Nobela ni DIONISIO S. BULONG
Naipablaak iti Bannawag, nangrugi iti Marso 11, 2013 a bilang.
(Maika-35 a Paset)
NAGALARMA ti relo iti headboard ti katreda ket nakapuot ni Manang Mameng. Ni Ella ti immuna a napanunotna ket nabaringkuas.
Nagareng-eng met ni Mang Bianong idinto a nagsikig. ”Alas kuatro pay la dayta, apay a bimmangonkan?” kinunana iti asawana.
“’Diay anakmo. Asugenna ti abaga ken takiagna idi rabii. Limmitem iti uray la nga!” insungbat ni Manang Mameng.
“Natural, nabugbog lang. Agpukawto met laeng.”
NOBELA: Apo Baboy Party-List (6)
“Hmmm, awan pay panangisakitmo ‘ta anakmo.” Nagwagteng ni Manang Mameng. “’Nak sapsapuan ‘ti lana ken gas a nangyuperak iti nataltal a laya idi sardam. Dimo payen napuotan. Ania ngarud ket pati tagtagainepmo, ti manokmo a nangabak ti tantanawtawem!” Dimsaag iti katre ket innalana ti bassit a malukong a yan ti pangsapsapona ken ni Ella.
Saanen a simmungbat ni Mang Bianong tapno sumardengen ni Manang Mameng.
Ngem nasdaaw ni Manang Mameng idi dagdagus a linuktan ni Ella ti ridawna idi agtoktok. Ken saan laeng a basta nakariing, nakadigos payen ti balasang a kas paneknekan ti tapungorna a tualia ken suotna a roba.
“Bakit, mom?” Naganaygay ti timek ni Ella idinto a kitkitaenna ti malukong nga iggem ti inana. “Ano yan?”
Imbes a sumungbat, kinita ketdi ti baket dagiti takiag ken abaga ti anakna. Ad-adda a limmitem dagiti natamaan iti glab, ngem awanen ti labaga dagitoy. “Nagdigoska a nasapa, baka malamiisan. Halika!” Ginuyodna ti anakna nga inturong iti katre.
Masmasdaaw ni Ella a nagtugaw iti iking ti katrena. “Bakit, mom?”
“Ilutek dagiti nabugbog,” insungbat ti baket. Kinawkawna ti malukong. Ngem naglisi ni Ella idi aprosanna koman ti abaga daytoy.
“Yak! Ang baho. Mawawala din ito, mom!”
“Agas daytoy. Kastoy ti pangil-ilut daydi lolam kadakami. Agtalnaka ta ilutenka!”
Ngem immadayo ketdi ni Ella. “Luya ‘yan, a. Ano ako, tinolang manok? Hi-hi-hi!”
Ket saan a napilit ni Manang Mameng ni Ella. Immanges laengen iti dakkel sa rimmuar iti siled ti balasangna.
Agkapkapen ni Mang Bianong idi makababa.
“O, anong nangyari?” impasabat ni Mang Bianong.
Nagmisuot ni Manang Mameng. Kinitana ni Sary nga aglutluto. “Mangtemplaka man ‘ti kapek, Sary,” kinunana ketdi.
“Nakariingen?” inulit ni Mang Bianong ti nagsaludsod.
“Wen. Dina kayat ti agpailut. Dagitoy nga ubbing, gapu ta nakaadaldan didan patpatien dagiti pinagag-agastayo idi ubbingtayo!” insungbat ni Manang Mameng.
“Bay-amon. Adda siguro bukodna nga agas,” kinuna laengen ni Mang Bianong.
Nakapamigatdan idi aguni ti selpon ni Ella. Kinita ti balasang ti umaw-awag. Ni Elmer.
“O, Elmer, apay? A, ti derby dita Kaybiga? Ituloytayo ti lumaban? Hmmm…” Kinita ni Ella dagiti dadakkelna. “Oo, sinabi ko na sa sponsor na sasali tayo pero depende sa time ko at kondisyon ng mga manok natin. Sige, pupunta ako riyan.”
Imbolsa ni Ella ti selponna sa nagturong iti ridaw.
“Manok manen,” insennaay ni Manang Mameng. Immasideg iti maysa a kabinet iti kosina ket inruarna ti guantesna tapno yaw-awanna kadagiti orkidiana ti uppapayna.
