(TULOYNA)
ADU DAGIDI ALDAW nga ibilangko a nakapatpateg la unay kaniak bayat ti panagdaliasatko itoy a lubong. Maysa daydi Disiembre 26, 1996 a maudi a Sabado ti tawen. Uppat nga aldaw sakbay nga agpaso ti pawayway ti yaayda. Enero 2, 1997, ti maika-21 a kasangay ni Chichi. No saanda koma a nakadanon iti daydi nga aldaw, diak la ammon no di ketdi koman nagpiangpiang ti lubongko! Awan ti serserbi ti pannakadanonko iti America no diak met maitugot ti pamiliak. Agpukaw a kasla asuk ti adu a panagsakripisiok, ken ti nabuslon nga asi dagiti naimbag a tattao.
Saan la a sisiak ti nasbaalan iti ragsak apaman a nakitami dagiti ur-urayenmi nga umul-ulog iti agdan ti eropuerto nga agturong iti yanmi nga agur-uray. Nakarimrimat met dagiti mata da Bart ken Venita—ammok no apay: kadagupan dagiti Filipino a nabuniagan ni Bart idiay Filipinas, ti pamiliak ti ibilangna a Golden Family; ulit-ulitek dayta a kinapudno.
ALLON TI BIAG: Walo A Dekada A Panagdaliasat (41) 1
Apagapaman a naitukengak iti pannakakitak kadagiti ipatpategko. Piman, aya, awan met ti dumadan iti naangrag a sanga! Nagkukuttongda! Ni ingungotek, dagiti la gurongna ti kasla saan a nagbalbaliw, dadakkelda pay laeng! Nalagipko la ngarud a pagguguduaanda idi ti itlog a sidada makaramanda la amin!
Ita, addadan ditoy! Dagidiay ngaruden tallo a nabati?
Nasingaak idi inarakupdak.
Di mailadawan ti di magatgatadan a ragsak ti tunggal maysa. Iti kamaudiananna, addan dagiti sinegseggaan ti adu a tao.
Sakbay a napankami iti yan ti lugan da Bart, intedko dagiti insaganak a pagimengda ta agis-isno idi. Dikami pay nakarkaruar iti pangalaanmi iti lugan, nadlawkon ti tiptipdenda a ngasib.
Immawag ni Lingling, ket nadlawko ti kinalidayna. Awan pay ni Mimi idiay Montalban ta madama idi nga agmismision idiay Bacolod. Diak malagip no yan idi ni Dondon; amangan no adda iti dormitorioda idiay U.P. Diliman ta madama a mangal-ala iti B.S. Physics.
Agsubli man ketdi ita ti lagip-riknak kadagidiay tallo a napanawanmi. Nalpas idin ni Lingling iti Business Administration ket agtrabtrabahon idiay Department of Trade and Industry. Malagipko ti kinuna ni Dondon:
“Huwag kayong mag-alala, 'Pa, malalaki na kami.”
Agpayso, ngem nasakit latta ti nakemko iti pannakabatida. Nairamanda met ketdi amin iti petisionko ngem gapu ta nasuroken a duapulo-ket-maysa ti tawenda, maud-udida ket diak idi ammo no kaano a makasurotda. Malaglagipko ita, ad-adu a tawen ti pannakayadayok kadakuada ngem ti kaaddak iti sibayda ket mariknak a kurang ti pammateg a naipariknak kadakuada. Wen, diak naipananam ti pammateg ti ama a naipusing kadagiti annakna iti napaut a panawen.
Nakalamlamiis ti apartment a sinangpetanmi iti daydi Harvey Street. Nakaalaak idin iti kama para iti agsumbangir a kuarto ngem masapulmi ti heater. Nakabengbengbeng dagiti agsusukot a blangket a nagatangko iti menos presio idiay DI ngem sumarut latta ti lamiis iti desarming a tawa.
