(Tuloyna)
Kadagiti simmaruno nga aldaw, nadumaduma a surat ti naaw-awatko, a makapalag-an koma met iti barukong. Ngem kasla magustuandak la unay a sutsutilen dagiti parikut, ta adda dita ti pasiente nga impanko iti hospital. Adda dita ti pasiente a nagpaitulod iti gayyemna, a nagkari a bayadanna ti gasko. Adda dita ti... no asino payen a pasiente a ti la adda a dawdawatenna!
Inturongko ti panunotko iti daydi Arthur Ramirez. Napanunotko a lamlamiongen tapno saan nga agpulpulong kada Emy no kasdiay a rummuarak. Inkarik nga itulodkonto iti kayatna a papanan.
Isu a nakapagsarangkami met la iti daydi Gale Ard a personal. Minanehok ti Batmanko agingga idiay LA. Nagbayadak iti $825 para iti pannakai-file ti papelko iti immigration.
ALLON TI BIAG: Walo A Dekada A Panagdaliasat (37) 1
Ti imasna, nadadaelan ti luganko! Naimbag la ketdin ta adda naasi a timmulong kaniak idiay City of Industry—Mr. Salazar ti naganna. Imbagana a programa kano ti siudad ti tumulong kadagiti kas kaniak a madadaelan iti dalan.
Ngem immawag ni Emy iti daydi nga aldaw ket di met nakapaglibak daydi salbag nga agtatapaw a kararua! Naammuanna a napanak idiay LA para iti papelko. Biddutko met ta diak koma imbagbaga iti daydi kinatulagko ti napanak. Impatpatulengko lattan ti panangunget kaniak ni Emy.
No maibusanak iti gas, ti la pagut-utangak iti igatangko. Naminsan, nakautangak iti daydi Mark Stagner iti $10. Mayatda met latta ta itultulodko met ida no adda papananda.
Naminsan, inawagak ni Brother Delfin ket nangibagaak iti $10, nga ipaw-itna iti daydi Edgar, a nangreliebo iti daydi Vito. Ngem $100 ti intedna.
Inawagannak ni Ralph a nangibagaanna nga adda surat ti DMV nga agur-uray kaniak. Isu met a singsingirendak ti abogadok iti $825. Naimbag ta daydi ipapanko idiay Indio, nayutangannak ni Marilou ken ni Mico iti $1,000. Iti panagdardarasko nga agawid, naaksidenteak ta nagiddep ti headlight ti lugan.
Imbusonko ti pinagbayadko iti Popkin Shamir & Golan babaen ti money order.
Iti maysa nga aldaw, immay da Miguela ken dagiti annakna, ken daydi Elmer. Inyegda ti kontrata ti utangko.
Bareng no bateria ti problema, gimmatangak iti baro a bateria. Ngem dandani metten di agandar! Tinarimaanko ti kablena; nagandar. Awan ti ammok kadagitoy, sangsangkabassit ti naadalko idi iti vocational course idiay Institute.
Idi kuan, nakaawatak iti awag ni Miguela; singsingirennak iti bayad ti telepono, daydi panangusarko iti teleponoda: $29.95!
Isu nga iti yaatendarko iti Sunday meeting idiay Upland 3rd Ward, a nangawisan kaniak dagidi pamilia Nelson a makipangaldaw, dimmagasak a gimmatang iti fonecard ($10) tapno maawagak ni kaingungot.
Masapul nga agbayadak ken ni Miguela iti $80 para iti kotse, ken $200 ken ni Marilou. Naimbag ta nagsueldoak ket isu ti biningaybingayko.
Naimbag la ketdin ta saanak a nainayon kadagiti tarakenko!
Kasla saan a maputputpot dagiti agsangpet a parikut. ‘Tay kunakon, magustuandak a pagbobodaan!
Inyawag kaniak daydi Aling Gilda Roxas a kinasarita daydi Gilda Macaraeg, ti Mekene Abe, ket indiayana kenkuana ti panangsukatna kaniak, ngem dina inawat. Isu nga immawagak manen ken ni Gale Ard, tapno laeng maammuak nga am-amirisenda pay laeng dagiti dokumentok, a mabalin nga i-file-da iti masungad a Martes. Madandanaganak ta apay a nagbayagen ket nagbayadak metten? Peken sa metten, Apo!
