(Tuloyna)
ALLON TI BIAG: Walo A Dekada A Panagdaliasat (36) 1
DAKKEL TI PAKAINAIGAN ti Biernes Trese iti kaaddami iti America. Masasao a malas daytoy nga aldaw iti Filipinas. Sangkasaoda: agannadka, Biernes Trese ita! No saan, kunada, dika la koma mapmapanen, Biernes Trese ita!
Ngem iti daydi nga aldaw, diak nalaglagip ti kinamalasna. Nagturay iti panunotko iti pannakaam-ammok iti abogado nga inkarkararagko a makatulong kaniak.
Nalatak iti puseg ti Los Angeles ti Popkin, Shamir, and Golan Law Offices. Adda iti maikadua a kadsaaran ti 3250 Wilshire Blvd. Suite 1918 LA. CA 90010. Ngem no agdadamoka nga agmaneho, masapul nga adda mapa a pagsurotam tapno saanka a mayaw-awan. Saan a kas iti Utah a nalaka a suroten dagiti kalsada ta adda amin South, North, West, East iti murdong dagiti numero ti kalye.
Naragsak dagiti empleado a nangsangaili kadakami. Daydi Mrs. Alcantara a Filipina ti executive secretary ti bupete dagiti tallo nga abogado.
Agsarugaddengka no damo a mangngegmo a maysa a Hudio ni Atty. Jack Golan, ti maysa kadagiti tallo nga agsusugpon iti nasao a bupete, ta kaaw-aweng ti Golan Archipelago ti naganna. Ngem dakkel a biddut.
Daydi Atty. Golan ti napusgan a mangiggem iti kasok. Taga-Sinait, Ilocos Sur daydi Nely Tubera a sekretariana. Nabiit pay iti daydi a bupete idi maam-ammok.
Naalumamay nga agsasao daydi Atty. Golan; mariknam latta ti kinapudnona. Maawis a dagus ti panagtalekmo.
Ngem idi makapagrikusen ti saritaanmi, imbes nga agyamanak ta addan abogado a mangiggem iti kasok, nagdakkel a saludsod ken duadua ti immapay iti panunotko. Ammoyo kaniak, diak kayat ti inuulbod nga aramid. Kayatko a tungpalen a sipupuso ti katulagan nga inawatko iti Apo.
Denggenyo.
Nalaklaka kano no mangalaak iti sertipiko a nagtrabahuak idiay Filipinas iti pagtaraknan kadagiti nataengan. Ammok, nalaka ti mangala ta agkaraiwara ti agited iti ania man a peke a sertipiko idiay Quiapo; adda la ketdi pagbayadmo!
Gumatangak iti sertipiko? No way!
“Is there no other way?”
“You have to do some white lies.”
Kurangna diak makaanges kadagiti sumaganad a nagsasasruno a pasamak!
Imbaga daydi Manong Verin, a tulonganna ni Sinamar a mangala iti peke a sertipiko.
Naibilin ti panagsublimi iti abogado para iti pannakapabaro ti visak. A kaduak daydi Arturo Roxas.
Iti panaggapuk a nakimisa, impakaammo daydi Martin ti yaawag daydi Emy. Awagak kano. Imbaga ni Emy nga adda kontakda idiay Filipinas a makaaramid iti sertipiko a para iti pannakaesponsorko. Nagpapaunaak iti $250 iti sueldok a pagbayadko iti pannakapabaro ti visak.
Iti simmaruno nga aldaw, napankami iti daydi Art Roxas idiay Popkin, Shamir and Golan Law Offices para iti visak ken nambarak a nagaplay iti H-1 visa. Malaksid iti impaunak a sueldok, nakautangak pay iti $350 iti daydi Adi Roxas nga anak ni Art.
Sa kinasaritanak daydi Emy maipanggep iti panangesponsorna ken ni Sinamar.
Iti simmaruno nga aldaw, napankami idiay DMV para iti finger printing, ngem saan a natuloy ta diak naitugot ti pasaportek.
Adu ti nagsarsaritaanmi iti daydi Emy maipanggep iti pasilidad ken ti panggepna kaniak.
Immawag daydi Elmer a mangsukon koma kaniak a mapan idiay Indio, ngem awan ti panawenko a napan.
Immawag daydi Arsenio Cortes...
