Sarita ni GENARO R. SUMAOANG
UPPAT a paris ti demotor a bangka ken daklis ken sapiaw ti naggigiddan a nagatang ti innem a pulo a mangngalap. Nagpiestada iti umuna a rabii a panangisibboda gapu iti kinawadwad ti nakalapanda. Ket nasirmatada ti gin-awa.
Iti panaglabas ti tawen, in-inut a nagbalbaliw ti Sandejas. Naaddaan amin dagiti tattao iti trabaho gapu iti nasayaat a panangiwanwan ni Emmanuel kadakuada. Nagipatakderda iti pagaramidan iti bugguong, tuyo ken tinapa. Naglupos dagiti balay, simminop ti aglawlaw. Nadoble ti anus ken gagetda. Agingga a nagbalin a ponduan dagiti komprador ti Sandejas.
Iti maysa nga aldaw, nakasangaili ni Ama Berto iti lalaki a nangyam-ammo iti bagina a kameng ti maysa a pagiwarnak.
“Pakaidayawanmi unay, tata, ti itutulongyo a mangipalawag no kasano ti namunganayanyo iti nadaras nga irarang-ayyo iti panagkalap. Nagbalin daytoy awayyo a nalatak unay a taudan dagiti mailaklako nga ikan,” kinuna ti periodista.
KLASIKO A SARITA: Rimat iti Kasipngetan (2)
“Gagangay dagiti ar-aramatenmi a pagkalap, barok. Kas met laeng iti aramid dagiti dadduma nga agaramatda kadagiti kangrunaan a kasapulan iti panagkalap. Isuna laeng ta addaankami iti panagtitinnulong a nangirubuat iti kastoy nga aramid.”
“Dakayo kadi ti akimpanunot iti kastoy a wagas ti panagkalap?”
“Ah, saan, barok! Nagtutulaganmi a pumurok dayta. Ket utangmi daytoy iti lalaki nga addaan ti tured ken sikap. Isu ti nangilungalong kadakami.”
“Maam-ammok koma dayta a lalaki, tata. Pagarupek nga ad-adu ti maipalawagna.”
“Mabalin, barok,” ket kinuyog ni Ama Berto ti lalaki iti pagtaengan da Tata Anselmo.
“Sigud a tagaditoykayo, pari?” sinango ti lalaki ni Emmanuel.
“Saludsodem kadakuada,” kinuna ni Emmanuel.
“Isu ti kunkunak a nakautanganmi iti naimbag a nakem, barok,” kinuna ni Ama Berto. “Agtallo a tawenna itan ditoy Sandejas. Naisadsad ditoy a dimi ammo ti kinaasinona. Kinuna ti doktor a nangtaming idi kenkuana nga agsakit iti amnesia.”
“Kasta?”
Kalpasan ti sumagmamano nga oras, nagsubli ti lalaki nga adda kakuyogna a lima a pannakabagi ti linteg. Kinemmegda ni Emmanuel. Pinosasanda.
Immaribungbong dagiti pumurok iti Sandejas.
“Ammoyo kadi no asino daytoy a lalaki!” inlaaw ti kapitan. “Isu ni Dario Malvar, ti nagpukaw nga utek ti maysa a sindikato nga agipuspuslit iti kontrabando. Napeggad daytoy a tao!”
Naklaat dagiti tao iti apagapaman. “Saan! Ulbod ti ipabpabasolyo!”
Sumagmamano kadagiti lallaki ti immasideg tapno agawenda ni Emmanuel. “Ruk-atanyo!”
“Ballaagankayo,” kinuna ti kapitan ket nagpaputok iti ngato.
“Agtalnakayo!” rimmimbaw ti timek ni Emmanuel. “Adda lintegtayo. Saankayo koma nga agsalungasing. Nalabit a pudno ti ipabpabasolda kaniak.”
“Ngem saan a rumbeng a madusaka no ipadis iti kinaimbag nga inaramidmo kadakami,” inkalintegan dagiti tao.
“Uray pay. Agtungpaltayo koma amin iti linteg, isu a nalinteg nga ukom ti amin a tao,” ket siaannugot ni Emmanuel a simmurot kadagiti nangkemmeg kenkuana.
Naikulengda amin. Kaaduan kadakuada ti naglua gapu iti kinatakneng ken kinapakumbaba ni Emmanuel kadakuada.—O