Agkapkape da Elmer ken Dex a nadatngan ni Ella iti sagpatan ti kalapaw. Adda botelia ti empe a hayskul wenno maysa a litro ti laonna iti nagbaetanda ket ammo lattan ni Ella a temtemplaan manen dagiti dua iti brandy ti kapeda.
“Nasaan ang mga panlaban natin?” kinuna ni Ella.
“Dagitada, boss!” Intudo ni Dex dagiti darisayen iti nagaabay nga scratch pen iti kanawan ti kalapawna. Nasaranta ti bosesna ngem nakalanlanay dagiti matana ken kasla nakapigpigket ti kiremna.
“Kayatko a makita ti garawda,” kinuna ni Ella.
“Alaem ‘diay di nagsugat a manok ni Boss Bianong,” intung-ed ni Elmer ken ni Dex. “Pudno kadi ti impadamag ni Boss Bianong?”
“Ania ti kuna ni dad?”
“Agboksingkay' kano. Kas—“ Saan a naituloy ni Dex ta dandani naidugmam ta kasla nakadagdagsen ti sandaliana iti yaaddangna.
Nagkatawa laeng ni Ella. “Naggapu amin iti Derriyab Farm dagitoy, saan?”
“Wen, boss, hik!” Nagsaiddek ni Dex.
Nagpinnasikad da Elmer ken Dex. Kalpasanna, nagsanud ni Elmer iti agtallo a metro.
Nagpanerper dagiti payak ti darisayen iti irarasukna. Simmurot met ti billiten ni Mang Bianong ket nagkinnapetda iti aire.
Nagtungtung-ed ni Ella.
Intuloy dagiti manok ti nagkinnulipagpag idi agdissoda. Dinagdagus da Elmer ken Dex a pinagsina dagiti manok.
Innala ni Elmer ti dakdakkel a darisayen. Nangala met ni Dex iti patubo ni Mang Bianong a kapolis ti darisayen.
“Nagdakkelanen!” kinuna ni Ella.
“Ngem nalag-an,” insilpo ni Elmer. “Dakkel a bentahetayo ta timbang met ti aglaban.”
Sabali ti estilo ti maikadua. Agur-uray. Urayenna nga agkuti ti kalabanna. Idi ballasiwen ti kapolisna, sinarunona a dagus ket tinaragatagna ti bukot daytoy.
Ti kinapartak ti saguday ti maikatlo. Naminsan la a binallasiw ti kapolisna, sinarunona a dagus sa rinapidona. Agkatkatawa da Dex ken Elmer a namagsina kadagiti manok sa naginnapirda.
“Mas superior dagitoy ngem dagiti immuna a naggapu iti Derrriyab!” kinuna ni Dex.
“Dakkel ngamin a propaganda para iti Derriyab Farm,” kinuna met ni Elmer. “Kuna ti nagideliber nga immadu ti naggatang kadakuada kalpasan dagiti nagsasaruno a panangabaktayo!”
“Pandiin, boss. Idakdakkelmo ti paradam!” kinuna met ni Dex.
Ngem namaga laeng a katawa ti insungbat ni Ella. Kalpasanna, kimmaut iti bolsa ti shorts-na iti kuarta ket inyawatna ken ni Dex. “Para kanen ken bitaminada. ‘Tay LM dimo liplipatan,” imbilinna ket timmallikuden.
Nakaruaren ni Ella iti gate idi agkinnita da Dex ken Elmer.
“Apay a kasla di maragsakan iti impakita dagiti manok? Kasta unay ti sipsipatna kadagiti immuna a manoktayo. Ita a panigurado dagiti manoktayo, parang bale wala sa kanya!”
Nadlaw met dayta ni Elmer. “Nairuamen, a, isu a kasla awanen aniamanna kenkuana ti impakita dagiti manoktayo. Sabagay, ti met resulta ti laban ti mangipaneknek iti kinalaing ken kinadagmel ti manok,” kinunana laengen. Tinengngedna ti empe sa binukbokanna ti tasana. Kalpasanna, imbukbokna ti nabati ti tasa ni Dex. “Mangalaka pay. Bitin!” kinunana.
Iti Quirino Highway, maymaysa pay ti kustomer ni Johnny, ala, ket nalabesen nga alas nuebe. No kastoy laeng, kumautto manen iti urnongna iti pangpunnona iti pagabangna iti puestona.
Nagpusot iti tugawna iti likudan ti lamisaanna. Sakbay a nagkidem, kinitana manen ti selponna. Iti ridaw, timtimpagen ti para dalusna ti pagpigadan.
