Nobela ni Norberto D. Bumanglag Jr.
DANDANI nadingpil ti agongmo ti nailibbaag a ridaw. Nakigtotka. Napamuttalengka. Saanka pay laeng a mamati iti inaramidda kenka. Nagburek a dagus ti daram. Limmabbasit ti rupam. Kinagatmo ti bibigmo. Mangrugin a kamatem ti angesmo. Uray ni Dindo a nakatakder iti abaymo, saan met a nakauni. Kitkitaennaka. Nalabit a pugpugtuanna no ania ti aramidem. Ammona a napudotka. Ammona a dimo kayat ti mailupitlupit.
Immangeska iti nakaun-uneg. Kayatmo a kugtaran ti ridaw. Kayatmo a lengngesen ni Walter ket pagsasarunuem a danogen. Nangmesmeska. Immurat dagiti pispismo.
Nagkidemka. Nabayagen a saanmo a kontrolado ti biagmo ken dagiti aramidmo. Kadawyan a palubosam lattan ti rurod, lunod ken gura nga agturturay iti amin a pangngeddengmo.
Immangeska manen iti nauneg. Nakaun-uneg. Ket idi ipug-awmo ti angin a nabunnong iti barukongmo, limmukay dagiti gemgemmo. Bimmaaw ti riknam. Nagkalma ti dalagudog ti barukongmo.
NOBELA: Saan a Rosas Amin nga Ayat, Maria Emmanuelle (16)
“Let’s go home,” kinunam ken ni Dindo.
Saan a nakauni ni Dindo. Masmasdaaw ketdi a mangmatmatmat kenka. “Just like that? Saan a ni Walter ni nangawis kadata. Ken balay ni Rhianna daytoy. Come on, let’s go in...”
Nalab-ay ti katawam. “Don’t you see what’s going on? Saanta a maibagay iti bunggoyda...”
“Sikanto met ngamin. Dikanto met agpa-blood test, di suspendidoka.”
Nagwingiwingka. “Intan,” kinunam ketdi. Immunakan. Simmaruno ni Dindo. Arintukiaden. Nakatallon nga askawkayo idi adda nangawag kenka. Timmaliawka. Kasta met ni Dindo.
“Ferdie! I’m glad you came!” Ni Rhianna, addan iti sangom. Anian a pintasna iti apagdillaw a make-up-na. Nalabaga a lipstick ti apagapaman a napaidalan iti nagsinampuso a bibigna. Ti barukongna, kumarkarit. Uray la a nagkuy-os ti pus-ongmo.
Masmasdaawka iti mapaspasamak iti bagim. Apay a kastoy metten ti marikriknam? Agduyoska kadi ken ni Rhianna? Saanmo a mailawlawag. Basta kayatmo nga arakupen ti balasang.
“Shit!” dandani nayesngawmo. Saanmo pay a napadasan ti nagrayo iti babai. Mabutengka. Ngem pudno a sabali daytoy a marikriknam ita.
“Come on, come inside!” Iniggaman ni Rhianna ti dakulapmo. Kasla adda koriente a limmasat iti bagim. Ket ad-addan ti siddaawmo ta natulokka man a pinaiguyod ken ni Rhianna. Awan man laeng ti isusupiatmo. Ni Dindo, itaktakawnan ti kumita kenka.
Nagsublikayo. Ngem addaytan ni Walter a mangsabat kadakayo. Nakarupanget. Sipapardas a nangsiggawat iti ima ni Rhianna.
“What the fuck!” nakapigpigsa ti riaw ni Walter. Makapungpungtot a nangakkal ken ni Rhianna.
“Walter, he is my guest!” intangsit ni Rhianna.
“Why? You like him?” Ginutta ni Walter ti takiag ti balasang ket napasikig daytoy. “You like this stupid fool?” Sinangonaka ni Walter. Nataytayag nga amang ngem sika. Ngem naraprapis.
“Apay, ania ti panagkunkunam iti bagim, big shot?” Intugkitugkikna ti tammudona iti barukongmo. “How many times have I told you that Rhianna is mine? Stay away from her! You heard me, asshole?”
“We are leaving, Walter. Don’t worry about it,” nakatantanangka a nagkuna. Ngem iti kaunggam, pumpumsuak ti pungtotmo. Kayatmo a pasubsoban ni Walter. Kayatmo nga ibaltog ket pagpapasam a danogdanogen.
Ngem tinengngelmo ti riknam.
“No, you’re not going,” inriri ni Rhianna. Nagpatengnga iti nagbaetanyo ken Walter.
“It’s okay, Rhianna... we are going... and thanks for the invite,” kinunam ket timmallikudkan. Simmurot ni Dindo kenka.
“Nasaysayaat pay. Saanmi a kasapulan ti lastog ditoy. Look, you can’t play football! And you’re a drug addict! That’s why you are suspended indefinitely!” impakamakam nga impukkaw ni Walter.
Napasardengka. Ngem saanka a timmaliaw. Kinemkemmo laeng dagiti sangim. Nangmesmeska. Saanka a drug addict. Uray naminsan laeng, saanmo a ginandat ti nagaramat iti droga.
