(Tuloyna)
Peter La. Julian, 87, mannurat ti Bannawag, pimmusay
ITI NAMINSAN a panangpalpalabasko iti Facebook, adda nasalawko, a surat daydi Hernelio A. Baradi, wenno Erning, a kabsat ni Samar iti ina, a simmangpet iti balay daydi Mariano idiay Old Balara.
Awan dumana iti maysa a milagro ta naipagpagasat la unay kadagiti tawen nga ibasbaskagko ti pannakaukagko iti suratna.
Adda historia nga ipalagipna.
Ulitek man: daydi Erning ti kasla di idi mabambannog a tumultulong kadakami iti sadino man a balay nga immakaranmi, agingga a nagassawada ken ni Milagrina Sales a Norma ti naganna iti sirok ti latok, daydi inramanko ti padasna iti serye a "Kastoykami Ditoy Saudi."
Mannurat met daydi Erning, ken kaduami idi iti panagipatarus kadagiti pagbasaan ti Simbaan. Adtoy man ti suratna:
9/21/09, 3:42 am
Manong, ni Erning daytoy. Komustakayon? Sapay koma ta addakayo a kanayon iti saluad ti Dios. Ditoy, nasayaatkam’ laeng iti baet ti adu a pannubok ti biag. Agbasbasa da Bejo ken Lanie ita idiay UPLB. 4th year HS metten ni Maymay, ket Grade 3 metten ni Bin-i. Maika-2 a tawenko metten a mangisursuro sadiay Lagro High School. Permanenteak metten iti trabahok. Bassit laeng ti sueldo, di pay umanay no ar-arigen para iti kasapulan iti panagadal dagiti annakko. Agyamanak laengen ta iti tawenko, naawatak pay laeng iti DepEd a mangisuro. Ala, komustakayo amin dita, ni manang ken dagitay kaanakak dita. Ditoy, ni Dondon, dumakdakkel kano ti bukol iti tianna, dinan sa met kayat a paopera. Dios koma ti kanayon a mangsaluad kadakayo.
Daytoy ti sungbatko. a napetsaan iti Septiembre 27, 2009:
Nagsuratak idi ngem diak ammo no naawatmo; aglokoloko ngamin no dadduma ‘toy Facebook. Nasayaat unay nupay ti agpagadal ti karigatan a paset ti biag; ngem addanto met supapakna no makalpasda. Adu met ti rigatmi idi... Bareng no makaumayto met laengen da Dondon ken Mimi ditoy early next year... Adda nakitami a surat para kenka a naggapu idiay translation department. Siguro [adda] panggep ti CES [nga ibaga kenka], ta kuna ni Grace a dakayon sa ti mangiggem iti translation-da. Wen gayam, ni manangmo, napilitan a nagretiro a nasapa ta inikkatda idiay trabahona, ta apektadoda iti recession; sangsangkabassit ti pensionna iti SS ngem naimbag laengen, a. Inton next year met nga agretiroak; nabannogakon. Ala, komustakayo laengen... Wen gayam, madaman sa ti bagyo dita; sapay koma ta awan ti adu a namsaakanna dita Montalban; dikami pay makaawag kada Mimi gapu iti bagyo. Ala ngarud... wen gayam, ni Remi [Mataoa], awanen iti interpretation, translation laengen...
Naputed ti suratko ta simrek ni Efren Duaño Baconawa [sigud a kaduami idiay Quezon City 1st Ward nga immuna a wardmi]... ala ngaruden, agan-annadkayo..