“Papasukin mo lang kung may kustomer. Kumidemak laeng biit,” imbilinna.
“Yes, sir!” insungbat met ti para dalus. “Teka, sir, apay a kanayon a kitaenyo ti selponyo ket awan met ti un-unina? No naka-silent, agtigerger met no kua dita bolsayo!”
Kasla nasukit ti ipel ni Johnny. “He! Pakialamera!” indil-ag ni Johnny. “Isu siguro a nasapaka a nabalo ta natay ti asawam iti konsomision kenka!”
“Namatay sa sarap ng pagmamahal ko, sir!” imbales met ti para dalus nga aggargarikgik.
Ngem saanen a nagtimtimek ni Johnny. Ta ania koma ti maalana no tutopanna ti katulonganna? Ket nagkidem. Kasano ngamin a dina kitaen ti selponna ket amangan laeng no adda awag wenno teks ni Ella a dina nadlaw.
Apay ngata, nagindurog iti muging ni Johnny. Dati, dinominggo nga awagan ni Ella tapno iluganna ida a mapan makigaliera. No saan a galiera ti papananda, kaduaenna ti balasang nga agatendar iti birthday ken sabsabali pay a pasken. Wenno saanen a kasapulan ni Ella? Wenno addan nobiona? Ket adda apges a narikna ni Johnny iti barukongna. Kasano ngamin ket iti baet ti no namin-anon a panangyam-ammo ti balasang a kas boyfriend daytoy dina man la maitured nga ibuksilan ti manggurgurigor a riknana iti daytoy. Umanay lattan a mangpatpatangken iti riknana ti pammatina a saan nga aramiden ni Ella dayta no awan ti kasta a mariknana.
Kasanon no awan? Kimmutukot ketdin dayta a sutil a panunot iti mugingna. Apay ngamin a mabain la unayen a mangibaga, uray pasagid la koma, iti riknana ken ni Ella? Nalagipna la ket ngarud ti kantiaw ti amana idi barito pay, no sumangpet a nagistambay iti sango ti tianggi iti nagkurosan. Ania, nakanobiaka met laengen, barok? saludsoden no kua idi ti amana. No mabainak nga agarem, ama, no isungbatna, agpugtit ti lakay sa kunana: matayka iti uneg ti kinurdonam, lokdit, no agbaimbainka!
Nagkulagtit ni Johnny idi agkiriring ti telepono iti rabaw ti lamisaanna. Ngem sakbay a maiggamanna ti telepono, nabagkaten ti katulonganna.
“Yah, da clinic of Mister Johnny, ma’am. O, yah, his head is beri hot agen, ma’am! Matandang binata na ka—“
“Hoy!” Sinibbarut ni Johnny ti telepono. “Talanggutang, pakialamera!”
“Ni sir met! Itedko met a talaga kadakayo, hi-hi-hi!” Nagsanud ti nakigtot a para dalus ket sinublianna ti pinanawanna nga obrana.
“Hellow, good morning! Ella, ikaw pala!” Kasla inaplawan ti pul-oy ti parbangon ti Disiembre ni Johnny idi mabigbigna ti boses ni Ella. “Anong balita? Kunak no nalipatamon ‘toy boyfriend-mo!” inturtured ni Johnny nga inyangaw. “A-ania, masapulmo ngamin ti lugan?” Nalpay ti abaga ni Johnny. Nagtilmon ta kasla nagmaga ti ngadasna. “Wen, umayakon. A, inton Sunday? Okey, leppas pangngaldaw no Sunday ngarud. Babay!” Saanna nga imbaba a dagus amangan no adda ibaga ni Ella a mangparagsak iti aldawna. Ngem nagsennaay idi dagus nga imbaba ti balasang ti telepono. Ania ngarud, intuloyna nga inungtan ti para dalusna.
“BUMILI ka ng apat na kilong letson Cebu diyan sa Mindanao Avenue, dad. Dalawang pot na kare-kare sa Sotelo Kitchenette, dalawang inihaw na hito, at gumawa ka ng baked tahong na malalaki. Bili na rin kayo ng isang Alfonso na may taynga, at isang case na coke!” kinuna ni Ella ket inyawatna ti budget-na ket ni Mang Bianong.
Nagnganga ni Mang Bianong. “’Sino ti ag-birthday? Kalleppas ken ni mommy-m, inton January pay met kaniak,” kinunana.
