Nobela ni DIONISIO S. BULONG
Naipablaak iti Bannawag, nangrugi iti Marso 11, 2013 a bilang.
(Maika-33 a Paset)
GAPU ta nasapa pay ken agsapa ti Domingo, awan pay maysa nga oras a tinarayda manipud iti balay da Tricia agingga iti Metro University iti Caloocan. Nagtugaw ti uppat-a-kadsaaran a pagadalan a napinturaan iti nakusnaw nga amarilio iti nakalawlawa a daga nga immuluan iti kanawan ti EDSA sakbay ti Monumento manipud iti Balintawak.
Timman-aw ti security guard iti guardhouse idi madlawna ti lugan ni Tricia. Idi makitana ti sticker iti sarming ti lugan, sa ket imbaba ni Tricia ti sarming iti sikiganna sa nagwagis, tinalmegan daytoy ti puraw a buton iti lamisaanna ket nagpangato ti serra ti ruangan.
Dua nga innem-a-kadsaaran a pasdek iti likudan ti akinsango ti linabsan ni Tricia sa insardengna ti kotse iti dua-kadsaaran a gym. Dimsaag ni Ella. Madama ti ensayo ti men’s basketball team iti akinkanigid a paset ti akimbaba a kadsaaran. Awan ti agaayam iti volleyball court iti akinkanawan.
“Halika,” kinuna ni Tricia idi sublienna ni Ella ket ginuyodna ti ima ti gayyemna iti agdan.
NOBELA: Apo Baboy Party-List (6)
“Naninibago na ako,” kinuna ni Ella idi makadanonda iti maikadua a kadsaaran.
Inwarasna ti panagkitana.
Kas iti baba, nabingbingay met ti maikadua a kadsaaran. Adda iti akinkanigid a paset ti boxing ring idinto a para iti weightlifting ken taekwondo iti kanawan. Kakanawanan ti fencing.
Timmaray a simmabat ni Cherrie idi makitana ta Tricia ken Ella. Agkatkatawa a nangkibin ken ni Ella a nangyasideg iti ring.
“Sabi ni Coach Manny, dalawang buwan pa lamang na nag-join ang mga iyan sa team niya,” impadamag ni Cherrie idinto nga intudona dagiti boksingera nga agbimbinnales iti jab iti ring idinto nga agbuybuya a nakadalikepkep ti coach iti maysa a suli. “Bantam daw sila. Ako, flyweight.”
Minulagatan ni Ella ni Cherrie. “Ibig mong sabihin, member ka na rin?”
“Isu ngarud a natalgedak nga agpasiar ta adda badigardko!” inkatawa ni Tricia.
Nasinga ti panagpapatangda idi agsipat ni Coach Manny. “Ano, titigan na lang?” imbugkawna. “Fight, fight! Pukpukan ang gusto ko. Kung hindi, umuwi na lang kayo at mag-make up!”
Nabainan sa dagiti boksingera ta kellaat a nagbinnalesda iti jab ken hook.
Adda di maawatan ni Ella a ganas a nangsuknor kenkuana tunggal mangngegna ti lanipak ken panalpiit dagiti glab. Ket dina napupuotan ti nagsipat ken nagdir-i.
“Sige pa, sige pa! Ilag, ganti!”
Ket nagkatawa da Tricia ken Cherrie.
Nadlaw ni Coach Manny dagiti tallo iti baba ti ring ket tinaliawna dagitoy. “Silang dalawa ba?” kinunana.
“Siya, coach,” insungo ni Cherrie ni Ella.
Kinita ti coach ti relona. “Break!” kinunana kadagiti sansanayenna.
Inikkat dagiti dua dagiti headgear-da. Nasdaaw ni Ella. Agpadada nga awan ti pagilasinan iti kinaboksingerada iti kinapintas ti rupada. Nagdalupisak lattan dagiti dua iti lona sa agkinkinnatawada a kasla awan aniamanna ti pinagpinnarigatda.
Immulog iti ring ni Coach Manny. Inyam-ammo ni Cherrie dagiti kakaduana. Miningmingan ti coach ni Ella.
“Di ba ikaw ang dating pambato ng school sa chess?” Intudona ni Ella. “Ba’t umalis ka sa team ninyo?”
“Wala lang, coach!” nagkatawa ni Ella ket kinitana ni Tricia.
“Naloloko na siya sa sabong, coach!” kinuna met ni Tricia.
