(Tuloyna)
Inrekomendarnak ni Bishop Breinholt iti maysa a sanga ti Deseret Industries idiay Magna. Adu ti sanga ti DI iti Utah. Ulitek, pagtagilakuan ti DI iti nadumaduma a segunda mano, wenno slightly used a kunada. Wenno ukay-ukay a kunada idiay Filipinas. Kas koma iti lupot, sapatos, radio, pinggan, kaldero, baso, sofa, washing machine, dryer... uray ania nga idundonar met la dagiti babaknang a miembro.
Ken kadagidi a panawen, aglakoda pay iti segunda mano a kotse. Adda la bassit matarimaan, mapaut manen nga usaren. Ngem idi napanak nangkita, awan ti nagustuak.
ALLON TI BIAG: Walo A Dekada A Panagdaliasat (39) 1
Kas nasaok iti suratko ken ni Sinamar, $6.50 ti sueldo iti maysa nga oras. Tallo a bulan la ti naited a kabayagko ta kunada a pangalaan la kano iti padas dagiti agtrabaho idiay, tapno adda maipakitada no agaplikarda iti nangato. Stepping stone a kuna.
Iti immuna nga aldawko iti DI, nairanrana a nasapa a nagregreg ti isno, ket di pay nagtapos ti Oktubre. Nagnagnaak a napan iti 3500 South a nagsadaak iti Utah Transit Authority (UTA) a mapan iti Magna. Nausarko idi ti berde a diaket nga inorderko idi addaak idiay Dhahran. Agarup pagattumeng ti kabengbeng ti isno!
Nagyamanak ta addan trabahok; assistant lead. Nobiembre 8, 1996 idi maawatko ti ‘First Legal Salary’ a $240!
Babaen ni Felix Umali ti Lucky Money idiay Rancho Cucamunga, a nagpawpaw-itak idi, impaw-itak ni kaingungot iti $810 nga usarenna iti panangipagnana iti papelda. Nagtaud ti nasao a kantidad iti sueldok ken donasion dagiti miembro ti Hunter 10th Ward. $200 ti naggapu ken ni Bart Wiscombe, $100 ti naggapu iti maysa a Sister Peterson. Sa $100 manipud ken ni Bishop Breinholt. Inkarigatak ti gimmatang iti lalat a pagimengko nga agpateg iti $15 ngem inikkandak iti dakkel a diskuento isu a $9 laeng ti imbayadko.
Naminsan pay a napaneknekak, a biddut ti panangipapan ni Marilou nga awan ti makatulong kaniak no adayoda.
Iti sumuno nga aldaw ti pannakaawatko iti kopia ti libro a Meditation a nakairamanan ti daniwko a “Labut: the Wizend Utopia. “
Idi Nobiembre 14, 1996, nakaawatak iti ‘pocket’ manipud iti Popkin, Shamir and Golan Law Office a naglaon kadagiti dokumento a kasapulan da Sinamar.
A nakairamanan ti affidavit of support a napateg unay a pammaneknek nga adda ‘mangtaraon’ kadakuada iti isasangpetda.
Isu nga amin dagidi a parabur a naawatko, kas man nalayet iti dimteng a parikut!
Ngumedngednged ti panawen. Mano pay a lawas?
Nalagipko ni Delia Rochon. Kunak iti nakemko, dinak ngata met paayen ta am-ammonak unay. Napnuanak iti namnama nga immawag.
Kunak no napigsaak kenkuana. Ngem saan nga immannugot! Adu kano ti tultulonganna a kabagianna.
Nalagipko ni Remi Mataoa. Idi adda idiay Filipinas, intugotna ti sangabukel a pamiliana, a babassit pay idi dagiti annakna. Inyupaan ida ti Simbaan idiay San Juan iti dakkel a balay. Kanayon nga awisenna dagiti agipatpatarus iti uppat a lengguahe—Tagalog, Ilokano, Cebuano, ken Hiligaynon—a makipangan kadakuada. Mapili pay ti sidada; di kayat daydi Remi ti bangos. Agmusiig pay a makangngeg. Nakasisiit kano ngamin. No agsida iti ikan, pilienna ti salmon. Nangina ti salmon. Dagiti la babaknang ti makagatang.