Ngem kasla awan nangngeg ni Ella. Kinitana dagiti kaduana iti kotse sa sinangona ni Manang Mameng. “Diyo ipangpangngeg kenkuana,” kinunana iti nakapsut a timek. “Mom, kaya mo pa bang gumawa ng paella, ‘yong sinaing na may malagkit at halaan at may kulay, at ang specialty mo na igado?” Inyawatna met ti budget ken ni Manang Mameng.
Ad-addan ti siddaaw ti lakay ken ti baket
“Apay, nakkong?” sinaludsod latta ni Mang Bianong.
Kellaat met nga adda naggilap iti muging ni Manang Mameng ket kasla immilet ti aangsanna. Yad-adayom, apo, nakunana iti unegna idinto ta tinaldiapanna ni Johnny a kasta unay ti rungiitna iti sango ti manibela. Kumitkita met kadakuada da Elmer, Jong, ken Dex iti akinlikud a tugaw.
“Basta!” inkatawa ni Ella. “Pagsasanguantayonto no sumangpetkami!”
“Baka parbangonton no malpas ti derby. ‘Naknakanmo, aya?”
”Ag-blowout-kan no dimo pay ammo no mangabakka?” kinuna met ni Manang Mameng.
“Masapa a malpas, dad,” insungbat ni Ella iti amana. “Thirty five la gayam ti entry ta aggiddanda dita Santa Monica. Mangrugi iti alas tres. Baka alas dies laeng malpasen.”
“Apay ngarud nga ituloyda pay laeng?”
“Dida kayat a madadael ti rupada, dad. Isu a tantiaenyo ti panagisaganayo. Sabagay, awagankayonto,” kinuna ni Ella. Pinagsinnublatna a binisong dagiti dadakkelna.
“Aniaka la ketdin, aya. Shorts la ngaruden, linislismo pay la ti gayadanna. Sa dayta blouse-mo, makitkita ‘ta pusegmo!” indillaw ni Manang Mameng idi tumallikud ni Ella.
Nagkatawa laeng ti balasang. Bumerde a shorts ken umamarilio a blusa ti suotna. Nagpayapay idi lumuganen iti kotse. “Bye, dad! Bye, mommy!”
Agpadpada nga immanges iti dakkel ti lakay ken ti baket idi mailingeden ti kotse ni Johnny iti nagkurosan ti Karpa St. ken Kitang St.
“Ania, aya, ti mapampanunot ‘ta anakmo?” kinuna ni Manang Mameng idinto ta tinurongna ti ridaw. “Ag-blowout a di pay nangrugi ti labanna?”
Nagwingiwing met ni Mang Bianong. “Diak ammo, talaga a diak ammo, inada,” kinunana ket sinarunonan ti asawana.
Maysa nga oras ket kagudua laeng, timpuardan iti Gen. Luis, ti kalsada a namagkamang iti sentro ti Novaliches ken Malinta a lumabas iti Kaybiga Cockpit Arena. Daytoy ti maysa kadagiti kadakkelan ken kapigsaan a galiera iti Metro Manila. Dua ti gradasna. Ngem sa la mausar ti basbassit a gradas iti aldaw ti Domingo ken special nga aldaw.
Napunnon ti paradaan iti sango ti galiera isu nga insapul ni Johnny ti luganna iti mabalinna a pangiparadaan iti ruar ti gate ngem asideg iti guardhouse.
Nagsaggaysaan da Dex ken Jong dagiti karton a naglaon kadagiti ilabanda ken ti para pasippitda. Bitbit met da Elmer ken Johnny dagiti balonda nga scratch pen, dagiti pagabungotda iti kulongan ken dadduma pay a kasapulanda. Ababan ti pila ta nangrugi ti panagpatimbang ken panagpalista iti ala una.
Kas kadagiti nagtengdan a galiera, natiritir ti tengnged dagiti adda iti pila idinto ta nagtil-ay dagiti miron idi makitada ni Ella. Ngem nairuamen ni Ella kadagiti nadumaduma a klase ti ikikita pati bastos a pasagid dagiti lallaki kenkuana.
“Pangalan ng entry?” kinuna ti lakay nga agilislista idinto ta kasla aginaw a mangmulmulengleng kadagiti luppo ni Ella.
“Queen Ella, boss!” insungbat ni Elmer.
Ad-addan a nabennat ti tengnged ken ngimmato ti til-ay dagiti tao a nangtannawag ken ni Ella.
“Siya pala!”
“Totoo pala ang ibinibida nila. A la Megan!”
“Naku! Kahit mamatay na ako bukas!