“Ha?” Nagmulagat ti coach. Pinababa-pinangatona ni Ella.
“At hindi ordinaryong mananabong,” intuloy ni Tricia. “Siya ang tinaguriang reyna ng mga sabungero. Isang sikat na handler at nagkamit na ng ilang trophy sa derby!”
Sinipat ni Ella ti abaga ni Tricia. “Tsismosa!”
Minulagatan ti coach ni Ella. “Wow! Totoo? Nadidinig ko lang ang tungkol sa sabong pero di pa ako nakapasok sa sabongan. Grabe ka!” kinunana.
“At dahil mahilig siya sa sports, niyaya ko siya. Kailangan natin sa team ang isang malakas ang loob tulad niya. Ako lang ang flyweight sa team, di ba, coach?” insilpo ni Cherrie.
“Oo nga, join ka na sa amin. Ano, gusto mong i-try? Hindi ka naman isasabak agad sa ring. Turuan muna kita ng ABC ng boksing!” impasaruno ni Coach Manny.
Kinita ni Ella ni Tricia.
“Try mo!” intung-ed ni Tricia.
Immanges iti dakkel ni Ella. Kinitana ti coach. “Pag-isipan ko muna, coach,” insungbatna.
“Alam mo ang patakaran bago matanggap sa anumang sports program ng school, di ba?”
Nagtung-ed ni Ella. Ammona a masapul nga agenrol manen no kas pagarigan.
Nalagipna ti grupona, dagiti fans-na a no namin-ano a nakaraman iti pannakapaay sakbay a nadanonna ti yanna ita iti tay-ak ti pallot. No mano a kantiaw ken panangupay ti nangngegna sakbay a naragpatna ti pammigbig nga inar-arapaapen ni Mang Bianong iti no manon a dekada.
“Panunotek pay, coach,” insungbat ni Ella.
“Okey, magsabi ka lang kung kailan mo gusto mag-umpisa,” kinuna ti coach ket tinangadna dagiti boksingera a nakalupisak pay laeng iti lona. Nagsipat. “Sige, ituloy na natin!” Nagpakada kadagiti tallo ket immuli manen iti ring.
Kinita ni Ella ti relona. Agalas dosen. Nalagipna da Elmer. “Aalis na ako,” kinunana kada Tricia ken Cherrie.
“Itulodka met laeng,” kinuna ni Tricia.
Ngem nagwingiwing ni Ella. “Magtaksi na lang ako. Alam ko, hinahanap na ngayon ni Tito Ferdie ang car niya!” inkatawana
Saan a nadatngan ni Ella dagiti dadakkelna. Kuna ni Sarry a napan ti lakay ken ti baket iti supermarket ket napanunot ni Ella a mabalin inggroseria dagiti dadakkelna ti baratoda iti panagkampeonna iti derby iti Sta. Monica.
Napanunotna a nayonan ti pustana iti ilaban da Elmer ket tinurongna ti mini-farm idi makasukat. Ngem kutak ken taraok laeng ti simmungbat iti namin-ano a panangbanugbogna iti rikep ti mini-farm. Nagsapadan ket maymaysa met ti ilabanda, nakunana iti unegna. Nagsubli iti balayda ket inawaganna ni Elmer iti selpon.
“Santa Ines wenno Del Monte ti yanyo?” sinaludsodna idi sumungbat ni Elmer. “Santa Ines? Adu ti pagpilian ita? Naglugananyo? A, traysikel. Sabagay. Mayat dagiti traysikel dita highway no ikkam ida ‘ti singkuenta. O, sige. Yuraydak. Papunta na ako.”
Napanunot ni Ella nga awisen ni Johnny iti galiera isu a naglugan iti traysikel iti highway. Ngem idi makabatog iti klinika ni Johnny, nakitana nga adu ti kustomer daytoy ket pinaglayonnan ti traysikel. Sayang ti mapastrekna, nakunana iti unegna.
Saan a nakastrek ti nagluganan ni Ella iti arubayan ti Sta. Ines iti kaadu ti lugan. Nabigbig met ti agpatiket ken ti agbambantay iti ridaw ti galiera ket saandan a pinagbayad.
“Si Queen Ella pala!” kinuna ti security guard ket kasla sumalto dagiti bukel ti matana iti nagartem a panangisurotna iti panagkitana kadagiti luppo ti balasang.