Malagipko laeng, diak malipatan, adda daydi maysa a translator ti Tagalog a namanugang ti maysa a lider idiay Montalban. Inglisero a napeklan, a kunam la no nakadakdakkel ti inalatna. Nabalbalatongna daydi Remi. No dadduma, isu payen ti agmaneho iti lugan da Remi. Mabulodna payen nga ipan idiay Montalban. Ngem intayab ti angin ti ulona ket awanen ti makaammo no sadinon nga abut ti lubong ti nakaipisokanna! Uray dagiti nakaikamanganna, dida payen kayat nga ammuen.
Isu a daydi Remi—kanayon nga ibagbagak a daydi; wen, ta uppat a tawen sa itan a pimmusay—ti insarunok nga inasitgan. Nagsublida idin iti Orem, Utah, ket nagsublin iti COB manipud idiay Filipinas idi nalpas ti panagipatarus a proyekto ti Simbaan idiay Manila.
Saan a nakauni a dagus idi imbatadko ti panggepko. Imbagana idi agangay a kapadesna ti agpaadal kadagiti annakna. Adda pay pagad-adalenna iti medisina idiay BYU, a panggepna ti mapan agespesialista idiay, nalipatakon no ania nga unibersidad idiay Eastern United States.
Nupay kasta, ammok a nasakit ti nakemna a mangpaay kaniak. Inkuyognak a napan iti bankona. Bareng kano no aprobaranda ti dawatko.
Nangngegko a mismo ti kuna ti banko.
Dakkel kano ti utang daydi Remi ket saan a kualipikado a mangted iti affidavit of support.
Two down!
Asino pay ti asitgak?
Pinadas da Bart ken Venetta ti tumulong.
Ngem nalidem ti resulta. Gapu ta sangsangailiak la iti lugarda, saan a kas idiay Upland 3rd Ward a nagserbiak iti nasurok a makatawen.
Maysa laengen ti napanunotko nga asitgan. Ultimo remedio daydin.
Daydi Brother John Ball.
Ipalagipko, a namin-adu nga immay idiay Filipinas. Pinasiarnakami pay a grupo ti Ilokano translators idiay Montalban—da Lilian San Diego, Grace Baradi (pay la idi, Baay itan), Sister Manlugon, daydi Hernelio Baradi, ken dakami ken ni kaingungot. Malagipko nga intugotmi iti maysa a panganan idiay sentro ti Montalban. Naggudeng idi a mangan ta saan pay a nakaramraman kadagidi naidiaya a taraon. Ngem pinilit da Lillian. Sa pinakanda iti halohalo. Sada pinainum iti danum a nagadgadan iti yelo. Awan pay idi ti nakabote a danum. Agrubrubuat idin nga agsubli iti Church Office Building (COB). Dakes ta naibullaaw ti tianna. Inyes-estretserda kano nga imbaba iti eroplano idi dumsaag!
Kadagidi Puraw a napnapan iti Filipinas, daydi Brother Ball ti kapakumbabaan. Mariknam latta ti napudno a panangibilangna iti bagina a pudno a kabsat; awanan iti panangidumduma.
Inawagak daydi Brother John Ball, nga aglullulok ti riknak iti umag-agibas a negatibo a panunot.
“Can you drop the form in my office?” kinunana idi mailawlawagko ti parikut.
Parikutko no kasano a makapanak gapu iti trabahok iti DI.
Nariknana ti panagduaduak ket isun ti nagkuna a daw-asennanto ti pormas ti affidavit of support.
Nakagin-awaak idi maiwakaskon ti kangrunaan a parikutko. Intuonko ti panunotko iti panagsagana da Sinamar.
Iti nalaus a pannakakumikomko, a kasla saanen nga agandar ti utekko, nariknak ti masansan a panagulaw-ulawko. Nalagipko ti nasao ti doktor a nagpakitaak idi ma-medical-ak idiay Toronto, California, a nangato ti darak.
Nalagipko a mangmangan idi daydi Manong Jun Hidalgo iti bawang ta nangato kano met ti presion ti darana. Dimmaw-asak iti tableta a bawang.
Ngem saan kano a kayat da Bart ti angotna; diak impagarup a kasdi ti ‘kabanglo’ ti bawang, a kasla gayam agatibuor a sabong ti bangar!
Simmaruno ti panangibagada nga agsapulak iti apartment a sangpetan da Sinamar; usaren kano ni Heidi a balasangda ti kuarto a pagturturogak.
