Autobiograpia ni LORENZO G. TABIN
(Tuloyna)
NAKAANGESAK ITI NALUKAY idi maitedko amin a dokumento a kasapulan ti USCIS. Nakaad-adu a dokumento ti pinaipaw-itko ken ni Sinamar, amin a kabassitan a di mangan-ano. Nasaok ngaruden nga amin a tao nga ammok nga adda nasayaat a masaoda kaniak, dinawatak iti pammaneknek. Nagsayaatanna ta saan a nabannog ni Sinamar nga immasideg kadakuada uray no kurang la dina makudkod ti nabudo iti kaadu ti sanguenna. Kaudian daydi sertipiko ti panagkamengko iti maysa a gunglo dagiti mannaniw iti America, a diak metten malagip ti naganna ta napukaw daydi sertipikok! Dakkel ti naitulong daydi a sertipiko.
Ngem kadakkelan a dokumento ti kopia daydi tesisko iti masteral-ko idiay UP.
ALLON TI BIAG: Walo A Dekada A Panagdaliasat (38) 1
Saanakon a natektekan a naguray iti aldaw a panang-interview-da kaniak. Iti panagdardarasko a nangdagas iti opisina ti Popkin, Shamir and Golan Law Offices kadagiti kasapulak sakbay a napanak iti UCSIS, ket simrekak a nagpasirok iti dakkel a pasdek, diak naaluadan a naisagud ti bakrang ti Batman-ko iti dakkel a poste! Dakkel ti kuppit ti kotse ket dinillawnak pay ti guardia. Saankon nga inkankano, ti napateg ket sumangoakon iti kadakkelan a pannubok—arigna biag ken patay ti agur-uray kaniak!
Aglamlamiis dagiti dakulap ken dapanko bayat ti panagurayko iti batangko a ma-interview.
Agarup kataytayagko ti nangkablaaw kaniak. Pamestisuen ket narigat a lasinen no sadino a suli ti lubong ti naggapgapuanna.
Uray ti apeliedona a Canlas, pagduaduaan ta nupay immapay iti panunotko a kaaw-aweng ti Filipino, adu met ti Ispanggol kada Eme a mapagbiddutan a kaburik dagiti Filipino.
Napasnek; pulos a di immisem. Ngem apaman a naluktanna ti tesis, kinunana a dagus, “Pilipino ka pala!”
“Opo,” dinayawko uray no langana ti ub-ubing ngem siak.
Nakaad-adu ti dinamdamagna maipanggep iti tesis. No kasano a sinuratko, no apay a daydiay a tema ti insuratko. Ken no ania la ditan.
Ay, ket nasungbatak amin, a, ket no siak met ti nangsurat!
“Welcome to America!” kinunana idi mairikepna ti tesis. “Alam mo, may mga katulad mo na may dalang tesis... but if you ask them about the book, they don’t know what they are talking about, as if they completely lost in the dark. Obviously, they bought the thesis!”
Kabagianna gayam daydi Yoly Canlas a maysa a librarian idiay UP Library.
Iti kamaudiananna, nakaawatak iti awag ni Nely Cabacungan Tuvera a nangipadamaganna iti pannakaaprobar ti aplikasionko iti GREEN CARD!
Sabali pay ti awag ni Nely idi Septiembre 18, 1996; imbagana a mapanak ta kayatnak a kasarita ni Atty. Golan.
Dinamagna idi agsarangkami no adda anakko a dandanin agtawen iti duapulo ket maysa. Ni Chichi ti ag-birthday iti Enero 2, 1997.
“We can expedite their arrival,” kinuna daydi Atty. Golan.
Nagpintas ketdin a damag! Naidanogko iti angin ti ragsakko!
Ta gapu ken ni Chichi wenno Sinamar II, maisapsapa met ti yaay da Sinamar ken ni Jojo.
Ngem nasken pay nga asikasuek ti medical exam a bayadak iti $60, sa $45 iti x-ray. Nasken nga umutangak kada Marilou. Immutangak pay iti daydi Benny iti $20 a pinag-gas-ko.