Napankami ken daydi Art Roxas iti DMV tapno ag-finger printing. Immutang daydi Albert iti $40 kaniak.
Iti rabii, alas otso, tinulongak daydi Emy iti opisina a nangrisut kadagiti parikut iti pasilidad. Isu ti pannakaawko iti awag daydi Gale Ard a kadua ti abogadok ket pangisusumitirennak iti resume. Binayadan daydi Albert ti utangna. Adu ti naawatko a surat a pakairamanan ti naggapu ken ni Brother Delfin. Inawagannak met daydi Manong Verin., kasta met nga inawagannak ti abogadok ket impatigmaanna ti panagannadko. Nangisaganaak iti resume ken surat para iti abogadok.
Diak ammon ti panunotek! Nakaad-adu a pasamak!
Sa manen nagsusukot ti parikut kadagiti nagsasaruno nga aldaw. Adda pay nagtubo a tukaktukak iti kanigid a pispisko. Ti la dda!
Impaw-itko ti resume iti daydi Mrs. Roxas, nga agpaay iti abogadok.
Imbaga daydi Emy nga isagana ni Sinamar dagiti dokumento a masapul iti yaayna. Iti sumuno nga aldaw, nagatendarkami iti training dagiti board and care staff idiay CPC (comprehensive primary care) Alhambra Hospital.
Iti primero ti Pebrero, immakarkami ken daydi Robby iti apartment iti laud a sikigan ti pasilidad. Napintas a lugar. Aglalaok ti paspasamak. Kas iti panagsangsangit daydi Emy nga immawag kaniak, a diak ammo no apay. Makapungpungtot daydi Emy idi immay iti pasilidad gapu ta saan a nadalus.
Nakaawatak iti surat ni Sinamar a nakaisapitan ti transcript of record-ko. Iti yaawagko iti abogadok, dinawatna ti sertipiko ti panagtrabahok. Nagpaw-itak ken ni kaingungot iti $220, a P5,346 ti sukatna. Isu met ti panangnayon daydi Emy iti sueldok. Dinamagna pay no adda mairekomendak nga agtrabaho iti pasilidad. Pinalubosannak nga umawag ken ni kainggungot ta ibagana no kayat ni Brother Delfin ti umay a dagus, a dinagdagusna met ti immawag iti alas otso media. Imbagana a sumangpet iti sumuno nga aldaw, Domingo, Pebrero 12 iti alas nuebe iti agsapa.
Nakaawatak iti awag daydi Gale Ard maipanggep iti papelesko. Imbagana a mapanak iti opisinada iti Lunes, alas onse iti bigat. Sapay koma ta dida kasapulan ti sertipikasion ti padasko a trabaho.
Iti sumuno nga aldaw, kurang ti staff. Siak ti fascility mananger, siak pay ti housekeeper. Iti Domingo, saanak a nakapan nakimisa ta kinuyogko daydi Martin a nangsabat ken ni Brother Delfin idiay LAX.
Iti ipapanko iti abogadok, saan a napintas ti damag para kaniak, ngem napintas para ken ni Sinamar. Nangrugin a dagus iti sumaruno nga aldaw.
Iti simmaruno a pannakimisak, naipakaammo a simmangpeten ti rekordko iti South Gate Ward. Naammuak a dinawatda metten ti rekord ni Sinamar ngem imbagak nga agurayda pay bassit.
Adda nagringgor a residente. Binagsol daydi Rodelio Umiga a Filipino a residente daydi Alberto Herrera. Immawagkami iti 911.
Sangkaurayko dagidi dokumento ni Sinamar ngem sabali dagiti simmangpet. Idi inawagak, imbagana a naipatulodnan idi pay Pebrero 6. Naammuak idi agangay a saan nga inted kaniak daydi Igay nga immuna a nakitami iti abay ti Mail Box idi sangsangpetko, malagipyo? Ketdi, nakitak iti basuraan iti abay ti mail box. Ammok a daydi awanan nakem nga Igay ti akin-aramid!
Ngem nakaited met iti nasaysayaat a resulta, maammuanyonto.
Sangkadawatko iti Apo ti panangtarabayna kaniak, ti pannangtedna iti kired ti pakinakemko.