Idi pay la ti pannakariknak iti bain. Naamirisko a nabayag met bassiten a nagyanak iti balayda; rumbeng laeng metten nga agsapulak iti sabali a pagyanak.
Ken agpayso ti kunada: isaganak ti pagtarusanto da Sinamar no sumangpetda.
Impabulodda ti kotseda a pagluganak nga agsapul. Nakadkadanonak idiay Magna a nangkitaak iti paupaan a kuarto. Imbagada nga addan nakaala; nagyamanak met ta diak nagustuan ti lokasion. Napanak pay nagimpormar dita West Valley City Hall maipanggep iti housing project ti siudad. Inikkandak iti pormas. Ngem mabayag ti panaguray iti agbakante ta first come first served kano; kas ‘tay pagsasaon, nalaeston ti tokak a mapayatak. Idi naggapuak iti Housing, intarapnosko ti napan nagdamag iti Human Resources iti mabalin nga aplikaran a trabaho iti City Hall. Ngem kasla adda manglaplapaped kaniak, nga ‘umadayo’ iti Simbaan. Gapu ngata kadi iti inkarik nga iti Simbaan ti pagtrabahuak?
Dandani nasugodko ti sangabukel a West Valley City. Idi, no saan nga iti classified ads ti diario ti pagsapulam, sugodem dagiti kalye nga agsapul iti paupaan nga apartment, ken serkam a trabaho. Karkardayo pay idi ti internet iti computer; diak pay idi nakaig-iggem iti computer!
Iti panagsursorko, adda dagiti nakitak a paupaan ngem masapul ti makabulan a pauna ti renta.
Nakadanonak iti Lancer Way nga abagatan ti 3500 South. Adu ti balbalay idiay ket impaspasarakko a pinadaya ti kalye. Sinerrekko ti Yorkshire Road nga agpaabagatan, nagrikusrikosak kadagiti kalye sadiay agingga a nakadanonak iti Harvey Street nga agpaamian a kumamang met laeng iti Lancer Way. Babassit ken daan dagidi 2-storey apartment.
Adda karatola iti ngalay ti Harvey Street iti akinlaud a linia ti kalye: APARTMENT FOR RENT. Apply Inside.
Nadlawko dagiti saggaysa a mangsurnad iti mail box iti ngalay ti kalsada; langada ti pagduaduaan.
Simkad ti riknak iti naimatangak.
Linabsak ti karatola. Intuloyko ti nagpaamianan agingga a nakadanonak iti Lancer Way a nangrugiak. Kasiksikkok la idi matannawagak ti puraw a pasdek iti amianan ti kalsada: The Church of Jesus Christ of Latter-day Saints.
Nagsubliak iti Harvey Street.
Apagisu a ti manedier ti nagdamagak. Agarup kataebko ngata ngem mapagtalkan met ti panagruprupana.
Imbagana nga aglalaok ti nasionalidad dagiti agrenta. Ruso. Mehikano. Puraw. Nangisit. Indian. Samoan. Tongan. Cambodian.
“No need to worry about those people,” kinuna ti manedier idi dinamagko ti peace and order iti lugar. Awan kano ti makaitured a mangirugi iti riribuk.
Ngem uray no dina imbaga ti kasdi, nakaikeddengak idin. Kas iti panangikeddengko idi alaek ti balaymi idiay Montalban; adayo manipud iti pangisursuruan ni Sinamar ngem gapu iti kaadda ti Simbaan idiay Montaña Village, inkeddengko nga idiay ti pangibatiak kadakuada. Isu a gapu ta adda simbaan iti asideg ti Harvey Street, saanak a nagpangngadua nga idiay ti pangisangpetak kadagiti sumangpet.
No saan a tumukno iti langit ti presio!
“The monthly rental is $485 including water and power. And no down payment,” kinuna ti manedier.
Inulitko ti presio iti nakemko. Mano la ti sueldok idiay Deseret Industries?
(Maituloyto)
Napalabas a paset: 1 | 2 | 3 | 4 | 5 | 6 | 7 | 8 | 9 | 10 | 11 | 12 | 13 | 14 | 15 | 16 | 17 | 18 | 19 | 20 | 21 | 22 | 23 | 24 | 25 | 26 | 27 | 28 | 29 | 30 | 31 | 33 | 34 |