“O, bakit nariyan kayo?” kinuna ni Ella idi makitana da Dex ken Jong a nakaistambay iti puesto ti sabali nga agag-agas iti manok. Kinitana ti dati a pagpapaagasanda. Nadlawna a kuskusilapan daytoy da Dex ken Jong.
“Ni Elmer?” sinaludsod ni Ella kadagiti kaduana.
“Agat-atar, boss,” insungbat ni Dex.
Simngat ni Ella iti barandilias a nangkubong kadagiti agaatar. Winayaan met dagiti miron, saan a gapu ta kayatda nga adda pagpisipisan ni Ella no di ket tapno nawaywayada a mangsirig iti balasang.
Ngem nabayag bassit sa nakita ni Ella ti nagpuestuan ni Elmer a mangsalsalikepkep pay laeng iti manokda. Kasano ngamin ket nakaad-adu ti miron iti uneg ti pagaataran uray no nakapaskin iti serkan a di mabalin a sumrek dita dagiti awan ti yatarna a manok. Nanglikaw ni Ella ket napan iti likudan ni Elmer.
“Awan pay nasirpatmo?” sinaludsod ni Ella.
“Dayta man ti kursonadak,” insungo ni Elmer ti golden nga ip-ipusen ti agtutubo iti sangona.
Kinita ni Ella ti kursonada ni Elmer. “Akaba ti bukotna,” impalagipna.
“Di bale, nataytayag met ‘toy darisayentayo. Ken puraw pay ti sakana,” inkidday ni Elmer. “Kabus no bigat!”
“E, ano kung full moon?”
“Kagaraw ti puraw ti sakana.”
Nagtung-ed ni Ella. Nagsubli iti yan da Dex. Inawisna dagitoy a mapan iti restaurant ti galiera ngem kinunada nga aggigiddandanto kada Elmer.
Apagrugi pay laeng ni Ella a mangan idi sinurot ni Jong tapno ipakaammona a nayataren ti manokda.
“Sige, ipilayon. Kumamakamakton idiay ring,” kinuna ni Ella.
Ngem uray no agdardaras, naigawid ni Ella iti restaurant gapu iti pannakitungtong dagiti bigtime kenkuana. Sa idi tumakder koman, simmango ni Bitangcol iti lamisaanna.
“O, tapos ka na? Kumuha ka ng panghimagas!” kinuna ni Bitangcol.
“Thank you po, busog na ako,” insungbat ni Ella, ngem dina pinatuloy ti timmakder.
“Matagal mo na bang gaffer si Elmer? Magaling ang batang ‘yon,” kinuna ni Bitangcol bayat ti pannanganna.
“Gaffer po ni dad, sir!” insungbat ni Ella.
Iti pilaan, timmakderen ni Elmer a nagubba iti darisayen a manokda ket naglayon iti ridaw nga agturong iti agdan ti gradas.
“Ayabam ni Ella. Batangtayon, kunam!” imbilin ni Elmer ken ni Dex.
Ubba ni Dex ti pagpasippitda, sikakarting a nagturong iti restaurant ti galiera.
Iti ringside, naibagkat ni Doro wenno Dors, ti napampandek kadagiti agabalayan, ti patongna iti panangtannawagna iti agdan idi makitana ni Elmer.
“Ne, dina kadua ni Ella, abalayan,” imbalaw ni Doro.
“Baka saanda a manok. No manokda man, imbaon latta idan ni Ella, ‘balayan,” kinuna met ni Pons wenno Ponso, ti nataytayag.
Impapainayad ni Doro ti nagtugaw a nakamusiig. Nadlaw ti abalayanna ti langa daytoy.
“’Pay, ‘balayan?”
“Awan ganasko a pumusta, abalayan.”
“Gapu ta awan daydiay seksi nga ubing?” insutil ni Ponso.
“Suerte ngamin isuna, abalayan!”
Iti restaurant, nalpasen ni Bitangcol. “Magkano ang gusto mo kung pumayag si Elmer na maging gaffer ko?” pagammuan la ta kinuna ni Bitangcol.
Nasdaaw ni Ella. Napunas ti isemna. Kasta ti panagbilibda ken ni Elmer kas labahero? Ngem sakbay a makasungbat, dimteng ni Dex. Ammo lattan ni Ella ti ranta ni Dex.
“Excuse me po, sir! Bibitiwan ko ang manok namin!” impakadana a bulonna a timmakder.
“Sabihin mo lang kung magkano ang gusto mo, anak!” impakamakam ni Bitangcol ngem saanen a nasungbatan ni Ella iti panagdardarasna.