Gapun sa ketdi iti pannakakumikomko kadagiti kallabes nga aldaw ket diak ingginggina ti bannog ti bagi ken ti panunotko.
Nakapankami pay la nakimisa iti kabigatan ti isasangpet da kaingungot ngem madmadi idin ti riknak. Naalay-ayan laeng gapu iti ragsak nga insarabo dagiti miembro ti West Valley 5th Ward.
Saan unay a karkarna ti immuna a kasangay ni Chichi iti America ngem ‘tay kunakon, daydi a kasangay ti nangisangpet kadakuada a tallo iti Utah.
Iti sumuno nga aldaw, nangiruarak iti $240 manipud iti bankok—impaw-itko ken ni Lingling ti $200.
Inimbitarandakami dagiti Wiscombe iti pagtaenganda para iti pangrabii. Adda pay naawatmi a tseke nga aggatad iti $340 manipud iti Hunter 10th Ward. Diak ninamnama a di pay nagsardeng ti agsangpet a parabur!
Mapmapanak latta agtrabaho uray no madmadi ti riknak. Intultuloyko met ti nagsapul iti sabali a trabaho, ken nagtultuloy met a negatibo ti sungbat.
Simmaruno a napankami iti Department of Motor Vehicles (DMV)—Department of Public Safety Driver License Division itan—a nangalaanmi iti Utah ID dagiti sangsangpet.
Naawat met ni Chichi ti SS Card-na. Diak maawatan no apay a saan a naggigiddan a simmangpet ti SS Card-da a tallo.
Nangisaganaak iti mensahek ta iti simmaruno a Domingo, nabagaankami a mangted iti mensahe iti kongregasion.
Iti kabigatanna ti panangkuyogko ken ni Chichi a nangala iti UT ID.
Agasem ti kaadu dagiti paspasamak kadagidi damo nga aldawmi kas pamilia bayat ti kaaddami iti daydi Harvey Street? No saggaysaek amin, saan a maputpot! Basta saan a nangliwat nga immaw-awag ni Fred Rivera, ti gayyemko idiay Van Nuys, California no adda mabasana a gapuanak iti Bannawag, ta awan ti magatang a kopia ditoy Utah. Patulodannak no kua iti kopia.
No dadduma, ag-family home evening-kami a sangapamilia. Adda pay daydi naminsan a panangawag kaniak ni President Henderson, daydi immuna a naam-ammok idiay Dharan Recreation Library. Adda binangonda a pagaramidan iti kosmetiko, daydi NU Skin ket aw-awisennak nga agahente. Ngem saanko a linia ti agahente ta saan a bagay iti kinamabilbilang ti balikasko; memmem, kuna ngarud daydi Frank Quitasol.
Malagipko man ketdi ni Brother Laifone Tuita a kaduami iti West Valley 5th Ward. Naggapu idiay Tonga ngem nakaasawa iti Puraw. Nasayaat a tao ket agkasungduankami ta agpadakami a saan a Puraw. Nagdamdamag no anian dagiti inap-aplikarak a trabaho. Inawisnak a mapan agapikar idiay Utah Airbase.
Rinugian metten dagiti dua a Sinamar (Sinamar II ni Chichi) ti nagsapul iti trabaho. Naiserrekko ni Chichi idiay DI... nalipatak, naiserrekko met idin ni Mercy idiay DI.
Iti met la Classified Ads ti nakakitaan ni kaingungot iti pagtrabahuanna. Naragsakan ta addan trabahona. Mausarna met laeng ti padasna idiay Quirino Elementary School, idiay Project 2.
Intulod da Bart Wiscombe iti West Jordan Child Care ta dina pay ammo ti pappapananna. Naisuro ti pagsadaanna iti Utah Transit Authority a paglugananna nga agawid.
Ngem nagawid iti malem iti umuna nga aldawna iti West Jordan Child Care a saan a naragsak.
