agbiag. No saan,” nagkatawa, “dakes ti mapasamak kenka!” Timmakder. “Let’s go boys!” kinunana. Immunan. Sinaruno ni Sergio ken dagiti taona. Nabatikayo nga aggayyem. Sakbay a napukawmo ti puotmo, napuotam ti panangsaklot ni Dindo iti ulom. Kasla mangmangegmo ti saibbekna... ken wangwang a dimo ammo ti paggapuanna.
SAAN a makaidna ni Dindo, pagna a pagna ken no manen matmatanna ni Ferdie: ti suero a nakakapet iti takiag daytoy, dagiti adu a garadgad iti rupa, ti napettak ken limteg a bibig, ken dagiti mata daytoy a ngimmisit ti lawlawna. Maasian unay iti gayyemna. Naimbag ta segun iti doktor, awan met laeng ti natukkol a tulang daytoy.
Masmasdaaw ketdi. Ita laeng nga adda nakaparukma ken ni Ferdie.
Nupay kasta, saan a naksayan ti panagrukbabna iti gayyemna. Intakder daytoy ti dayaw ken kalinteganna.
Immanges iti nauneg ta nalagipna manen ni Rico. Pinalubosan daytoy a sumina iti gang daytoy. Ngem ammona, a ramaten ni Rico ni Ferdie a mangpasubli kenkuana.
Nangemkem. Nasikap a talaga ni Rico.
Nailukat ti ridaw. Naklaat ni Dindo. Nagpusipos a timmaliaw. Naibaskag iti ridaw ti inana. Maimaymayeng daytoy. Kasla estatua a nakakita ken ni Ferdie a nakaidda iti kama. Immakar kenkuana ti panagkita ti inana.
Nagtigerger dagiti dakulap ni Dindo. Saan nga immawag iti balayda idi rabii. Saaanna nga impakaammo ti napasamak kadakuada. Mabuteng a maammuan ti inana ti napasamak.
Immasideg ti inana iti kama. Iniggaman daytoy ti dakulap ni Ferdie. Pinisel daytoy ti ima ti gayyemna. Naregreg dagiti lua ti inana. Inarakup ti inana. Nairut. Nagsangit.
“Sorry, mom... saanka nga inawagan ta diak kayat a madanaganka...” nakapsut ti timek a nagaon kadagiti bibig ni Dindo.
“’Sino ti akin-aramid iti daytoy?” nakasimsimbeng a saludsod ti inana.
Naimayeng ni Dindo. Dina ammo no kasano ti kabayagna.
“Nangngegnak, iho? Asino ti akin-aramid iti daytoy?” inulit ti inana ti saludsodna. Iniggaman daytoy ti agsumbangir nga abagana. “Nakitam no asino ti akin-aramid?”
“M-mom... nakasipsipnget...”
“Awan a pulos ti nalasinmo kadagiti nangdangran ken ni Ferdie?”
Nagwingiwing ni Dindo.
“Saan a ni Rico?”
“Saan, mom... saan,” nakaparpardas ni Dindo a nagulbod.
“Iho, pangngaasim... saanka nga agulbod kaniak.”
“Saan, mom. Talaga a saanmi a nalasin dagiti nangdangran kenkuana.”
“Apay nga awan man laeng ti sugatmo?”
“Isu laeng ti pinuntiriada, mom.”
“Sadino ti nakapasamakan daytoy?”
“M-mom, nakaad-adu a saludsodmo...”
Apagisu met a mailukat ti ridaw. Napataliaw dagiti agina. Ni Coach Devon ken dua a polis ti dimteng.
GINUNAYMO dagiti ramaymo. Padpadasem nga igaraw dagiti sakam ngem kasla nailansada. Naut-ot. Ket agkarayam dayta nga ut-ot iti pakabuklam no kasta a gandatem ti aggunay ti bagim. Mariknam pay ti ut-ot ti barukongmo.
Inin-inayadmo ti nagmulagat. Makapurar a silaw ti naipasabat kenka. Nasisirapka. Nagkiraykirayka agingga a naglawag ti panagkitam.
Limmingayka iti kanigidmo. Lima katao ti nakatakder dita. Ni Mama Lupe, ni Dindo, ni Coach Devon, ken dua a polis.
Nasdaawka. Ania ti ar-aramidenda ditoy?
Immasideg a dagus ni Mama Lupe kenka. Iniggamanna ti dakulapmo. Nabuddak pay laeng ti marka dagiti lua a nagarubos iti agsumbangir a pingpingna. “Ania ti marikriknam, iho?” sinaludsodna kenka.
Immisemka ngem mapilpilit ta mariknam ti sakit ti bagim. “N-nasayaat laeng, m-mama,” insungbatmo. “Nasakit laeng ti bagbagik...”
“Sorry, Mrs. Castellano, ngem nasken a makasaritami ni Ferdie,” kinuna ti maysa kadagiti polis.
Tinaliaw ni Mama Lupe ti polis. Saan a naguni. Nagsanud. “Siak ti guardian-na, nasken nga addaak ditoy...” kinunana.
Saan a naguni ti polis.
Kinitam ni Coach Devon a nakadalikepkep a mangbuybuya kadagiti polis.
Impakita ti polis kenka dagiti iggemna a retrato— tallo amin. “Am-ammom dagitoy?” sinaludsodna.
Miniram dagiti ladawan ngem nakudrep dagitoy. Saanmo a malasin dagiti adda dita. Nagwingiwingka.