Ngem nagrimat ti ladawan ti doliar iti mugingko!
Pangalaak ti pagbayadko? $6,000 amin ti bayadak; agarup $2,000 pay la ti nayunak. Pangalaak iti $4,000?
Nangibagaak kada Marilou ken Miguela. $600 ti inkarida ngem masapul nga agbayadak iti $300 iti binulan. Nangibagaak iti daydi Manong Verin Lazo; saan a nalawag.
Gapu iti dayta, napanunotko nga awagan daydi Brother David Kunze a First Councilor ti Bishopric a 2157 Kelly, Upland, CA. 91784, USA ti adresna.... Nadekdekket ngamin kaniak ngem iti daydi Bishop David (R.) Peel a 55 E 26th Street, Upland Ca. 91784 ti adresna. Innayonko ti adresda amangan no addanto pakasapulak.
Biernes daydi yaawagko ken ni Brother Kunz. Inlawlawagko ti pakasapulak.
“I will try to contact the members of the Priesthood group,” kinunana. “You must be there on Sunday.”
Kayatko nga ibaga a pulos a diak napadpadasan ti immutang idiay Filipinas, malaksid ti tintinnaganmi a house and lot idiay Montalban. Ita ketdin nga addaak iti lugar a maaw-awagan iti lubong ti gatas ken diro. Agpayso daydi daan a pagsasao a kumagat ti aso no maipit.
Isu nga idi dimteng ti Domingo, siak ti kasapaan a dimteng iti priesthood class. Agkebbakebbaak. Ti la adda a napampanunotko. No didak tulongan, makimisaak pay ngata?
Idi addakami aminen a miembro ti Priesthood, daydi Brother David Kunze ti nanglukat iti miting. Imbagana ti nagsaritaanmi. Inlawlawagna ti parikutko.
Nagpalpaliiwak. Awan ti nadlawko a limmidem ti rupana. Adda dagidi nangipadalgis ti panagkitada kaniak.
Idi kuan, addan nagkari. Gary Shaumann, Todd Nielsen, M. Lee Frandsen, Cary Leach ken Mary Leach, Winifred Benton, Nedra Rasmussen, Floyd Munson, Joseph Morgan, Gerald Griffin, Robert ken Donna Ellis, Clifton ken Joyce Chandler, ken Brian ken Donna O’neil.
Awan nagpangngadua!
Dagidi Cary ken Mary ti maysa kadakuada; ni Brother Leach, ken ni Benjamin a barona nga addan ti pamiliana iti West Valley, Utah, ti home teacher-ko idi. Ni Cary ti kadakkelan ti naitulong malaksid iti pinansial.
$600 ti naitulong dagidi pamilia Shaumann.
$25 ti kababaan; ngem dakkelen a pagyamanak ta nakatulong met.
Nasursurok pay ti naur-or ngem ti kasapulak.
Wen, dagidi nasasayaat a tattao, diakto masubsubalitan ida.
Tinulongannak ni Brother Cary Leach a nangibanko. Indepositona iti bank account-na. Sa nangted iti tseke a nainagan iti Shamir, Popkin & Golan Law Offices.
FLASH! Iti pannakabasak iti suratko ken ni Sinamar, a nakailistaan ti nagnagan dagidi timmulong kaniak, napanunotko a suratan ni Brother Cary Leach iti FaceBook. Kastoy ti sungbatna:
‘Thank you, Lorenzo for sharing these beautiful memories and pictures of your family. It is hard to believe that 30 years have passed since then. My son Benjamin and his wife Karen and their two boys live in West Valley City, UT. Perhaps they know the Dasalla family. Ben was with me when we picked up your family at the LAX airport. Thanks again for sharing this with me. With your permission, I will share it with those who are still here in Upland. There are only a few of us. Best wishes to you and your family for the new year!