Daytoy ti sungbat daydi Erning:
10/2/09, 11:24 PM
Nakaro ti didigra nga immapay nangnangruna iti probinsia ti Rizal. Ditoy Montalban, adu a subdibision ti linemmes ti naglaok a danum ken pitak, agraman ditoy Montaña. Manipud iti bantay, bimmaba ti danum a nangparnuay iti naapres a karayan iti Montaña. Sangadangan pay sumrek koman ti danum iti balaymi. Napanak iti atep ti balaymi a kasasaaok ti Dios, nga isardengna koman ti napigsa a tudo. Pagalluppo ti danum iti Pinatubo St., pagasellang iti Arayat, iti agturong iti hayway, pagassiket. Iti ballasiw ti hayway, awanen ti makita a balay. Adda dua wenno tallo ti kadsaaaranna a balay iti dua a subdibision iti baba a nagkamangan dagiti agpupukkaw a biktima. Iti igid ti hayway, kasla piesta ti kaadu ti tao nga agpigpigerger iti lammin. Awan ti nasalbada a banag: taraon, aruaten, uray ania a sanikua. Naawan ti koriente, danum, telepono, signal ti selpon. Kasla panangukom ni Apo Dios no ar-arigen. Napakaruan ti Cainta, Marikina, kasla China Sea dagitoy a lugar nga agingga ita di pay nakabangon. Adu a bulan ti palabsen sakbay a makabangon ti probinsia ti Rizal. Naanod dagiti balbalay kadagiti igid ti karayan, agraman dagiti kotse, ayup a kas kadagiti nuang. Ita, kasla bantay dagiti naidaknir a basura kadagiti igid ti kalsada. Malagipko maysa nga aldaw sakbay ti layus, nagbartek ti kayongko a ni Wilson. Simmangpet iti balayda. Kinabkabilna dagiti annakna. Awan ti mabalin nga aganawa ta masakit ti asawana ken ti katuganganna. Naawagan iti selpon ti asawak a napan naganawa. Karabianna, kunak no awanen ti parikut, immawag manen dagiti annak ni Wilson. Matay kanon iti sakit ti tian ti amada ket nasken a maitaray iti ospital. Saan a napan ti asawak agingga a naglawag. Nagtudo iti napigsa. Alisto a ngimmato ti danum. Ti pamilia ni Wilson nga adda iti subdibision iti ballasiw ti kalsada, dumanida nalmes no awan ti immarayat kadakuada. Nagkamangda iti maikadua a kadsaaran ti balayda ngem natinep ti balay agingga nga awanen ti makita. Ita makalawasen nga addada ditoy balay. Kunak man, senial wenno palagip laeng ti Dios ti didigra nga immapay kadagiti kas iti kayongko a nakalipaten iti Dios. Adu ti kasta a tao, a malagipda laeng ti Dios iti kangitingitan ti didigra. Agyamank iti Dios ta dinakami binaybay-an iti dayta nga aldaw ti pannubok. Iti unos ti panagbiagko, idi la a nakaimatangak iti kasdiay a pannubok ti Dios iti tao.
Daytoy met ti sungbatko:
10/4/09, 10:24 AM
Makipagriknakami... ken kanayon nga isursuratmi ti naganyo amin iti prayer roll idiay Jordan River Temple a pagpapaayak a Sealer; ken ni manangmo met iti sealing office. Manen, makipagriknakami, ket naimbag laengen ta dikay nairaman a napakaruan.
Kinuna daydi Erning:
10/10/09, 5:37 AM
Naimbag a rabiiyo dita, Apo. Manguk-ukom sa ketdin ti Apo ditoy Pinas. Dimteng ti super typhoon a ni Pepeng ket binayona iti 3 nga aldaw ti Ilokos manipud iti Cagayan sa nagsubli ket linemmesna ti Central Luzon. Iti agdama no makitayo iti Internet, kakaasi ti nagadu a tao sadiay. Naperdi dagiti dike a nagayusan ti danum manipud kadagiti dadakkel a dam. Ti poseble nga ibunga ti didigra, dakkel a panagbisin ta dinadael ti layus ti naglawa a kapagayan a dumanin maani. Ditoy Rizal, adu pay la a tattao ti agbibiag babaen kadagiti rasion. Ti simbaan ditoy Montaña, di pay pimmanaw ti adu a kimmamang ta napno iti pitak dagiti pagtaenganda idi dimteng ti bagyo a ni Ondoy. Baka inton bigat awan pay ti Sunday School-mi ta napno dagiti kuarto iti tattao. Narigat a biag ti impagteng dagiti didigra, mariknam a talaga. Agyamankami iti panangiragpinyo kadakami kadagiti kararagyo dita.
Insungbatko:
10/10/09, 6:18 AM
Wen, nakitami amin ta adda TFC ditoy balay, estasion a Filipino iti TV. Dandani agmalmalem ni manangmo a mangbuybuya, ket sangpetak pay la iti rabii no kua. Wen, uray dagiti Puraw a makaam-ammo a Filipinoak, idiay trabaho ti kayatko a sawen, damdamagenda no adda kabagiak a nairaman iti didigra. Nagasattayo pay laeng ta uray kaskasano ket diyo dita saparen ti sapsaparen dagiti dadduma; ngem kakaasi a talaga dagiti tao. Nakitami met ken ni manangyo dayta kunam, ta dandani koman panagaani. Ngem ania pay ti anienda... piman... malagipmo da Elder Stokes? [dua a couple missionaries a kaduami idi iti translation] Natayen ni Sister Stokes itay last year, itay la nabiit a nadamagko... adda kadi maitudo nga agsungbat iti didigra? Gobierno? Wenno asino? Wenno palagip ti Apo... No maminsan, narigat nga awaten, ngem paset dayta dagiti adu a naipadto a sagabaen ti tao. Mapaspasamaken ti adu a didigra iti entero a lubong. Kastoy met ti ibagbagak ken ni manangyo no kua. Maalay-ayan bassit ti rikna no maamiristayo a paset dagitoy ti kaaddatayo ditoy a biag. Awan maaramidantayo no di awaten ti ited (no isu ti mangmangted) ti Apo a palagipna kadagiti annakna. Iti adun a parikut a naglaslasatan, naawatkon ket nalaglag-an ti riknak no kua, ta di metten maisubli ti napalabas/napasamak. Mapagteng amin dagiti banag uray di namnamaen ket ania pay koma no di awaten. Dagiti nadangran unay, mangrugida manen, a, ania ngarud.