Agsusukot latta ti parikut iti pasilidad, kadagiti residente. Mairaman pay ni Brother Delfin ta panggep daydi Emy nga ikkaten ket nabiit pay a simmanhgpet, segun iti daydi Gilda. Kasta met a naawatko ti sueldok, a kas met la iti sigud a $600, nga awan met ti nayonna kas iti kari daydi Emy.
Sabali manen a seminar ti inatendaranmi, ti CPR/First Aid, a nagpatingga iti alas nuebe media ti rabii.
Iti Lunes, Marso 6, 1995, a day-off-mi ken ni Brother Delfin, napankami iti downtown LA ta panggepmi ti mapan ag-temple, ken iti opisina ti abogadok. Pagdaksanna, simmakit ti tianko ket kapilitan a dimsaagkami ket nagsapulak iti mabalin a pagdiskargaan.
Nupay dikami natuloy iti templo, nakapanak ketdi iti opisina ti abogado tapno isumitirko ti papeles ni Sinamar. A nambarak a nagbayad iti $215 a para iti papelna. Iti dayta met nga aldaw a nakaawatak iti suratna a napetsaan iti Pebrero 27, 1995, a nakaisapitan ti daniwko a Yan dagiti Bituen? A rimmuar iti Bannawag.
Nakaawatak iti awag ti abogadok, a pappapanendak iti katorse ti bulan, ngem saanak a nakapan ta nairana iti seminar iti trabaho.
Arigna diak makaaanges iti kaaadu ti trabaho iti pasilidad!
Iti nuebe ti mabilang ti bulan, nakaawatak iti surat ni Sinamar a nakaisapitan ti surat ni Kompadre Tino ken iti PNB Remittance Center. Sinubalitak ida ken daydi Kompadre Tino.
Makabannog ti agpayospital kadagiti agtatapaw a kararua! Adda dita dagidi Jalal Shannish, Renee Praadt ken Georgina Jennings. Ken daydi Alberto Herrera. Pinadas pay ni Jennings a puoran ti kuartona ken ti sibubukel a pasilidad. Iti daydi nga aldaw, pinanggep da Marilou ken Miguela ti umay ngem saanda a natuloy.
Iti dose ti mabilang iti daydi a bulan, napankami ken ni Brother Delfin nakimisa idiay South Gate Ward. Ngem naammuanmi nga awanen ti nasao a ward. Intiponda iti Downy 2nd Ward iti napalabas nga Stake Conference. Daydi met la Bishop Langton ti nagtuloy a bishop. Napapirmaak ketdi ti temple recomend-ko iti daydi President Canning.
Iti isasarungkarko iti Popkin, Shamir & Golan Law Office, imbagada a masapulda ti sertipikasion ti Bannawag. In-xerox-ko ti libro a Lingka a yan ti naganko.
Makitayo dita ti rigat ti sasaadek idi? Agsusukot, kunak ngarud! Adda pay dagidi gundaway a mapampanunotko ti agsapul iti sabali a trabaho, ngem awan pay met ti green card-ko.
Sa naidagnay manen daytoy! Naibaga a positiboak iti tuberculin test iti napalabas nga aldaw. Inikkannak daydi Mrs. Roxas iti mutlivitamin.
Iti disiotso ti Marso, nakaawatak iti surat ti simbaan maipanggep iti pannakare-align ti Downy Stake, ken iti abogado maipanggep iti papeles ni kaingungot.
Daytoy ti maysa a nagdandanagak! Nakaawatak iti subpena maipanggep iti pannakabagsol daydi Alberto Herrera. Mierkoles ti bista. Napanak pay iti dayta nga aldaw iti DMV a mangala iti California ID ngem didak inikkan.
Pinatigmaannakami daydi Emy maipanggep iti bista iti sumuno nga aldaw. Ngem naisanud manen, sa imbaga pay daydi Mekene Abe a diak ammo ti agsungbat iti telepono.
Idi natuloy ti bista, napankami ngem didakami pinagsaksi.
Nagatendarak iti training nga inted daydi Mr. Beehamy, a maysa a miembro ti licensing.
Nakaawatak iti surat ni Sinamar babaen ti EMS a nakaisapitan ti biodata ken ti sertipiko ti panangabak ti saritak iti umuna a gunggona.
Nakaawatak iti surat daydi tatang ken ni Mercy maipanggep iti panggepda nga umay iti America. Adda idin da Bro. Ken Sister Delfin. Nakaawatak iti assignment for home teaching iti Simbaan.
