Sarita ni SAMUEL F. CORPUZ
NAGTARAYDA iti siled. Sinabat ida ti guardia ngem inwalinda.
“’Sino a Miss Narciso?” adda nagsaludsod iti nakaamerikana.
“Daytay pinilit ti lima nga agtutubo!”
Nagkiet ni Arsing. Kellaat a nakarikna iti pungtot.
KLASIKO A SARITA: No Aggibusen ti Ayug (1)
“Kinabkabilda pay.”
“Natiliwen dagiti sairo?”
“Saan pay.”
Adda nagsardeng a dyip iti ruar. Sinaruno dagiti PC ti dua pay a kaduada a nangawit iti maysa a konstable a daradara.
“Apay, teniente?” sinaludsod ti nakaamerikana.
“Ne, dakayo met gayam, sekretario. Ambush! Tinambangdakami dagiti Huk idiay Sitio Nagpunduan!”
Kas impadamag ti teniente, natay ti dua a konstable ket ni Kabo Ricardo Pascual ti nasugatan. Kellaat ti idadarup ken panagtaray dagiti Huk manipud iti tapaw ti bassit a turod iti abay ti kalsada. Saan a nakabales dagiti PC.
“Ket dakayo, sekretario, apay nga addakayo ditoy?”
“Kinuyogko da gobernador. Addada dita ngato.”
“Ne, apayen?”
“Naggapukami idiay Lubbonan idi rabii. Taripnong ti partido. Ket ammomon, a. Adu a basi, kilawen a kalding, baka ken aso. Nasayaat met ni Gob itay bigat. Ngem itay malemen...” inkaud ti sekretario dagiti ramayna nga agpababa iti tianna.
Nagpaggaak ti teniente.
Nagpakada dagiti pannakabagi ti linteg kalapasan ti panangkitada, agraman ti sekretario, iti gobernador nga adda iti maikadua a kadsaaran.
Tik-tak-tik-tak-tik-tak!
Simmirip ni Arsing iti siled ni Betty. Nagkidem iti nakitana. Agas-asug ni Betty ket nakabitin dagiti dua a sakana. Idi agbuelta, matmatmatan ti lalaki a di makatalna.
“Nagbayagdan!”
“Wen, ngarud!”
Nagsinada. Ammo ni Arsing a dagiti adda iti uneg ti kayat a sawen ti lalaki, ngem kenkuana, dagiti aggapu iti pagbaludan. Nagsubli iti tugawna.
Rimmuar ni Dr. Pangilinan. Nagturong iti agdan. Nasabatna ni Dr. Godofredo Gangan. Umis-isem ti nalukmeg a babai iti likudanna.
“Nasayaaten ti kasasaad ti naopera, doktor,” kinuna ni Dr. Gangan.
“Agyamanak unay, doktor, iti panangisalakanyo iti asawak,” kinuna ti babai.
Kellaat a linintegna ti panagtugawna. Sumungad manen ti um-umkis nga ambulansia.
“Adda manen,” adda nagkuna iti sikigan ni Arsing.
Agap-apura dagiti nangiserrek iti adda iti puraw a kama a pagawitan iti agbugsot. Sinabat ni Dr. Gangan. Linukibna ti ules. Inwagisna ti abagatan. Simmurot ti dua a naikuyog iti naisangpet. Nagbati ti maikatlo.
“’Sino daydiay, balasangko?”
“’Tay kaarrubami, tata.”
“Apay?”
“Naalisan.”
Napasungadanna ti lima a lallaki. Mabigbigna ti maysa a nakabado iti berde nga awan kueliona. Nagtagipaltog ken nakauniporme dagiti dua. Simrekda iti kuarto ni Dr. Pangilinan. Sa rimmuarda. Nagturongda iti yan ni Arsing. Inikkat dagiti dua a kuskos dagiti kallugongda idi yam-ammmo ida ti nakabado iti berde kenkuana. Dagiti padpadaananna a balud. Nasdaaw ni Arsing. Nasingpet ti langa ti maysa a maisungani iti napuskol a panagkudkudil ti maikadua.
(Maituloyto)