“Agaywan met la gayam kadagiti ubbing ti aramidmi,” kinunana. “Agsukat iti diaper, agpaturog, agtempla iti gatas... Ay, apo!”
Naminsan, naladaw a nagawid. Awan ti naurayna a UTA iti nagkurosan ti Redwood ken 9000 South ta nalibasan daydi maudi a biahe. Naimbag ta adda kakaisuna a bus a pinarana. Dina nabasa ti karatola: GARAGE. Naimbag ta sinardengan daydi drayber. Nasdaaw ni kaingungot ta awan ti pasahero.
“Where yah getting to?” dinamag ti Igoy a drayber.
“W-west Valley...”
“You missed the last trip...Come in..”
Alinduaan a naglugan.
Naminsan pay a naladaw ta naladaw a simmangpet ti ina ti ubing nga aywanna; naguray ta di mabalin nga ibatina. Immawag ket inawagak da Bart.
Saan a nagbayag sa nagsukat ti Administrator ti care center.
“I’m the owner... I’m the administrator!” inyam-ammo ti natangig a babai ti bagina.
Adda pay gayam idi agnagan iti Conrad Valdez a cook ti maysa a restawran ti Pinoy. Inawisnak iti puestoda ngem awan ti luganko isu a saan a natuloy.
Inawagannak met ni Moises Tan Mabunga ket impadamagna nga adda bakante a Custodian iti masakupanna a pasdek ti simbaan. Diak malagipen no kasano a nakapanak; nalabit nga adda nangitulod kaniak, wenno malabsan sa ketdi ti Utah Bus ti opisinada. Ngem gapu iti kaadayo, sa awan ti kotsek, saanak a nakapagtrabaho idiay.
Naamirisko a saanak a makasapul iti nasaysayaat a trabaho no awan ti luganko. Diak met kayat nga agnanayon lattan a mangnamnamaak iti tulong dagiti tattao. Adda pagpatinggaan ti amin ket diak kayat ti paduduolan lattan.
Naammuan dagiti kameng ti West Valley 5th Ward. Naagapad dagidi Sister Little ken daydi Brother Greenhagen a kitaenda no kasano a makatulongda. Agpayso nga adda idi lako ti DI nga indonar dagiti babaknang. Ngem lako, saan a padawat. Nababa ti presio, ngem kas ‘tay nakunakon, adda deperensiada ket masapul a mapatarimaan.
Pinadasko ti agsapul iti tintinnagak kadagiti pagtagilakuan iti kotse. Ngem saan a mabalin a basta lattan ikkandaka ti tinnagam. Masapul a kualipikadoka maibatay iti matgedam ken kabayagmon nga agtartrabaho.
Siempre, saanak a naaprobaran.
Kasano, wenno ania ti aramidek?
Iti panangpalpalabasko iti Journal-ko, iti Marso 3, 1997, naisalat dagiti matak iti nagan a Gary ken daydi asul a Beatle a Mazda ‘83.
Naipalagip daydi panangsukonko ken ni kaingungot idiay trabahona.
“Nakitanak ni Judy itay magmagnaak a sumrek,” kinunana idi. “Dinamagna no apay... imbagak ti problemata.”
Nalagipko a kinita iti Facebook ti nagan a Gary ken Judy, agingga a natumpongak ti kompleto a naganda: Gary W ken Judy A. Hakanson iti Utah. Sinuratak a dagus ida:
Judy and Gary, remember Sinamar and Lorenzo whom you gave your blue Mazda 83? It was March 1997. Lorenzo is writing his memoirs, or biographical novel. Upon looking his Journal, he encountered your names and remember everything including the problems Gary encountered upon giving us your car. We are still in West Valley. Lorenzo is serving as Sealer at the Jordan River Utah Temple. How are you guys?
