(Tuloyna)
ALLON TI BIAG: Walo A Dekada A Panagdaliasat (36)
NAMITLO A NAGSUBLISUBLIAK iti Salt Lake City. Maikadua idi indauluak ti grupo dagiti Ilokano a nangkorihir kadagidi patarus iti Iluko dagiti Temple Ordinances, sa idi napusgankami a mangirekord. Agpada nga iti Church Office Building.
Iti naminsan a panagtantan-awko iti tawa ti DoubleTree Suite a nagtarusanmi, ket buybuyaek ti aglawlaw iti amianan a plasa ti hotel, adda nabukelko salaysay. Ngem kapatgan ti yaapay ti panggep a mangsurat iti maysa a nobela. Dita a hotel ti nakainawan ti balabala ti "Adtoy, Siak, ni Jesucristo: Dramaturgo/Behold, I Am, Jesus Crisostomo: Playwright" a nangabak iti maikadua a gunggona iti pasalip ti nobela ti ETTI.
Tunggal umayak idi ditoy Utah, dumagasak latta idiay Mecca, California, a yan ni Marilou a kasinsinko.
Nalipatak gayam, nga iti daydi damo a yaayko, kinunana:
“Hangka nga agaw-awiden, manong. Dakami ti makaammo kenka ditoy. Ideborsiom ni manang ta mangasawaka iti sabali, kampay idi, tapno makaalaka laeng iti papelmo. Sakayonto met la agsinnublian, a.”
Impagpagarupna ngata a kasta la ti kalaka a maallukoy ti riknak.
Dina la ammo a kapatgan kaniak ti pamiliak. Iti ababa a pannao, diak immannugot iti singasingna.
Iti naudi a pannakaibaonko iti Salt Lake, inawagak daydi Manong Severino L. Lazo nga adda idi idiay Torrance, California.
Kinunana:
“No kayatmonto ti agsubli, awagannak latta ta tulongankanto a sumrek iti trabahom ditoy.”
Naiparparna ta daydi met a panagawidko ti pannangted kaniak ni Marilou iti sangaribu a doliar.
“Idepositom idiay Manila, manong, ta isunto ti gastuenmi no umaykami agbakasion,” kinunana.
Nagsisinnalig iti mugingko ti panggepko nga aramiden. Agsubliak a mangisuro? Ngem kinuna dagidi nagaplikarak: Sorry, sir, you’re over qualified! Dida pay la imparupa a lakayakon! Agsubliak iti Filipilniana Section? Iti Saudi? Iti UP Manila?
Nalagipko ti singasing daydi Manong Verin Lazo.
Nalagipko ti bisak: Multiple indefinite visa.
“Innak sa ketdi idiay California,” inkuldingko ken ni Sinamar.
“Rummuarka manen?” agkatangkatang ti sungbatna. “Uppat a tawen a naipusingka kadagita annakmo... amangan no malipatandakanton.”
“Saan koman, a, ngem kasano ngarud daytoy balayen?”
Nagsubli ti lagipko iti adayon a napalabas.
Nadamag kano naminsan ni Jojo ken ni kaaingungot: “Ma, apay a kanayon nga awan ni Papa?” Kadakuada nga agkakabsat, isu ti nakadennak iti kaababaan a panawen.
Isu ketdi ti nakabatian ti natingra a lagipko.
Agsubliak iti maysa a pasamak...
Iti a panangsukonko ken ni Jojo idiay Burgos Elementary School a pagbasbasaanna iti naminsan a panagbakasionko, imbisikletak iti daydi daan a racer a nagatangko idiay Dhahran Main Camp. Idi makadanonkami idiay balay, idiay Pinatubo, kasla bumtak ti pus-ongko. Imbes nga ikamangko pay iti pagpaknian idiay uneg ti balay, nagtarusakon iti igid ti pader iti abagatan, ket sinangok ti dakkel a puon ti kaimito. Apagisu a nalpasak idi pagammuan lattan ta nariknak ti rimmasuk a bara a kimmamang iti ulok ket nagsipnget ti panagkitak.
“’Pa, ano’ng ginagawa ny’o?” nagsubli ti riknak iti nangngegko a madanagan a timek ni Jojo a nagtakder iti abayko. Umarikiak dagidi pato ken itik a nanglawlaw kaniak.
“Naulawak metten...”
Natan-awannak kano iti tawa gapu iti arikiak dagidi pato ken itik a nanglawlaw kaniak, isu a nagdardaras a rimmuar.
Pato ken itik laeng, ngem no saanda a nagariwawa tapno maawis ti imatang ni Jojo, nalabit nga awanak koma itan. Ti dakesna, in-inut a pinartida dagidi pato ken itik gapu ta dudua a pamusian laengen ti nabati kadagidi manok, sada pay agit-itlog.
Naamirisko, nga agpayso ti kuna ni kaingungot, nga amangan no didakton am-ammo dagiti annakko no pumanawak manen.
Ngem awan ti pagpiliak. Sakripisio. No diak rummuar... Wen, adda daydi nasinged a gayyemmi a mannurat, ni Fely Abril a nayasawa ken ni King Roman idiay Australia, a nangipanamnama a no kayat ni Sinamar ti mapan idiay, matulonganna uray ania nga oras. No dadduma idi, masaok iti bagik, apay a saan?
Ngem pagrebbengak kas ama a yabaga ti kaamaak.
Isu a rumbeng laeng a siak ti agsakripisio.
Inawagak ni Marilou.
“Basta ikarim a bayadam,” kinunana idi imbagak ti panggepko.
Inkeddengko a mangalaak iti driving lesson idiay Marikina sakbay nga immayak ditoy America. Malagipko ta idi ikkkandakon iti lisensia, dinamagko no kasano ti maaddaan iti International Driver’s License.
Kuna daydi taga-Land Transportation Commission nga aggagatel ti dakulapna a mapal-idan iti papel de banko: “Ay, sir, sinabi n’yo sana kaagad para naayos natin!”
Sinuratak a dagus daydi Manong Severino L. Lazo.
“Ibagam latta no kaano ti yaaymo,” insubalitna. “No addakanton idiay airport, awagannak ta umaydaka sabaten.”
Isu a nagpipinnakadakami manen iti pamiliak, a nagdakkel a saludsod ti agur-uray iti masungad a panagdaliasatko: agkikitakaminto pay ngata?
(Maituloyto)
Napalabas a paset: 1 | 2 | 3 | 4 | 5 | 6 | 7 | 8 | 9 | 10 | 11 | 12 | 13 | 14 | 15 | 16 | 17 | 18 | 19 | 20 | 21 | 22 | 23 | 24 | 25 | 26 | 27 | 28 | 29 | 30 | 31 | 33 | 34
