Ni REYNALDO A. DUQUE
(MAIKA-15 A PASET)
GAGANGAY a potahe dagiti inorder ni Tina. Fried chicken. Pansit a miki-bihon. Grilled tuna. Boneless crispy pata. Lumpiang sariwa. Buko juice ti innalana nga inumen para kenkuana, green mango juice met kaniak.
Ngem iti laksid ti kinalabon ti taraon, agpadpadakami a saan unay a nakakaan. Panagkunak, agduma dagiti gapuna.
Para ken ni Tina, mabalin a saan pay a mabisin. Ngem ad-adda a patiek a nakusim. Agdidieta. No mangisakmol, apagisu a pamedped laeng iti bisin. Saanna a kayat a madadael ti nakain-inaka a pigurana.
NOBELA: Bastardo (12)
Iti sabali a bangir, iti kas kaniak iti kasasaad ti biag, maibilangen a taraon ti maysa nga ari ti sangnganuek. Ngem napukawko ti ganasko koma a mangan. Itay sumiplot ti atapko nga amangan no siak ti agbayad iti makanmi, nagling-etakon iti napigket. Amangan no saan nga umanay ti linaon ti petakak. Nakababainen no kasta.
Bayat ti pannanganmi, nadumaduma a banag ti nagpatanganmi. Ngem ad-adda a nagsentro kaniak dagiti saludsod.
“Tell me something about yourself,” kinuna ni Tina.
“Awan ti nakalalagip iti biagko,” kinunak.
“Come on...”
Awan ti inlibakko ken ni Tina.
“Nayanakak a napanglaw,” kinunak. “Gagangay a modista ti mother-ko idinto a nanumo a mannalon ni tatangko. Dimmakkelak a rigat la ti adda. Napadpadasak ti nagar-arado iti sirok ti bumayakabak a tudo wenno umatiberret nga angin. Napadasak ti nagas-assiw iti dua a lata a nagawangan iti gas a napno iti danum a pangsibug iti bunubon a tabako a birhinia. Napadasak ti nagpatpatnag a nagbambantay iti pannakasungrod ti pugon ti tabako. Napadasak met ti nagul-uli iti pinuon ti sarguelas wenno mangga wenno lomboy wenno salamagi tapno agpuros iti bunga dagitoy. Napadasak pay ti nagkalkali iti alinta wenno nagtiltiliw iti babassit a tukak a pangappan iti ipakatko a lawin kadagiti alog ken kinelleng ken annayangan, kas pangpadawi kadagiti dalag, ar-aro, paltat, ken uray pay igat iti tamnay. No dadduma, saan nga ar-aro wenno paltat wenno dalag ti malawinak no di ket uleg. Napadpadasak met ti nakagat iti uleg...”
“A-ania?” di mailadawan ti siddaaw ni Tina.
“Ngem uleg nga awan ti gitana,” kinunak. “Mannukak ti awag iti daytoy a klase ti uleg. Ti nagita nga uleg, daydiay aw-awaganda iti karasaen. Wenno daydiay palapal. Kasta ti awagna agsipud sa ipalapalna ti bagina iti kabusorna. Masansan nga agbitin daytoy kadagiti sanga ti kayo.”
Inaprosan ni Tina ti kanigid a takiagna. “Sumsumgarak man iti ibagbagam!” kinunana.
“Napadasak met ti natnag manipud iti natayog a pinuon ti salamagi,” intuloyko. “Dayta siguro ti gapuna nga adda mariknak nga aligagaw no kasta nga addaak iti nangato a disso...”
Bayat ti panangisalaysayko kadagitoy a padasko a kas ubing idiay Ilokos, napasnek ti panangdengngeg ni Tina kaniak. Mailangaak kenkuana ti siddaaw, babaen dagiti isem, apagapaman a perreng wenno naem-em a katawa, ket ammok lattan a ganggannaet kenkuana amin dagitoy a padas. Iti panagubingna, dakkel ti pagarupko a dina pulos napadasan ti immuli iti maysa a pinuon ti uray sarguelas la koma tapno agpuros iti naluom a bunga. Nalabit pay, dina maitudo no sadino ti nagsaadan ti ngipen ti nuang, iti akinngato a gugot wenno iti akimbaba.