Adu ti bannog daydi Gary maipanggep iti panangipadawatda iti daydi pag-ong a Mazda ’83. Impadawatda la ngaruden, isu pay ti nagbayad kadagidi buong a sarming ken pondido a silaw a masapul a masukatan. Ken ti pay panangsakami iti towing. Sumipnget idin yawidko ket nasarunonak ti istrikto a polis—awan paspasuksok ditoy. Pinaulod ti polis nga impan iti diak malagipen. Ni Gary ti rinengrengko a nangiruar. Kinuyognak pay a nagparehisto iti DMV ta masapul ti dokumento a nalipatanna nga intugot.
Iti panangsuratko kadakuada iti Facebook ken Messenger, kayatko la nga ipakaammo a dimi pay nalipatan ti bambannogda.
Dakkel ti naitulong daydi a pag-ong a kotse. Dakkel met ti naadalko iti panangtaripato, ta kunak no nayunnayonam latta ti lanana, ngem masapul gayam a sukatam nga intaramente.
DAGITOY TI NAGSASARUNO a nakastrekak a trabaho apaman a naestimarko daydi pag-ong a Mazda ’83.
Naawatak iti Teltrust Company a maysa kadagiti customer service nga agawat iti awag. Maysaak kadagidi agsungbat ti reklamo dagiti Filipino. Kaduak da Mercy ken Rosalie. Rabii ti batangmi. Isu a nagpakadaak iti DI.
Masansan nga agsusukot ti adda iti mugingko; gapu iti kasta, diak ammo no ania ti unaek. Nakaad-adu ti kayatko nga aramiden. Masapulko ti pagsurotan, synopsis koma no nobela. No dadduma, masingsingaak lattan a diak namanamaen.
Kas iti naminsan. Diak ninamnama nga adda Mike Jensen nga umawag kaniak. Inted kano ni Brother John Ball ti numerok.
Adda kano maysa a guardia iti Utah National Guard nga agsapsapul iti mang-tutor kenkuana iti Foreign Language. Inrekomendanak ni Brother Ball. Inikkannak iti manual nga usaren a mangisuro.
Tagalog ti kayat daydi Sgt. Tim Woodbrey nga adalen.
Naimbag ta adda idin daydi pag-ong a Mazda ’83. Ken saanak a narigatan a nangisuro iti daydi Sgt. Tim Woodbrey ta adda met padasko a nangisuro idiay Philippine Normal College, UP Diliman, ken Ateneo de Manila University, uray no apagbiit laeng. Ken ti pannakairuamko a nakipulpulapol iti nadumaduma a tattao kadagidi liderato a nagpasarak idiay Marikina ken Montalban.
Malabasak ti University of Utah a mapan iti Utah National Guard.
Ngem diak ammo no adda naadal daydi Sgt. Tim Woodbrey ta di pay nagudgudua ti lecture, agdungsa metten! Makapadungsaak a tutor!
Hanabale, no ti gapu ti panagpa-tutor-na makaala la iti promosion a gapu ti panagalada iti Foreign Language, daydi met la kuartana ti ginamgamko!
Diak malagipen no mano a bulan, a mamindua iti makalawas, a nagkitkitakami.
Tapno manayonan ti teggedko bayat ti panag-tutor-ko, nagaplayak pay idiay gasolinaan a Holiday Oil ken convenience store. Nainterbiuak, nasanayak, naikkanak iti uniporme a t-shirt a maris tsokolate. Sa nagtrabahuak. Richard Goodfellow daydi ubing pay a manager. Return Missionary (RM), diak malagipen no sadino ti nagmisionanna. Naanus a nangiwanwan kaniak. Insurona no kasano ti agawat ken agsupli iti kuarta babaen ti cash register. Impakitana pay ti adda kalubna nga abot iti basar a pagikkan iti mabilang a paglakuan; awan ti makaammo a kuarta ti nagyan dita ta kasla laeng outlet ti danum no agdaluska iti baldosa.
