Sarita ni SAMUEL F. CORPUZ
ADDA nagsardeng a dyip. Adda agbasbassawang.
“Di pay la agpiangpiang ti langit ken daga! Haaa! Buisitkayo amin! Bay-andak a matay! Aniat’ maitulongyo kaniak? Apay a didak bulosan a makirinnisut kadakuada? Mammapatay a polis! Satanas a mayor! Bay-andakami a matay!”
Napatakder ti balasitang a kakuyog ‘tay naudi a naisangpet. “Tata Edring!”
Daradara ti barukong daytoy. Tengtenglen ti uppat a lallaki ti kanigid a takiagna; salupaypay ti kanawanna a pagay-ayusan met ti dara. Uyas ti kanawan a sakana, a nadaripespes met iti dara, idinto nga agseksekkad ti kanigid a sakana. Sakasaka. Dakkel a lalaki ken napudaw. Agtawen iti sumurok-kumurang nga uppat a pulo.
KLASIKO A SARITA: No Aggibusen ti Ayug (2)
Sinabat dagiti katulongan ti ospital ken ti guardia. Adda nangitugot iti atiddog a diaket. Inyusongda iti lalaki ket saanen a makakuti. Inserrekda iti pakaagasan dagiti nasugatan. Kalpasanna, nagulimeken.
Tik- tak- tik- tak- tik- tak!
Tinangad ni Arsing ti dakkel a pagorasan. Tinaliawna ti nakarikep a siled ni Betty. Alas 3:20 iti parbangon. Timmakder. Kinita dagiti balud ket panggependa ti tumakder met, ngem imbaga ni Arsing nga agbatida.
Nagtoktok iti ridaw. Nalukatan daytoy. Umis-isem ni Mrs. Aquino a timmammidaw. “Saanka a madanagan, manong. Agin-inana ni misis. Adda rigrigatna bassit ta agdadamo.”
Kasano a saan a madanagan?
Adda manen nagsardeng a lugan iti ruar. Kalpasanna, inruarda ti bangkay ni Balasang Narciso. Inluganda . Madamdama pay, nagpukawen dagiti dung-aw ken ungor ti makina.
Nagtuloy ti makasikor ken makauma nga uni ti pagorasan. Nagtuloy dagiti arasaas; dagiti kayaskayas ken kanaktuol iti sementado a suelo. Pasaray tumakder ni Arsing a mapan agallingag iti siled ni Betty. Tumangwa ket agsabat dagiti matada iti pagna a pagna a lalaki. Sipsiputan met latta dagiti dua a balud. Natalna dagiti bantayda iti asideg.
Immasideg dagiti dua a babbalasang nga anak daytay lakay nga adu ti sakitna iti manongda. “Awanen ni papang, manong.”
Naikuleng ti lalaki. Naeppelan ti dung-aw ti inaudi a balasang. Nagturong dagiti agkakabsat iti siled a pagsangsangitan ti baket nga inada.
Rimmuar ti maysa kadagiti agbambantay iti naalisan a babai. Inasitganna dagiti kakaduana iti ruar. “Pagduaduaan ti kasasaadna. Naadasan. Kayatna kanon ti matay. Agpakpakaasi a didan agasan. Nagpaaladan iti dara. Klase O. Nalaka a biroken ta adu.”
“Ni Tata Edring... ni tatangna?”
“Napigpigsa ngem ni Milagros.”
Milagros gayam ti naganna, nakuna ni Arsing.
“Ti asawana, yanna, ading?” sinaludsod ti sabali.
“Itay malem, naammuanda ti palimed ni Manang Milagros. Sekretaria ni mayor. Kinabil ni tatangna. Nagpadara. Tallo a bulan ti sikogna. Nagpungtot ni Tata Edring. Imbarikesna ti bunengna... Pinaltogan dagiti polis ni mayor ni Tata Edring.”
“Ni ketdin Milagros, apay a nayat?”
“Ammoyo met ni mayoren....”
Adda nagibit a maladaga. Napatakder ni Arsing. Nakitana a sumirsirip ti ama iti kaarruba a siled ni Betty. Naluktan ti ridaw. Nangngeg ni Arsing a kinuna ti nurse: “Lalaki, Apo Viernes. Kablaawankayo!”
Saan a nakatimek ti lalaki. Pagam-ammuan, induronna ti ridaw ket inalun-on ti siled.
“Uhaa! Uhaaa! Uhaaaa!” nasingsinggit ti simmaruno nga ibit.
Saan a napuotan ni Arsing ti ilalagtona a nagtaray. Nagistay nadungparna ti nars a naggapu iti uneg.
“Babai, Apo Castisimo. Kulot! Ngem ayabanyo pay dagidiay mangted iti dara.”
Tik-tak-tik-tak-tik-tak!
“NAIMBAG a bigatmo, padre.”
“Naimbag a bigatmo met, anak.’
Insurot ni Arsing ti panagdengngegna iti kanaktuol ti sapatos ti pannakabagi ti Dios agingga iti nagpukaw a naigamer kadagiti kuti iti uneg ti ospital.
Naraniag ti agsapa. Nagtakder ni Arsing iti ruangan ti ospital a sumango iti daya. Napintas ti panagkitana iti kulot a dutdot dagiti leon iti agsumbangir ti ruangan. Agkaykayab ti wagayway. Naglang-ay kadagiti agduduma ti marisda a sabong iti hardin iti likudan dagiti leon.
Adda arimpadek ken saning-i iti likudanna. Timmaliaw.
Ti lakay nga addaan iti adu a sakit. Ilugandan iti karro nga agur-uray iti arsadanan ti sangapulo ket dua a tukad ti sementado nga agdan ti ospital tapno sanguenna ti panungpalan.—O
