(Immuna a naipablaak iti Oktubre 2, 1961; sa iti Pebrero 6, 2017 a bilang ti Bannawag.)
Sarita ni ARSENIO B. CORTEZ
SALBAGEN! naisakuntipko ket kinunesko ti papel. Itay pay la kaul-ulog dagiti kadagusak a mapan agbasa ti panangrugik nga agsurat ngem diak met la makabukelen. Dandani pangngaldawen. Agsasadutakon ngem napegges ti panagayatko ken ni Reulita.
Anak ti mangaskasera kadakami ni Reulita. Idi laeng Hunio, a yaakarmi ditoy ken Manong Joe a sigud a nagkaskasera kadakuada, ti panagam-ammomi. Inayatkon a sililimed manipud idi.
Nangalaak iti sabali a papel iti kuaderno a paglanlandagak. Sinakarko dagiti dadduma a naisuratko, sinilpuak sa binasak. “I love you, Reulita. I really care for you. I love you with more reasons you may ever know and more than what I can prove.”
KLASIKO A SARITA: Saan a Kasla Idin, Gayyem (1)
Nagmusiigak ta pagduaduaak no patien ni Reulita dagiti balikas. Nagrigatto met ngamin ti agaramid iti surat ni ayat. No saan laeng a ni Reulita ti pagpaayanna, ditam. Diak man met sinursuratan daydi nobiak idi hayskulak.
Saankon a binaliwan ti surat. Sinilpuak lattan. Gasanggasaten. Maiparipiripko la ketdi ti ayatko, kusto. Kinupinko. Insobrek.
“Oy, papananna?” nalasinko ti timek ni Reulita manipud iti matallikudak nga agdan. Simmangpeten manipud iti pagadalan. Bigat ti klasena. Malem met kaniak. “Ita man pay. Nasirpatmo ngatan ‘tay Ideal Woman-mo?”
Tinaliawko idinto nga impakursadak ti tammudok kadagiti bibigko nupay ammok nga awan ni Nana Maxima a makangngeg kadakami. Adda napananna, kasta ti bilinna kaniak nga ibagak ken ni Reulita. Kalpasanna, kinunak: “Ti la sasawem. Mangngegdaka dagiti tuleng, ala.”
Pinagallaallatiw ni Reulita ti panagkitana iti surat nga ig-iggemak ken iti rupak. Kasla agduadua ti isemna.
“Pagpaayan ngay dayta?” dinagullitna. “Basaek man, a.”
“Surat, ’ya, ket saan,” inyulbodko idinto nga insigpitko ti surat iti kuadernok. “Homework-ko iti Ingles.”
Umuna a tawenko pay laeng iti kolehio, kas ken ni Reulita. Idiay Far Eastern University ti pagad-adalanmi. Kinamaestra ti ad-adalenna. Pre-Law met kaniak.”
“Naay ti ulbodnan!”
“Agpayso met.” Diak ammo no apay nga ilibakko pay laeng. Gundawayko koman a mangited. “Daytay theme-ko, kunak man laengen.”
“Kitaek man ngarud. ‘Mod’toyen.”
“Intotta. Saan pay a nalpas.”
“’Niakat’ta,” naglibbi. Napimpintas manen iti panagkitak. Nagdiro ngatan dagita a bibig! Nakarungrungpida! “Kunak la ngarud a surat ket,” intuloyna, “Aglibakkanto pay laeng. Ipulongkanto ken ni mamang.”
“Apo, ni pulpulongiran, ’ya,” kinunak. “Saan a surat, kunak, ket ipapilitna.”
Ginandatna nga agawen ti kuaderno a nakaisigpitan ti surat. Siaalistoak a nangilisi.
“Naalas ti grammar-ko…”
“Urayen. Basta basaek laeng.”
“Madiak.”
“Hm, madika, di madika!”
Timmalikuden. Ngem idi makagteng iti asideg ti ridaw ti siledna, pinagurayko met laeng. Napanunotko nga ipakitakon ti surat. Sabagay, agtungpalto met laeng kenkuana.
“Ngem dimo ipulpulong ken ni mama, wen?” pinagkarik. Naipakadawyanen ti mama a pangaw-awagmi nga agdagus ken ni Nana Maxima.
Diak met kayat a maammuan ‘toy baket ti panagrayok iti anakna. Nainget ti bilinna a saankami kano nga agiinnarem nga agkakadagusan. Madadael kano ti urnosmi.
Ken, adda nagsaritaan da Nana Maxima ken tatang. Agipulong ni Nana Maxima latta kano kadagiti dadakkelko no madlawna nga adda pagraywak. Ket no maammuan ni tatang, pagsardengennak kano nga agadal. Didak pay la nga’d pinagpadi, kunkunak man no dadduma.
Kas kaniak, maparparitan met ni Reulita. Agadal kano pay sananto panunoten ti makiinnayat.
Napaneknekak ti kinainget ni Nana Maxima idi pinapanawna kano ti maysa a nagdagus idi summer ditoy. Saan kano a nagpabatubat ‘toy baket idi maammuanna nga agrayo dayta a Romeo ken ni Reulita.
“Kitaem man ita,” inkatawa ni Reulita. “Aginkukunakanto pay la ngamin. ‘Mod’toyen, a.”
“Ngem ikarim adika agipulpulong. Agaluadka no agipulongka. Ipulongko met nga umaynaka sarsaraken ni Romeo idiay eskuela.”
“Nakitam? Kaano?”
“Idi napan a lawas. Idi napanak nag-physical education. Ania, ikarim?”
“Wen, nagullitka ketdin, ‘ya.”
Napalalo ti isemna a nangawat iti sobre. Kinalbitna pay ti timidko, sa simrek iti siledna. Nagturongak metten iti kuartomi ken Manong Joe.
(Maituloyto)