Ngem saanak a nagbayag. Ti gapuna? Napudnoak unay iti Simbaan ket no saanak la ketdi a masakit, diak kayat ti mangliwat. Mangtedak a regular iti apagkapullok. Tungpalek amin nga annuroten ti Simbaan, pannursuro a saan nga inkapilitan. Ngem nagkariak idi sakbay a mabautisarankami nga agassawa. Kunak idin: ti sao ken karik isu ti rupak. Nakurapayak la ngaruden, diak pay tungtungpalen ti karik, ania pay ti rupak nga isarangko, saan la nga iti tao, ngem kangrunaanna iti Dios?
Kinuna daydi Richard Goodfellow: “You need to work on Sunday...”
Saanak a nagpangngadua. Kinunak: “I’m sorry, but I can’t.”
Inlawlawagna a 24-7 a lukat ti convenience store.
Dinak nabior. Nagpakadaak ket saanakon a nagsubsubli. Diak metten insubli daydi t-shirt.
Napaneknekak pay naminsan, a ti tao, tao pay laeng. No panggepenna ti nasapa nga agbalin a santo, saan a mabalin nga agsardeng ti lubongna tunggal Domingo. Ngem diak pay nagtrabaho iti Domingo a nasuelduanak... sabali ti kasasaadko idi addaak idiay Dhahran.
Isu met nga inawagannak ni Jun Mabunga. Adda kano bakante para iti custodian iti Holiday P.M. Group idiayWinder Stake. As-asideg ngem iti imatonanna. Uppat a pasdek ti Simbaan ti sakupen ti Holiday P.M. Group iti Wasatch nga adda iti bakras ti bantay iti daya a sikigan ti Utah. Kunada a nabingay ti Utah iti daya ken iti laud. Babaknang ti adda iti bakras ti bantay, ordinario dagiti adda iti baba. Apay a kasdiay? Kanayon kadi a tangtangaden dagiti nasanikua?
Daydi John Johnson a lead custodian ti grupomi ti nakasao kaniak. Nasayaat a tao daydi Jack wenno John. Adu ti naitedna kaniak a babassit a banag. Pagimeng, ken dadduma pay. Kanayonkami nga agkuykuyog no umakarkami iti pasdek a dalusan. Adu ti istoriana. Impakitana pay ti ragsakna a nakaala iti pamaruen a Chevy Silverado. Nangina ngem naalana laeng iti $17,000. Saan nga aggigiddan dagiti simbaan a dalusanmi. Adda aldaw ti tunggal maysa, ken saan nga aggigiddan a dalusan ti intero a simbaan. Adda aldaw a panagdalus iti sarming, panag-vacuum iti alpombra ken panangpasileng iti basketball court. Wen, dadakkel dagiti simbaan a dinaldalusanmi ta adda pay entabladoda.
Nalaka a narigat ti agdalus. Ammoyo, nadaldalus dagiti simbaan no idilig kadagiti dadduma a pasdek.
Ti agdalus iti baptismal font ti maysa a karigatan. Masapul nga espesial ti pannakadalusna sakbay nga adda agbuniag. Masdaaw la ketdi dagiti saan a miembro no masaksianda ti panagbuniag kadagiti baro a miembro. Ta adda ababa a programa sakbay ken kalpasan ti pannakaipabatok ti baro a miembro iti danum ti baptismal font.
Ngem karigatan ti ag-spray ken agnasnas kadagiti sarming ti tawa ken ridaw. No dimo ammo ti kalkalabina, dimo maikkat ti milat nga imbati dagiti ima. Nasken nga ammom no kasano nga awan ti makita nga uray no bassit a milat dagiti sarming, nangruna iti ridaw.
Masao a nalaka ti agdalus. Ngem adda maysa a nagdaldalusanmi a nagbannoganmi unay. Ta kanayon nga adu ti wara! Pappapel, ken no ania la ditan.
Dagiti kakabsattayo a Portugiso; kasta ti awag kadagiti taga-Brazil.