“Kitaem a naimbag. Miraem. Kayatmi laeng a siguraduen a dagiti adda iti retrato ti nangdangran kenka tapno maaramidmi ti nasken ket masalaknibandakayo... ken tapno matiliwda ket sungbatanda dagiti nagbasolanda...” kinuna ti polis.
“Naala dagita iti CCTV iti eskuela. Nadadael dagiti dadduma a kamera isu nga awan ti rekord ti napasamak.”
Miningmingam manen dagiti ladawan. Mailangaam ni Sergio, ni Rico ken dagiti pito pay a kaduada.
“Isuda dagiti nangdangran kenka?”
Saanka a naguni. Kinitam ketdi ni Dindo. Nakitam ti napardas a panagkusipet ti kanawan a matana. Insublatmo a liningay ti polis. Nagsabat dagiti matayo. Nagwingiwingka.
“Ilangaam ida a naimbag,” insenggat ni Coach Devon. “Dagitoy dagiti maipagarup a mangsupsuplay iti droga iti Las Vegas High School. Ita, isuda ti maipagarup a nangdangran kenka.”
“Sorry, ngem awan ti mailangaak kadakuada,” insungbatmo iti nakapuy a timek.
“Come on, Ferdie... Saanka nga agbuteng. Lasinem ida a naimbag. No isuda, ipaayandaka iti proteksion. Saandakanto a masagid, ipanamnamami dayta,” impatalged ti maysa kadagiti polis.
Kinitam manen ni Mama Lupe. Nagtalinaed nga umel daytoy. Ngem iti garaw dagiti matana, kasla mabasam ti pampanunotenna: “Adda kalkaluban dagiti dua!” Sabagay, imposible a saan nga agatap ken ni Rico.
“Malaksid kadakayo ken Dindo, isuda laeng ti simrek iti inaladan a yanyo,” kinuna manen ni Coach Devon. “Tulongam dagiti pannakabagi ti linteg tapno awanton ti mangriribuk iti eskuela.”
Pinalabsam a kinita ni Coach Devon sa minatmatam manen dagiti ladawan nga ig-iggaman ti polis. Kayatmo nga ipalgak ti kinasiasinoda. Ngem ania ti mapasamak no agipulongka? Kabesadomon ti gang ni Rico. Saanto a sika laeng ti agpeggad. Pati da Dindo ken Mama Lupe.
“Imposible a dimo nalasin dagiti nangdangran kenka,” kinuna manen ti polis.
“Sorry, officer,” kinunam, “ngem nasipnget. Awan ti nalasinko.”
Nagkikinnita dagiti dua a polis ken ni Coach Devon.
Napaanges iti nauneg ti maysa kadagiti polis. “Well, no kas pagarigan ta malagipmonto ti kinaasino dagiti nangdangran kenka, awagannak latta,” kinuna ti polis. Inyawatna ti business card-na kenka.
Inawatmo ti tarheta sa imparabawmo iti kama. “Sorry, officer,” kinunam manen.
“Okay,” insungbat ti polis. “Mr. Devon, sorry, ngem dimi mabalin a piduten dagitoy. Awan ti pammaneknekmi nga isuda ti nangdangran itoy umaayamyo. Mabuteng met nga agtestigo...”
“Saanak a mabuteng,” insallawatmo. Kinusilapam ti polis. Ngem saandaka nga inkaso.
“I understand, officer,” insungbat ni Coach Devon.
“Coach, madama ti imbestigasion iti panagraira ti gang ni Rico. But we are still in the early stages... dimi ida makuti. Awan ti makalimi nga ebidensia a pangilansami kadakuada. Ngem no adda ebidensia a maidatagmo nga isuda ti manggulgulo iti eskuelayo, no adda pammaneknekmo nga isuda ti agiwarwaras iti droga iti eskuelayo, awagannak.”
“I will, officer... I will...” impanamnama ni Coach Devon.
Nagpakada dagiti polis.
“Gaddemet, Ferdie,” gimluong ti timek ni Coach Devon.
Agpapadakayo a naklaat. Tinaliawyo ti coach. Ngem awan ti nakaitured nga aguni.
“Ammok nga ammom no asino dagiti nangdangran kenka,” imper-ak ti coach kenka. “Salsalaknibam ida!”
“Sorry, coach...” nalab-ay ti timekmo.
“Kabutengmo ida?”
Nagwingiwingka.
“Wenno, pasetnakayo ti gang ni Rico?”
Saanka latta a naguni.
“Wenno agus-usarkayo met iti droga ket dayta ti gapuna a napigsaka?”
“Coach...”
“Is that right, Dindo? You’re also a drug user... a drug pusher?”
“Sumardengka, Mr. Devon!” insengngat ni Mama Lupe. “Awan ti karbengam a mangakusar kadagitoy ubbing. Saanda nga agus-usar iti droga. Siak ti mangpaneknek iti dayta.”
Ngem saan nga inkankano ti coach ni Mama Lupe. Simmango ketdi kenka. “Come on. Answer me. Are you, guys, drug addict, too?”
Saanka latta a simmungbat. Ket nadlawmo nga ad-addan ti pannakasemsem ni Coach Devon.
“I’m ordering a drug test on you, Ferdie,” naturay ti timek ti coach. “As your coach, I have the right to do it. And effective today, I am suspending you from all games. Agingga a dimo mapaneknekan a saanka a drug addict.”
(Maituloyto)