Iti laksid ti adu a parikutko, inkeddengko ti agbayad iti apagkapullok iti simmaruno a Domingo, ta nangnamnamaak a tulongannak ti Dios. Nangipatulodak pay iti $150 iti BPI Remmitance Express para ken ni kaingungot.
Ken wen gayam. Uman-anam sa ketdi idin a suratek daytoy basbasasenyo ita, nga awan iti panunotko, ta rinugiak a suraten ti “Daytoy Man ti Pamiliak” a diak ammo no nakaiselselselak. Isu met ti pannakaawatko iti surat ti DMV a nangibaga nga isumiterko dagiti kasapulan a dokumento para iti Driver License ken California ID.
Iti yaatendarko iti umuna a Domingo ti bulan idiay Upland 3rd Ward, imbaga ti Ward Clerk ti panangyakarda iti rekordko. Nangtedak iti pammaneknek, wenno Testimony. Inawisdak dagidi pamilia Richardson a makipangaldaw kadakuada. Wen, nariknak ti kinaimbag dagidi miembro ti 3rd Ward—naammuak itay laeng nabiit a maysa ti Upland City a kabaknangan a siudad ti San Bernardino County, CA. Agasem, miliones itan ti presio ti ordinario a balay. Diak idi impagpagarup a kasta gapu iti nagsisimparat a nakakumikomak.
(FLASH! Itay alas kuatro ti malem, 2/12/2023, kinaumannak, babaen ti video call, ni Jessa Sariah Mae Ramones, estudiante ti BYU Hawaii, a taga-Bacarra, Ilocos Norte maipanggep iti panangipatarusko iti Ti Libro ni Mormon. Nabayag bassit a nagsarsaritakami. Nayeskediul daytoy, dua a lawasen ti napalabas. Aramatenna ti innumanmi iti kursona.)
Naimbag la ketdin ta adu ti maaw-awatko a surat a nadumaduma ti naggapgapuanda. Dakkel ti naitulongda iti panangiwagsakko iti adu a salimukok. Adda aggapu ken ni Herman... ken dadduma nga am-ammok iti Filipinas ken ditoy pay America. Uray pay dagiti magasin a maaw-awatko, ken ti transistor a pagdengdenggak iti country music a kas dagidi agkabsat a Carpenters nga immuna a nangngegko idi nagbantayak iti balay dagidi Yearsley idiay Dhahran. Dagitoy ti inusarko a nangpalag-an ken nangyaw-awan kadagiti salimukok a sumangbay. Narigaten no maipadaak kadagiti bambantayak, saan la a siak ti mapukaw ngem mairamraman pay dagiti napanawak a patpatgek.
Adda daydi aircon nga us-usarek idin no napudot ti paniempona. Ngem ti dakesna, natiempuannak daydi Zack Cananea a mangus-usar ket imbilinna a diak pagan-andaren ta nangina kano ti koriente! Parikutko no kasano a makaturogak ket kapudotna idin ta panawenen ti summer wenno kalgaw koma no Filipinas.
Nakaawatak iti surat ti Sparrowgrass Poetry Forum a nangipakaammo a naawat ti daniwko a mairaman iti antolohiada. Dinardarasko ti nangipatulod ken ni Gale Ard iti kopia ti nasao a daniw, nga inggiddanko ti surat a naggapu iti DMV.
Dua a bulan ti limmabas nga awan ti naawatko a napintas a damag maipanggep iti petisionko. Mangrugin nga agdanagak. Ania ti talaga a napasamak iti papelko? Nadispalkon sa metten ti inut-utangko a pinagbayadko. Pangalaak pay iti pagbayadko kadagiti nakautangak?
Awan ti nangibagbagaak iti adda iti panunotko; uray ni Sinamar! Inukopak a sisiak!
Awan ti sabali a kinaraptak no di ti Heavenly Father. Agarup insangitko pay ti nagkararag!