“Let’s go home, Ferdie. Saankan a dumngeg kenkuana.” Ginuyod ni Dindo ti maysa a takiagmo.
Immangeska manen iti nauneg. Nagkinnitakayo ken Dindo. Agwingwingiwing daytoy. Saanen a kas itay nga isu ti naarisgar nga agtuloykayo.
“Don’t do anything stupid, Ferdie... Not worth. Let’s go home...”
Saanka a nagun-uni. Timmangadka iti nasipnget a law-ang a pinasilnag laeng dagiti sumagmamano a bituen nga agkiraykiray. Kayatmo a balbaliwan ti biagmo. Saanmon a kayat ti maisagmak pay. Kayatmo nga ipakita a kabaelam ti agbalbaliw...
Immaskawka. Saanmon a dinengngeg dagiti isawsawang ni Walter. Uray ni Rhianna, saanmon nga inkankano. Nagabaykayo nga aggayyem a nagturong iti nakaiparadaan ti luganyo.
NAGLIGSAYEN ti rabii ngem saanka a makaturog. Agur-uroken ni Dindo idinto nga alusiisenka. Ballikidka a ballikid. Pilitem ti agkidem; ti panunotmo, paglayagem kadagiti napino a puraw nga ulep; agbilangka kadagiti puraw a karnero tapno makaturogka... Sangkabaga daydi inam dayta no saanka a makaturog. No apay ketdi a karnero, a saan ket a kalding.
Ngem uray no ania ti aramidem, saanka met latta a mailibay.
Nagin-inayadka a bimmangon. Nagtugawka iti iking ti kama. Inaprosam ti rupam sa immangeska iti nauneg. Timmakderka. Inin-inayadmo nga inlukat ti ridaw ket nagturongka iti nakabasbassit a beranda ti nailet nga apartment-yo. Sinabatnaka ti apaganem-em a lamiis ti rabii ken ti angot ti barbecue grill nga adda iti beranda.
Timmangadka. Minatmatam dagiti kasla maar-aruy-oy a bituen nga agkidmakidmat iti ngato. Napnuan iti misterio law-ang. Kas iti biagmo...
Apay a kasla nagbalinen a kasingin ti biagmo ti riribuk?
Nasarakam ti football a ninamnamam a mangbalbaliw iti biagmo. Ngem saandaka met nga ikkan iti gundaway. Saandaka a respetaren. Tagibassitendaka uray no kasano ti panangikarkarigatam a mangipan iti amin a kabaelam nga agay-ayam.
Uray ni Coach Devon, awan ti panagtalekna kenka. Wenno ar-aramatennaka laeng para iti bukodna a pagimbagan?
Ket nariknam manen ti panangay-aymo iti bukodmo a bagi.
“Ferdie...” nasingaka iti timek nga aggapu iti likudam.
Timmaliawka. Ni Mama Lupe; naikuadro iti ridaw ti beranda.
“Siririingka pay? Inka maturogen...”
Immangeska iti nauneg.
“Parbangonen. Sumrekka pay iti eskuela no bigat. Ala, inkan...” Timmallikuden ti baket.
“Mama Lupe...” nayesngawmo.
Nagsardeng ti baket. Nagpusipos.
“Saan kadi a dagensendak laeng?” naisawangmo.
Nagkatawa ni Mama Lupe iti apagasngaw. “Apay a kasta ti saludsodmo? Mariknam kadi ti pannakaidumdumam iti daytoy a pagtaengan?”
“Diak la ngamin kayat nga agbalinak laeng a babantotyo,” kinunam.
Immasideg kenka ni Mama Lupe. Iniggamanna ti kanawan nga imam. Inilutna ti dakulapmo. “Agyamanak ketdi ta simmangbayka iti biagmi. No saan a gapu kenka, amangan no napukawkon ni Dindo. Binalbaliwam ti biagna. Raraemennaka. Dumngeg kenka. Ad-adda pay ngarud a sika ti patienna ngem ti siak...”
Napamulagatka.
“Imbilangkan a paset ti pamiliak. Isu nga awan ti rumbeng a panunotem. Imbilangka pay ketdin a kasla anakko.”
“Gracias, Mama Lupe...” naisawangmo laengen.
Piniselna manen ti dakulapmo. “Ala, inka maturogen. Ken punasem dagita luam...”
Inyapirasmo ti dakulapmo iti lawlaw dagiti matam. Nabasada. Saanmo pay ketdin a nadnadlaw ti panagluam.
Inarakupnaka ni Mama Lupe. Sinubadam. Kasla nariknam ti arakup ti bukodmo nga ina. Napakidemka. Ket nagalintatao ti ladawan ti inam.
Ania ngata ti nagbanagannan?
Umarakup manen ti ila ken tarigagaymo a mangammo no ania ti nagbanagan ti inam. Kayatmo a makita. Ngem saanka pay a nakasagana. Nasken a balbaliwam ti biagmo tapno natangig ken napannakkelkanto no agkitakayo nga agina.
Nalagipmo ti football, ti kakaisuna a mabalinmo a pagpatawan a mangbaliw iti biagmo. Ngem suspendidoka. Ania ti umno nga aramidem?
(Maituloyto)
