Sarita ni ARSENIO B. CORTEZ
MANIPUD idi, namalbaliwen ti pannakilangen ni Reulita kaniak. Nalpesen di panagpimpinnasigmi. Sa la makisao kaniak no sisasango ni mamangna. Nalabit a tapno saan a makadlaw ti baket.
Tallo, uppat, lima agingga iti pito ti inkoreok a surat ken ni Reulita. Idiay amin unibersidad ti nangiturongak tapno saan a madlaw dagiti kabbalaymi. Imbagbagak pay ti panangpigisna a dagus kadagiti suratko apaman a mabasana.
Ngem lagidawek ti dina panagsubalit. Diak met nga’d maitured a kasarita ditoy balay. Ranranaek no dadduma iti unibersidad ngem patinayon met nga adu ti kakuykuyogna a babbalasang.
Ti dina panagipulong ti nangted iti dakkel a liwliwak. Adda met la ketdi panagayatna kaniak no kasta. Ta no awan, apay, nabayag koman, a, nga impulongnak tapno mapapanawak iti balayda wenno pagsardengendak koma da tatang. Kaasiannak la ketdi. Kaasi nga ammok a kanaig ti ayat. Kasano ket adda met bassit langak. Awan la dagiti taramidong a naibatekbatek iti rupak, a, ket makaabot, aya, daydiay a Romeo iti kinataer.
KLASIKO A SARITA: Saan a Kasla Idin, Gayyem (2)
Agsipud ta awan lat’ maurayko a subalitna, nakapanunotak iti maysa a panglakagan. Malas laengen no di kumagat dagiti istrok a mabasbasak iti Bannawag.
Gimmatangak iti derosas a papel a linen. Kalpasanna, napanak iti yan ti maysa a gayyemko. Kiniddawko ti panangyallatiwna iti insaganak a surat iti papel. Agtungpal kaniak ti surat. Aggapu iti maysa nga agnagan iti Talie idiay Project 4, Quezon City.
ALDAW ti Domingo. Ninamnamak a sumangpet ti surat nga imbusonko. Binitbitibitnak met ti gasat ta saan a simmurot ni Reulita ken ni mamangna a napan makitienda idiay Divisoria. Ikamkamakamna kano ti reportna. Immulog met amin dagiti kadagusanmi. Adda napan nagsine. Adda napan naki-date.
Nagin-uukradak iti librok. Pinalpaliiwko ni Reulita. Pasaray parimrimannak. Misuotannak no agsabat dagiti matami. Ngem pamrayak met a yis-isem laeng.
Saan a nagbayag, kimriing ti timbre. ‘Tay kartero daydiayen, naitanamitimko. Pinatudonko ni Reulita nga umulog tapno ilukatna ti ridaw. Idi makauli, addan surat nga ig-iggamanna. Sikakaut ti maysa nga imana iti bolsa ti torerona.
“Akinsurat?” naginsasaludsodak.
Saan a simmungbat. Inyawatna kaniak ti surat. Napanen iti tugawna.
Pinigisko ti maysa a pungto ti sobre. Kalpasanna, naginggagarakgakak a mangbasa. “Naggapu gayam ken ni Talie,” impigsak tapno mangngeg ni Reulita. “Aw-awisennak a pumasiar idiay balayda. Nabayag met ngaminen a diak napan.”
Agrungrungarong ti panangisigpitko iti surat iti kuadernok. Indissok iti tokador a nawaya a makita ni Reulita.
“Reuling,” inasitgak. Kinitanak. “No adda mangsapsapul kaniak, ibagam bassit a surotennak iti pagbiliaran dita kanto, wen,” imbilinko.
Nagtung-ed met.
Ngem saanak a napan iti pagbiliaran. Nagtaktakderak laeng iti uneg ti tienda ti Intsik. Kalpasan ti lima ngata a minuto, nagsubliak.
Induronko a siiinayad ti rikep ti ridaw. Imbagkatko pay bassit tapno di agsagirad iti basar. Kalpasanna, nagtiltil-ayak nga immuli. Idi addaak iti ngalay ti agdan, nakitak nga adda pay laeng ni Reulita iti sigud a yanna. Nakadumog. Kasla adda basbasaenna a sipapasnek. ’Tay ngata suratko daydiayen?
Kinitak ti kuadernok. Adda met ti sobre! A, nalabit a ti la surat ti innalana.
Kakaasiak la a mangtiptiped iti panagbettak ti nalaus a ragsakko. Kamaudiananna, maammuak met laengen nga ay-ayatennak!
Ngem naidukemak idi matannawagak ti surat nga ig-iggeman ni Reulita. Saan a ti suratko! Adda gayam surat nga inawatna met. Isu met laeng a sikakaut iti bolsa ti torerona itay. Imbolsana gayam tapno diak makita!
Naisursurotak a makipagbasa a siuulimek iti surat manipud iti likudanna. “Dakkel ti ayatko nga umay pumasiar dita. Ngem nainget unay ni nana. Ken kabainko pay la ti napasamak idi. Ti panangpapanawna kaniak. Anusak ti agitured. Ammok a kastaka met. Uray ket agkitkitata met sagpaminsan dita eskuelayo. Wen, gayam, inawatko ti retratom a pinaitedmo ken ni Manang Deling. Dinak pagdanagan. Napudnoak unay kenka, biagko…”—O