Saanak a nakaakar a dagus ta sinugsogannak ni Marilou nga agaplikar idiay Los Angeles Library; clerical idiay Indio kasta met idiay Palm Spring. Kaarngi met la dagiti nageksamenak idiay Manila, ket agpapadada a nairuarko. Ngem napigpigsa ti awis ti Salt Lake City, ta idiay a mismo ti nakaitalimudokan ti arapaapko. Daydiay ti arapaapko uray pay sakbay nga inkeddengko ti umay ditoy America.
Ken ti dakkel a diak nakaigawidan iti Los Angeles Library ket ti kaawan ti pagdagusak.
Diak kayat ti agudaod a Mecca-Los Angeles—adda idi kaluklukat a housing idiay Mecca ket imbaga ni Marilou nga igatangannak ta isunto ti pagbayadak.
“Ania ti papanam idiay, manong!” kinuna ni Marilou. “Mailadoka... nalamiis kano idiay.”
“Sadino ti yan dayta Utah?” kinuna met daydi Manong Verin. Dina kano pay nangnangngeg ti Utah, a kasla ketdin nalipatannan a ditoy ti gapu ti nakaumayak iti America.
Adu a pananglaplapped kaniak da Marilou; isuda amin.
Aduda iti California a nakautangak iti naimbag a nakem.
Wen gayam, nagsarakkami ken ni Fred Rivera nga adda pay la idiay Van Nuys sakbay a pimmanaawak idiay Upland. Agingga ita, agpimpinnadamagkami pay laeng babaen ti Facebook ken Messenger.
Sakbay a nagluasak, nagtutulaganmi iti daydi tatang a no makapagsimpaak iti Utah, alaekto met ida.
Adda nasao daydi Bobby a taga-Indonesia a nakaduak idi idiay Crystal Care Center sakbay a naglusulos.
“When Emy learned my plan to quit, she did not give my whole salary,” kinunana. “That’s why, don’t tell her that you are leaving.”
Nagduaduaak met. No ibagak ti ipapanawko, amangan no dina met ited amin a sueldok.
Ngem diak met kayat ti basta lattan pumanaw a di agpakada.
Immawagak iti balay da Emy.
Awan ti simmungbat; nangibatiak lattan iti mensahe.
Imbagak pay iti daydi Arthur Ramirez idi maibunagko amin dagiti gargaretko iti kotse a yawagna ken ni Emy ti ipapanawko; diak imbaga a dagus amangan no madanondak da Emy a di pay nakasagana.
Sakbay a nagluasak, insaganak pay ti pangmalem dagiti residente.
Ti pagdaksanna, iti panagdardarasko a makapanaw iti umok dagidi nakakaasi nga agtatapaw a kararua, diak metten nalaglagip ti nagpakada kadagidi nasayaat a miembro ti Upland 3rd Ward!
Addaakon iti West Valley idi naammuak a naatake daydi Benny idiay 5th Avenue Manor. Ken iti pannakadamagko a naala ni Brother Luis Delfin daydi Sister Pelang, ken ni Lehi. Nagyanda idiay Crystal Care; impakamakam ni Brother Delfin nga awagakto koma no adda makitak a nasaysayaat a trabaho iti Salt Lake City—nagsarsaritaanmi, diak gayam nairaman, a nagkakuartuankami iti maysa nga apartment sakbay a nayakarak iti 5th Avenue Manor. Kunkunana idi a naragsakton a sumina maaprosanna la ketdi ti pader ti Salt Lake Utah Temple!
Nakiro? Diyon masurotan? Kasano, ket talaga met a kasta ti biagko!
(Maituloyto)
Napalabas a paset: 1 | 2 | 3 | 4 | 5 | 6 | 7 | 8 | 9 | 10 | 11 | 12 | 13 | 14 | 15 | 16 | 17 | 18 | 19 | 20 | 21 | 22 | 23 | 24 | 25 | 26 | 27 | 28 | 29 | 30 | 31 | 33 | 34 |