Addan ni Elmer ti puesto ti Wala. Naikasa metten ti kasador ti parada ti Meron. Ket pudno, natamnay ti rikna ni Doro iti manok ni Elmer ket pimmago iti dua ribu.
Simmublat a nagsiim iti kapinnustana ti nakutkuttong. Lima gasut laeng ti impustana.
“Ne, nagbassiten, abalayan!” indillaw ti napampandek.
“Diak unay kursonada ti gold, ’balayan,” insungbat ti nakutkuttong.
Ngem pagammuan la ta rimsua ti anabaab, sa sultip ken sipsipat. Iti nagtugawanda, kasla adda nangiduron iti patong ti naluklukmeg kadagiti agabalayan ken rimkuas.
“Ni Ella, abalayan! Adda gayam ni Ella!”
“Ha? Ania koma no adda ni Ella, ‘balayan!” imlek met ti nakutkuttong a pangsutilna kampay idi iti abalayanna. Ngem nairutanna met ti petpetna iti pasamano ti tugawna idinto ta kasla tuktukoden dagiti sumilsileng a matana ti lennek a puseg ni Ella.
Ngem kasla awan nangngeg ti napampandek. Impalawlawna ti panagkitana. Pinatademna ti panagdengngegna tapno pilienna ti kapintasan nga awag.
“Pu-siyam! Pu-siyam!”
“Jisss! Jisss!”
Idi awan ti maala dagiti liamadista a pusta, immuneg ti awag. Ket idi aglabbet ti awag a sampu-anim, winagisan a dagus ti napampandek ti kaasitgan kenkuana a liamadista. Dua pay a liamadista ti sineniasanna sa nagtugaw. Isu pay laeng ti kasla pannakariing ti nakutkuttong.
“’Balayan, pimmustaka itay ‘ti dua ribu ‘ti Meron!” impalagip ti nakutkuttong.
Kasla nasinit ti patong ti napampandek ket rimkuas manen iti nagtugawanna. “Wen, gayam!” kinunana sa nagtalangkiaw
Uray no mapaspasugkian no dadduma ti nakutkuttong iti kinarasaw ti abalayanna, naasian met la iti daytoy ket inwarasna met ti panagkitana.
“Adda’diay, ne!” intudo ni Pons ti kalikudan a tugaw iti ballasiw ti ring. Tumangtangad ti lumakay iti bleacher a mangyaw-awag iti pustana.
“Hoy! Hoyyy! ‘La na tayo!” Impukkaw ni Doro nga agkompas ti tudo ken payapayna. “Hoy, ‘la na tayo!”
Ngem nalmes ti riaw ni Doro kadagiti agsasallupang nga awag ken palakpak dagiti liamadista.
Agraeden ni Doro iti kapupukkaw iti immuna a kinapinnustana. Nauma metten a makipagririaw ni Ponso ket uray la mabennat ti tengngedna iti panagtilmonna ta namagaan ti karabukobna.
Nagakar-akar ti kinapinnusta ni Doro iti panagbirokna iti kapinnustana. Sa idi kuan, saannan a makita daytoy.
“Bagasmo, ket bagasmonto manen, animal!” inngariet laengen ni Doro ket nagtugawen daytoy. “Diak la ketdi ited ti kuartak no abakennak, laglag!”
Iti ring, nalpasen ti pasippit da Ella ken Elmer. Iti puesto ti Meron, nakapanawen ti nagpasippit.
“Am-ammok ti akinmanok iti kalaban,” kinuna ni Elmer. “Bigtime a taga-Bahay Toro. Bin-ig a gold ti manokna. Flyer-da. Idissom lattan iti labes ti uged ti manokmo!”
Nagtung-ed ni Ella.
Nagsenias met ti sentensiador tapno umulogen dagiti awan bibiangna iti gradas.
“Okey, good luck!” kinuna ni Elmer ket tinurongnan ti agdan.
Immuna a pinunasan ti sentensiador ti Meron. Kas iti sigud, inuray ni Ella ti sentensiador a mangikkat iti baina ti tadi ti manokna.
Nagsultip ti timer. Nagdeppa met ti sentensiador iti nagbaetan dagiti agibbet. Limteng ti ulimek. Isu pay la ti pannakakita ni Doro iti kinapinnustana iti ragup dagiti agtiltil-ay iti tukad ti agdan a mangtantannawag kadagiti naibbatanen a manok.