Ngem nasasayaatda met a tattao.
Wen, adda bukodda a Ward. Idiay ti pagdudupudopanda amin a Braziliano. Saan a kas kadagiti Filipino a no ania a Simbaan ti asideg kadakuada, idiayda a makimisa. Uray dagidiay Mehikano. Ken Tongan. Dagidiay Samoan ti kasla adda met bukodda a Ward.
Adda diak malipatan a nakaduak a custodian. No dadduma idi, patudonennakami lattan daydi John Johnson iti maysa a Simbaan. Siak ti patudonenna a mangiwardas iti daydi kaduak, a diak malagipen ti naganna. Ngem pagattengngednak laeng. Ken ti ket laingnan a manarita. No lalausen ti manao, ad-adu ti saona ngem ti aramidna.
Return Missionary daydi. Insangpetna iti Utah ti asawa ken maysa a bassit pay nga anakda. Naggapuda idiay Minnesota. No dadduma, adu ti ipampambarna ket paitulod iti apartment-da no agawidkami. Masemsemak no kua ngem gapu ta nabiitda pay iti Utah, pinaspasensiaak.
Daytoy ti diak pakalipatan kenkuana.
Inaldaw nga agbalonak iti pangaldawko. Saan nga agbalbalon daydi John; agawid a mapan mangaldaw ta asideg la ti balayda. Ken adda luganna.
No kasdiayen nga isaganak ti pangaldawko a chicken noodles ken no ania ditan nga ipabalon ni kaingungot, mapanak iti maysa a kuarto ket sadiayak a mangaldaw. Madamdama, addan daydi taga-Minnesota a pambarna ti makisarsarita kaniak. Awan ti balonna! Madi ti riknak a mabuybuya a mangan. Idi damo, iparpartakko ti mangan.
Kadagidi dadduma nga aldaw, imbalonakon iti chicken noodles ket isun ti itedko a kanenna.
Idi nabiitak pay, pagpipinnugtuan dagidi Puraw a kakaduak no kaano nga agdisso ti umuna nga isno ti tawen. No dadduma, no panagmamais, agbalonda iti lingtaenda ket pagsasanguanmi amin.
Naragsakkami man ketdi. Uray no custodian-kami laeng, dimi babbabaen ti serbisiomi. Naamirisko, pagtitinnulonganmi a ‘dalusan’ ti ‘balay’ ti Apo, a pangtungpalan dagiti Annakna iti karida Kenkuana.
Idi kuan, nasao ni John nga adda Honda Accord a kotse ti anakna, a didan us-usaren. Ilaklakoda iti sangaribu a doliar. Adda idin bassit a kuartak, ngem kurang. Pinasublatannak daydi John iti innayonko.
Addan insukatko iti daydi Mazda ’83, a saanen nga agandar idi mabaybayag ta ‘tay kunakon, imbes a sukatak ti lanana, ninaynayonak agingga a nakarugrugiten.
IDI NAGSUKAT ti Bishopric ti West Valley 5th Ward, dandani met nagsukat amin dagiti Auxiliary Leaders. Saan a nakalisi ti High Priest Group Leaders.
Diak ninamnama, siak ti natudingan a 1st Councilor. Daydi Robert wenno Bob Johnson—sabali daydi lead custodian a John Johnson—ti naipatugaw a presidente. Daydi Brother Jerry Greenhagen ti 2nd Councilor. Naammuanda ngamin dagidi napalabas a nagtaktakemak idi tinudingandakami kada kaingungot a nangtend iti mensahe iti kongregasion. Siempre, nangtedak met idi iti bassit a backgrounder.
Bayat ti panagbaybayagmi idiay Harvey Street, immadu ti miembro a simminged kadakami. Adda dagidi priesthood holders a natudingan a Home Teachermi ken ni Jojo; ken kameng ti Relief Society a Visiting Teachers da Sinamar, Chichi, ken Mercy.