“Paputukan man ako ng kanyon!”
Ket nagkinni la ket ngarud ni Ella idi sumrekdan iti pasdek ti galiera. Kunam pay, kinamat dagiti tilmon ken mangal-alunos nga ikikita dagiti pinanawanda iti pilaan.
Sabali ti estilo ti Kaybiga iti panagaramidna iti cockhouse. Kada cockhouse, adda bukodna a balay. Nawaya ken naisina iti pasdek ti galiera. Ti maysa kadagiti bakante a cockhouse iti dayaen ti bassit a gradas ti pinili ni Elmer. Nalawa daytoy ta para innem ti kulongan iti unegna. Adda pay atiddog a bangko iti uneg.
“Adayon ti numerotayo,” kinuna ni Elmer idi maipisokda dagiti manokda iti scratch pen. “Alas saisto ngatan ti umuna.”
“Di bale. Alisto la ket ti soltada,” kinuna met ni Ella. “Tay LM dimo liplipatan,” kinuna ken ni Dex.
“Olwes redi, boss!” Pinatangad ni Dex ti tanganna.
“Mabayag pay ti umuna a laban. Intay' agbuya. Ngem sinnublat tapno adda latta mabati nga agbantay. Adda kandado, ngem narigaten,” kinuna ni Elmer.
Ni Jong ti umuna nga agbantay. Napan da Ella ken Johnny iti ringside, immuli met da Elmer ken Dex iti bleacher.
“Wow!” nayesngaw ni Dex idi makatugaw ken maiwarasna ti panagkitana. “Nagpipintas gayam dagiti tindera ditoy!”
Nagkatawa ni Elmer. “Masapul a napintasda tapno makalakoda!” kinunana. “Kayatmo ti gumatang?” Kiniddayanna ni Dex.
“Diak mabisin,” insungbat ni Dex. Kimmita iti kanigidna. “Ket dagita? Awan met ti lakoda,” kinunana kadagiti agtutubo a naka-shorts a nakasikkawil.
“Tindera met dagita.”
“Nagseseksida, kaykayatda ti agtindera iti galiera ngem ti ag-saleslady? Mano met laengen ti malakuanda ket nagaduda?”
“Dakdakkel ti maganarda ditoy ngem ti sueldoda kas saleslady, baka ‘kala mo!” inyellek ni Elmer. “Kayatmo ti gumatang?”
Nagngilangil ni Dex.
Tanga, inyellek laengen ti uneg ni Elmer. Isu met a maibbatan dagiti sumaruno nga aglaban.
Husto ti pattapatta ni Elmer. Nalabesen nga alas sais idi malpas ti maikapat a soltada a sarunuen ti umuna a labanda.
“Mapanta tadianen ti manok,” kinunana a bulonna a timmakder.
Iti ringside, timmakder metten da Ella ken Johnny.
(Maigibusto)
Napalabas: 1 | 2 | 3 | 4 | 5 | 6 | 7 | 8 | 9 | 10 | 11 | 12 | 13 | 14 | 15 | 16 | 17 | 18 | 19 | 20 | 21 | 22 | 23 | 24 | 25 | 26 | 27 | 28 | 29 | 30 | 31 | 32 | 33 | 34
Magatang ti Bannawag kadagiti sukiyo nga aglaklako iti pagiwarnak ken magasin.
Para iti subskripsion, ag-email iti [email protected]. Para iti dadduma pay a detalye, kontaken ti Circulation Department iti 8527-8121 Loc. 369, wenno iti CP No. 09567620852.
Mabalin pay a magatang ti Bannawag iti
Shopee: http://bit.ly/Bannawag-Shopee
Lazada: http://bit.ly/Bannawag-Lazada
Para iti digital a kopia:
PressReader: http://bit.ly/3n83kNQ
Magzter: http://bit.ly/407pazG
Para kadagiti kompleto a sarita, nobela, daniw, salaysay ken dadduma pay, bisitaen ti opisial a website ti Bannawag iti https://bannawag.ph
Laglagipenyo koma met, kakailian, nga ag-join/i-follow (ka)dagiti official a social media account/page/group ti Bannawag,
iti Instagram: https://www.instagram.com/bannawagmagazine
iti Twitter: https://twitter.com/BannawagMagasin
Facebook Page: https://www.facebook.com/BannawagMagasin
Facebook Public Group: https://www.facebook.com/groups/bannawag.magazine
Dios ti agngina.
Isip pabaknangen, Bannawag ti basaen!