Inurayko nga agsarita met ni Tina maipapan iti bagina kalpasanna. Ngem saanko a nauray.
Apagkissay laeng ti taraon a naidasar. Kalpasan ngata ti agarup maysa nga oras, inseniasen ni Tina ti panagbayadmi.
Idi agsubli ti naka-Barong Tagalog. Insenias ni Tina nga isuna, ni Tina, ti pakaitedan ti iggem daytoy a bill folder.
“H-how much?” Nagraed kadi ti timekko?
Insenias ni Tina nga isuna ti makaamo. Credit card ti insapitna iti bill folder.
Saanakon a nagtimek. Nupay kasta, adda nariknak a nalimed a panagbain.
Pinabungon ni Tina dagiti teddami a taraon. Siak ti nangbitbit iti panakkelen a supot a plastik idi rummuarkami.
“Let’s go barhopping,” kinuna ni Tina.
Kasta nga agpayso ti inaramidmi. Kadagiti nalalatak a night spot iti Makati ti napananmi. Sumrekkami iti maysa, agorder ni Tina iti mainum—margarita ti paboritona idinto nga scotch on the rocks kaniak—ad-adda nga ibusenmi ti oras iti dance floor ngem iti lamisaan. Kalpasan ti agarup maysa nga oras, rummuarkami tapno sumrekkami iti sabali. Kasta a kasta ti napasamak. Danggayak latta met ni Tina iti kayatna.
Agarup a pito a night club ngata ti sinerrekmi—saankon a matandaanan—sakbay nga inkeddeng ni Tina nga agawidkami. Iti maysa a condo unit iti The Fort ti pagawidanna. Nagsinakami iti maudi a klab a simrekanmi. Impabalonna kaniak ti sangasupot a taraon a pinabungonna iti restauran a nangananmi.
“Well, good night,” kinunana kaniak sakbay a dimsaagak iti kotsena.
“Good night,” kinunak met. “Thank you for a very memorable evening....”
“I have a request, Ardi.”
“Ania?”
“I think, kasapulamon ti lisensia nga agmaneho.”
Nagtung-edak. “Okey,” kinunak. “I’ll do...”
Iti dayta a kinuna ni Tina, ammok a saan a daytoy ti maudi a panagkitami. Adda pay dagiti sumarsaruno.
“’NIA nga oras idi sumangpetka idi rabii?” dinamag ni Tia Caring idinto ilillilipna ti dadaitenna.
Addakami iti tailoring shop. Agarup alas otso iti agsapa. Adda nakasubo a dadaitek a pantalon ti maysa a gayyemko a soldado iti makinak. Dua pay laeng kadagiti uppat a sastre ti adda.
“Agalas onse media siguro, anti,” insungbatko. Nagwerwer ti makinak.
“Adu daydiay insangpetmo a makan. Naggapuam kadi?”
“Kua, nag-birthday daydiay maysa a kaeskuelaak,” impambarko. “Nalabon ti sagana isu nga impayawidda kadagiti bisita dagiti dadduma.”
“Dika man la timmawag. Adda met teleponotayo. Wenno nag-text-ka koma ta addan sa met selponmo.”
“Kua, nag-low bat ngamin ‘diay selponko, anti. Impagarupko nga apagbiit laeng ‘diay party. Sori, anti....”
Saanen a nagtagari ni Tia Caring. Adda simrek a kustomer a mangsaka iti pinadaitna a pantalon, daytoy ti inasikaso ti ikitko. Dinumogak ti dadaitek.
Iti baet ti wanerwer ti makina a pagdaitko, nalagipko met ti kalikagum ni Tina kaniak sakbay a nagsinakami idi rabii. I think, kasapulamon ti ti lisensia nga agmaneho, kinunana. Asino ngata ti pagpatulongak?
Kellaat, adda simmiplot iti isipko. Wen nga agpayso, kinunak. Isu ti pagpatulongak!
(Maituloyto)