Saan met a nagbayag idin sakbay nga immay daydi tatang, ken ti pamiliana. Napanmi sinukon ken Samar ida idiay Mecca, namrayanmi nga impakita ni kaingungot iti daydi Anti Rosa. Madmadi ti rikna idi ni Marilou a mangpalubos kadakuada ngem dina ida naigawid.
Napekpekkami iti daydi apartment-mi idiay Harvey Street, ngem inanusanmi agingga a nagbakante ti 3717-A a kaarrubami met laeng. Immakarda a dagus.
No an-anagen, medio ‘aggunggunayen’ ti pilid ti gasatmi idi. Umuna, napanawanen daydi tatang ken ti pamiliana ti kuna ni Norma nga impierno iti biagna. Maikadua, agaassidegkamin, ken addan trabaho ni Mercy, sa idi makasimsimpada, naiserrekko met ni Muray idiay DI. Ken ni Mildred dita Granger High School—insanudda ti tawenna iti high school. Imbes a 3rd year koman, insublida iti 2nd year gapu ta kurang dagiti subject a naalana idiay Filipinas.
Maysa kadagiti nagaget a nangsarsarungkar kada Sinamar daydi Sister Little a nakadlaw iti kasasaad ti aglawlaw ti Harvey Street.
“This is a very dangerous place for you,” kinunana. “You need to look for a better place to live.”
Tinulongannakami a nagsapul iti mabalinmi nga akaran. Nairana idi nga adda balay iti sango ti balayda, a nagbakante. Inawisnakami a napan nangkita. $90,000 ti pangilaklakuanda; adda la bassit tarimaanen.
“That’s not a problem,” kinuna ni Sister Little. “We can help.” Kayatna a sawen, makatulong dagiti miembro a mangtarimaan, ket mabalin pay koma a libre ti bannogda.
Ngem saankami a naaprobaran a gumatang ta saan a maagpangan ti sueldomi, ken nabiitkami pay iti trabahomi, a mapagduaduaan no agpautkami.
Oktubre 26, 1997 idi linuktan dagidi Brother ken Sister Johnson nga ilako ti balayda idiay Yorkshire Road. Nabayag kanon a sugsugsogan ti anakda idiay Overton, Arizona nga umakarda sadiay tapno agaassidegda. Ken kumarkaro idin ti sakit ti tumeng daydi Brother Johnson ket marigatan kano nga umuli-umulog iti dua kadsaaran a balayda.
$115,000 ti pangilaklakuanda. Siaayatda a mangilako kadakami.
Ngem kasdi met laeng ti parikut.
Dinamag ti ahente no adda am-ammomi a makatulong kadakami; no adda kabagianmi a mabalinmi a kasugpon.
Daydi la tatang ti kabagianmi nga adda iti Utah. Awan ti trabahona. Ngem pensionado ti Second World War.
“Let’s try,” kinuna ti ahente. Intugotnakami iti opisinada idiay Cottonwood. Adu a pappapeles ti naisagana.
Saan idi nga immapay iti pannotko, ken saan a naag-agapad daydi ahente, ngem malagipko man ketdi ita. Saan ngata a nakatulong ti kinabeterano daydi tatang iti pannakaalami iti balay a tintinnaganmi?
Arinunos ti Nobiembre iti daydi a tawen idi limsotkami iti abut ti dagum a kunada. Wenno milagro. Wenno parabur ti Apo!
Addan balay a tintinnaganmi iti America! Addan balaymi!
(Maituloyto)
Napalabas a paset: 1 | 2 | 3 | 4 | 5 | 6 | 7 | 8 | 9 | 10 | 11 | 12 | 13 | 14 | 15 | 16 | 17 | 18 | 19 | 20 | 21 | 22 | 23 | 24 | 25 | 26 | 27 | 28 | 29 | 30 | 31 | 33 | 34 |