Maikawaak ken masayanganak iti nasapa nga ipupusay daydi Erning. Singkuenta otsona la idi. Adu koma pay ti nasayaat a naaramidna.
ADDA DAGIDI PANAWEN a mapankami mangal-ala iti abasto idiay food bank. Ni Samar ti kalipikado a maibatay iti matgedan ti tao. No dadduma, agur-urayak iti ruar ta isu la ti makastrek iti pagurayan. Pila no kua ti tao. Napipia la a maksay iti gatangenmi ti it-itedda no kua. Maminduan sa iti makabulan idi a mabalin ti mapan dumawat.
Iti naminsan, sibsibet ti isno idi napankami. Naikaglis ni Samar ket nablesan ti gurongna.
Sa nadagnayan idi makapayat iti naregreg a nagango a bunga ti fire tree iti sango ti balay.
Daydin ti nangrugian ti kanayon a panagsaksakitna, ket masansan metten a mangliwliwat iti trabahona, agingga a nasapa a pinagretiroda idiay Parker Hannifin. Penpensionanda iti sangsangkautting, a nayon ti pensionna iti SS. Kunkunak laengen, a, a napipia la nga igatangna iti pagingatna!
Saan metten a nagbayag sa nagretiroak idiay Mail Operations ti Church Office Building (COB). Intultuloyko ti nagtrabaho idiay Deseret Bookstore.
Nairanrana unay iti pannakaaprobar ti yaay da Dondon ken da Mimi ken ni LA. Nangalaak iti bakasionko idiay DB ket napanmi ida innala.
Sakbay a nagsublikami idiay Yorkshire, inkeddengko pay a sarungkaran ti Gisit-a-bassit nga immuna a nakakitaak iti lawag—naagapadko daytoyen...
Simmangpetda idiay Yorkshire sakbay ti kasangay ni Dondon idi Hunio 15, 2010. Gapu iti daydi a pasamak, maymaysan ni Lingling a nabati idiay Filipinas, a kaduana daydi Glen ken ti dua nga annakda a da Brigham ken Briget.
Isingitko man ditoy, a namin-anon a naagapad ni Dondon a naibaga kano kenkuana nga isu koman ti sumaruno a maikkan iti Teñor wenno mapermanente a mangisuro idiay UP Manila no saan nga immay ditoy Utah. Dina koma kano kayat ti umay no di imbaga ni Samar a saan a mabalin ta agungetak kano. Malaglagipko ita a siak ti gapu ti nakadadaelan ti arapaapna, nga ita, marigatan a mangala iti trabahona ta agpili metten manipud idi inikkatda idiay Moog a trabahona. Kayatna, sumrek iti prestihioso a trabaho. Malagipko met nga uray siak ket diak met mausar ditoy ti tinurposko a master...
Ngem agsublita iti pangtedko.
Awan nangipagpagarup nga iti Disiembre 20 iti daydi a tawen, impasngay ni antim a Mimi ni Lindsay a kasinsinmo...
Siak ti nangay-aywan bayat ti panagtrabaho ni Mimi.
Malaksid iti masansanen a pannakayos-ospital ni Samar, dua a nagsaruno a tawen pay a bimtak ti tubo iti sango ti balay ket nalayus ti basement. Adu nga alikamenmi ti nadadael, uray pay dagiti urnongko a libro ken manuskrito. Uray ti washing machine ken dryer.
Kunkunak idi, addan sa ketdi simmangpet a malas! Ta malaksid iti layus, saanen nga umanay ti sueldo ken pensionko a pagbayadmi iti binulan nga itintinnagmi iti balay.
Isu nga uray no nasakit koma ti nakemko a mangilako iti immuna a balay a nagatangko iti America, awan ti pagpilianmi.
(Maituloyto)
Napalabas a paset: 1 | 2 | 3 | 4 | 5 | 6 | 7 | 8 | 9 | 10 | 11 | 12 | 13 | 14 | 15 | 16 | 17 | 18 | 19 | 20 | 21 | 22 | 23 | 24 | 25 | 26 | 27 | 28 | 29 | 30 | 31 | 33 | 34 |