Idi inawagak manen ni Gale Ard, imbagana nga i-file-da iti sumuno nga aldaw.
Napanak nagatendar iti maysa a sesion iti Los Angeles Temple, a pangpatibkerko iti pammatik, nangnamnama nga addanto maawatko a supapak dagiti rigrigatko. Gimmatangak pay iti key chain a Hold To the Rod ken sticker ti kotse nga LDS. Nangaldawak iti bassit a Chinese Restaurant sakbay a nagsubliak idiay Upland.
Sakbay a napanak idiay Indio, nakaawatak, manen, iti surat ni Sinamar, sa idi nakadanonak idiay Indio, agur-uray ti subskripsionko iti Ensign a sigud a magasin ti Simbaan a nagbalinen a Liahona; ken surat ti Sparrow Poetry Forum. Ken ti pakaammo ti National Library of Poetry a rummuar ti daniwko nga “Abbarit, My Abbarit” a mairaman kadagiti sangapulo a maibasa. Kasta met nga inikkannak ni Marilou iti jacket ken sweater ken dua a pungan. Ala, uray no kaskasano, a, ket adda met naawatko a pangliwliwa iti agpaspasugnod a rikna!
Isu a nagatendarak iti Sacrament Meeting idiay Shadow Mountain Ward, idiay Indio. Ababa a panaginana, ngem uray kaskasano, nabang-aranak!
Idi nagsubliak idiay Upland, rinebisarko dagiti daniwko nga Ilokano. Di pay met idi in-file ni Gale Ard ti petisionko. Sinuratak ti administradorda a daydi Mellie Hernandez. Impulongko daydi Gale Ard.
Makitayo? Mailadawanyo kadi no kasano ti kadagsen ti inyab-abagak kadagidi a panawen?
Intuloyko latta ti ammok a makayaw-awan iti paglanglangoyak a tarumpingay! Diak la ketdi agbalin a kas kadagidi agtatapaw a kararua, nasayaaten!
Insuratko ti daniwko a Byebye, Baybayabas. Imbusonko iti National Library of Poetry.
Iti daydi nga aldaw, inawagak daydi Gale Ard ket nagpadpadespensar. Iti malem, inawagannak ni Atty. Shamir a mismo a siento por siento a kalintegak ti impulongko ket imbilinna nga awagak iti sumuno nga aldaw. Isu a mismo ti mangasikaso iti papelko. Limmag-an ti riknak.
Nakaawatak met iti surat daydi Brother John Ball a nangipakaammuanna a di pay nai-release ti Libro ni Mormon. Maigiddanto ngata iti Tagalog ken Cebuano. Imbagana pay nga adda bakante iti opisinada ngem masapul nga addan legal a papelko.
Imbes a daydi Atty. Shamir ti immawag, daydi ketdi Atty. Golan. Adda paipatpatarusna kadagidi dokumento nga insumiterko. Kas kadagidi nangabak a saritak ken sertipiko ti panangabakko.
Iti naminsan a panagsublik idiay Upland manipud idiay Indio—masaok man ketdi ditoy nga adda dagidi gundaway nga agdungsaak nga agmaneho ket mariingak laengen no agtaragatag ti kotse a makaladdit kadagiti batbato a nairanta a naimuntar iti tengnga ti kalsada a pangriing kadagiti kas kaniak—nakitak nga inusar ni Benny, ti mangrelreliebo kaniak, a pinagnasnas ti temple garment-ko! Imbilin kano ni Vito. Nagalasen! Dina la ammo no kasano ti kinapateg ti pagan-anay a para templo!
Napateg dagitoy sumaruno a paset ti panagdaliasatko.
(Maituloyto)
Napalabas a paset: 1 | 2 | 3 | 4 | 5 | 6 | 7 | 8 | 9 | 10 | 11 | 12 | 13 | 14 | 15 | 16 | 17 | 18 | 19 | 20 | 21 | 22 | 23 | 24 | 25 | 26 | 27 | 28 | 29 | 30 | 31 | 33 | 34 |