Immawagak iti opisina ti abogado. Imbaga daydi Annie, ti para review iti papelesko, nga ikkak iti dua nga aldaw a mangadal.
Ket dimteng ti Marso 28, 1995. Kasangay ti buridekmi. Ngem nalidem ti kasasaadko iti trabahok idi. Masapulko ti pammakired. Masapulko ti naur-urnos a plano. Ti la indawdawatko iti Apo, tulongannak a mangtun-oy iti arapaapko para iti pamiliak.
Lord, I need special blessing! Forgive me! Nabatad dayta iti panunotko.
Immawagak iti abogadok. Paisubsubmitirda ti brochure ti aplikasion ni kaingungot. Lumidlidem ti kasasaadko iti trabahok. Mariknak, gapu iti daydi nalaing a Mekene Abe! Amangan no marikriknana a dumekdekket kaniak daydi Emy, ket madanagan amangan no agawek ti puestona.
Iti sumuno nga aldaw, dimteng ti nadagsen a karit kaniak. Imbaga daydi Mekene Abe nga agtrabahoak iti kosina iti kabigatanna. Sa addanto kano bista iti kaso daydi Alberto Herrera iti 18 ti Abril.
Nadagsen ti riknak iti pannakaibaba ti puestok. Kusinero laengen! Agsasallupang ti mapampaanunotko.
Aglalo idi maibatangak a housekeeper.
Mariakosina!
Kangrunaanna, awan pay ti nalawag a banag ti papelko. Idi immawagak iti Popkin, Shamir & Golan, imbagada a mapanak iti sumuno nga aldaw, a mangisumitir kadagiti kasapulanda a dokumentok, nga impatarusko pay ti artikulo daydi Tata Ben Pascual maipanggep iti nangabak a saritak.
Kinontaknak daydi Atty. Golan. Inikkak iti kopia ti Lingka. Naammuak nga adda hotel daydi Atty. Golan ket agsapsapulda iti trabahador a Filipino. Naammuak pay manipud iti agnagan iti Hector a kaduami, nga adda sabali a pasilidad a makasapul iti para rabii a guardia, 11-7.
Impatarusko ti komento daydi Manong Pel Alcantara iti saritak a "Tallo a Tugot," a nangabak iti umuna a gunggona ta nalidem idin ti namnamak iti trabahok. Immakiniliak pay dagidi patarus iti komento daydi Rey Duque ken Manong Joe Bragado iti komentoda. Iti kabigatanna, nakasaritak manen daydi Hector a nars ket impalagipna ti nasaona nga agkasapulan iti trabahador.
Daydi a kinse ti Abril, Sabado, ti kadagsenan nga aldawko iti Crystal Care. Nabannogakon idinto a kasta unay ti imas ti panagkikinnatawa daydi Mekeene Abe a kaabayna daydi lakayna a kasta unay met it isem-isemna. Nadlaw ngata daydi Mekene Abe ti nadagsen a gargarawko isu a dinillawna. Diak natengngel ti riknak ket nasungbatak iti nadagsen. Timmakder daydi lakayna a mangmesmesmes, a kasla kayatnak a duklosen.
Awan ti nangkanunong kaniak. Uray dagidi agassawa nga Arturo ken Hilda a kosinero. Iti umuna a gundaway, siak ti kontrabida! Binalllaagannak daydi Vito a delivery boy, a nairana nga adda, nga amangan no sisantiennak ni Zac Cananea a nairana a kabagianna.
Iti kabigatanna, Domingo, napanak nakimisa. Nagdamagak iti daydi Bishop Langton ti trabaho a mabalin nga akarak. Insurona daydi Brother Ilagan a Pilipino, a nangisingasing a mapanak idiay Deseret Industries.
Ngem saaanak a nakapan ta isu met idin ti pannakayakarko idiay Upland.
(Maituloyto)
Napalabas a paset: 1 | 2 | 3 | 4 | 5 | 6 | 7 | 8 | 9 | 10 | 11 | 12 | 13 | 14 | 15 | 16 | 17 | 18 | 19 | 20 | 21 | 22 | 23 | 24 | 25 | 26 | 27 | 28 | 29 | 30 | 31 | 33 | 34 |