“Hoy, ‘la na tayo! La na tayo!” inriaw ni Doro ket nagduaanna ti nagsenias.
Ngem nalmes ti riaw ni Doro iti riaw ken palagapag dagiti tao idi tumayab dagiti manok.
“Patay!” nakuna ni Ella idi nadlawna a nangatngato ti tayab ti gold ngem ti darisayen.
“Dikdikin mo, bebe!” inriaw ti nagibbet iti gold.
Ngem nakagin-awa ni Ella idi bimmaba ti manokna idi dina maabotan ti kalabanna. Limmukay met ti panaganges ni Elmer nga agtiltil-ay iti agdan idinto a di pay agkirem da Dex ken Jong iti ringside.
Nagpanerper dagiti payak ti gold iti panagampayagna a mangbatog iti darisayen. Ngem tangtangaden ti darisayen ti kalabanna ket siaalisto a naglisi idi tupakan ti gold sa nagsanud a kuti a kuti ti ulona.
“Ganyan, baby! Tanang, baby!” inraed met ni Ella nga agsipsipat.
Inistreyt ti gold ti darisayen. Naglisi manen ti darisayen. Idi agbuelta ti gold, kunam la no agpedpedal ti darisayen a nangkaradap a nangballasiw iti kalabanna. Ket kunam la no nasigkatan ti ngiwat dagiti liamadista idinto ta nagriaw ken nagpalagapag dagiti dehadista idi naburang-it ti gold a bulonna a nagkuripaspas.
Agkatkatawa ni Ella a nangitayag iti kanawan nga imana sa gagangay laeng ti pagnana nga immasideg iti sentensiador tapno awatenna ti manokna. Iti puesto ti Meron, tumanupra ti nagibbet, impalladawna ti baina iti nakapasagan ti manokna, sa nakapapait ti isemna a nagturong iti agdan. Winagisan met ni Ella dagiti mangidirdir-i kenkuana iti bleacher imbes nga ag-flying kiss ken agkurno pay. Inyawatna ti manokda ken ni Elmer ket immunan iti agdan.
Iti ringside, pumpumgaak ni Doro a nangsippaw kadagiti naibato nga inabakna. Ngem idi ibolsanan ti kuartana, kellaat a nagparang iti sanguananna ti immuna a kinapinnustana.
“’Tay,” kinuna ti kinapinnustana ket intayana ti dakulapna.
Minulagatan ni Doro ti kinapinnustana. “Gago ka pala, eh! Di ba binabawi ko kanina pero di mo ako pinapansin? Singirem ti angin, lokdit!”
Kinemkem ti kinapinnustana ti sangina sa siaalisto a timmallikud. Ket nakigtot dagiti agabalayan idi sabten ida ti kinapinnusta ni Doro ken dua nga agruprupa a butangero a tao ti galiera iti ridaw ti ringside.
(Maituloyto)
Napalabas: 1 | 2 | 3 | 4 | 5 | 6 | 7 | 8 | 9 | 10 | 11 | 12 | 13 | 14 | 15 | 16 | 17 | 18 | 19 | 20 | 21 | 22 | 23 | 24 | 25 | 26 | 27 | 28 | 29 | 30 | 31 | 32
Magatang ti Bannawag kadagiti sukiyo nga aglaklako iti pagiwarnak ken magasin.
Para iti subskripsion, ag-email iti [email protected]. Para iti dadduma pay a detalye, kontaken ti Circulation Department iti 8527-8121 Loc. 369, wenno iti CP No. 09567620852.
Mabalin pay a magatang ti Bannawag iti
Shopee: http://bit.ly/Bannawag-Shopee
Lazada: http://bit.ly/Bannawag-Lazada
Para iti digital a kopia:
PressReader: http://bit.ly/3n83kNQ
Magzter: http://bit.ly/407pazG
Para kadagiti kompleto a sarita, nobela, daniw, salaysay ken dadduma pay, bisitaen ti opisial a website ti Bannawag iti https://bannawag.ph
Laglagipenyo koma met, kakailian, nga ag-join/i-follow (ka)dagiti official a social media account/page/group ti Bannawag,
iti Instagram: https://www.instagram.com/bannawagmagazine
iti Twitter: https://twitter.com/BannawagMagasin
Facebook Page: https://www.facebook.com/BannawagMagasin
Facebook Public Group: https://www.facebook.com/groups/bannawag.magazine
Dios ti agngina.
Isip pabaknangen, Bannawag ti basaen!
