(Tuloyna)
Agingga a nagpadespensar ti doktora, ket dinamagna no kayatmi ti sumrek iti yan ni kaingungot, a mangkita iti ar-aramidenda.
Peter La. Julian, 87, mannurat ti Bannawag, pimmusay
Adu ti naikapet a tubo iti agong ken ngiwatna; nakataltalnan. Naibaga kadakami a ngumato-bumaba ti presion ti darana, a kumapkapsut ti pulsona.
Dinamag ti doktor no ania ti kayatmi nga aramiden.
Ammok nga awanen ti maaramidan dagiti mangas-asistir kenkuana. Imbagak laengen nga aramidenda ti kasayaatan a maaramid.
Idi kuan, nagpadespensaren ti doktora. Simmangpet payen ti tao a mangasikaso kadagiti sumaruno a mapasamak, kas iti autopsy.
6:15 ti agsapa, Abril 24, 2013, idi maiproklamar a napanen ni kaingungot.
Naginnarakupkami ken ni Dondon ket impeksami ti leddaangmi. Uray da Mimi, ken Chichi a simmangpet ti sangabukel a pamiliana manipud idiay Orem, didan natengngel ti riknada. Uray ni Lindsay, idi la a nakitak a nagsangit. Ni Jojo, a di basta aglua, nasiputak met ti panagluana.
Immay nagtakder iti likudak, a mangsangsango ken ni kaingungot.
Dakami amin, nariknami ti saem ti ipupusay ti ipatpategmi.
Padpadasek nga andingayen ti riknak, iti pananglagipko, a napagserbiak iti amin a kabaelak, a siak ti nakangngeg iti naudi a balikasna, “Ang sakit!”
Wen, nakasaksakit. Awanen, ngem agtalinaedto iti lagipko.
Adtoy ti patarus ti Ingles nga elehiak iti naaramid a serbisio ti ipapanawna:
Saan nga umdas ti elehia wenno un-unnoyko, Ma, a mangpalag-an iti barukongko iti pannakapukawko kenka. Ngem aramidek latta a pangipeksak iti umukuok a liday a kas man mangpirpirsay iti aminko. Nadanonen ti pagtungedan ti panagdaliasatmo ditoy a lubong, ket rugiamon a taluntonen ti dana nga agturong iti Pagarian ti Nailangitan nga Ama. Naaramidmon ti naindaklan a pagrebbengam. Umuna, sakbay nga inawatta ti ebanghelio nga inyam-ammo ni Bart Wiscombe a misionario idi, dinamagko kenka, ania, kayatmo? Insungbatmo a di nagpangadua: wen, a. Awan ti makapagsina kadata a kas man la siping a saba uray iti panangtungpalta iti pagrebbenganta, siak idi kas Stake President, ken sika, kas 1st Councilor ti Stake Relief Society Presidency. Uray idi ipatpatarusko ti Tripple Combination kaduadaka dagidi nangbasa ken nangkita kadagiti mabalin a sukatan wenno korihiren, kasta met a kaduaka kadagiti interprete dagiti dadaulo a nagited iti mensahe bayat ti mamindua iti makatawen a sapasap a komperensia ti Simbaan. Uray idi insaganata ti pannakailibro ti nakatipunan ti sursuratta a ‘Naabel a Linabag ti Rosas’ ken ti ‘Ubbog ti Sirmata’ a nakatiponan dagiti 32 a saritata. Wen, Ma, uray pay ti awan umasping a panangipategmo kadagiti annakta a da Lingling, Dondon, Mimi, Chichi ken ni Jojo—isuda amin nagserbida iti mision. Sika ti ina ken amada bayat ti pannakaipusingko kadakayo iti lasag ngem saan iti panunot ken rikna. Wen, nakaladladingit, Ma, idi agaaddayotayo, ngem pinagtalinaedta ti karinkarita a natibker babaen ti suransurat. Ngem itoy a gundaway, ay, anian. Adu kadagiti kakabagian ken gagayyemta ditoy ken iti sadino man; dagiti kamaestraam iti 21 a tawen idiay Filipinas, ken kadagiti mannurat ken kameng ti GUMIL… impariknada ti panagraem ken pannakipagriknada iti ipupusaymo. Uray dagiti kakaduak a Sealer, kanayondaka idi a damdamagen. Sika ti bituen a bagnos ti amin a tao iti aglawlawmo.
Ni Grace, nangipatulod met iti lumansad a leddaangna iti pannakapukawna iti inauna a kabsatda gapu iti di magatadan a panangtartarabayta kadakuada idi agkasapulanda, agingga nga inyam-ammota ti ebanghelio a nangted kadakuada iti silaw a nagsadaganda a nakadanon iti agdama a yanda.
Uray ni Jose a buridekmi, Ma, a bishop itan, nangipatulod met iti mensahe ti panagdayaw. Kinunana: Manang Samar, naaramidmon dagiti pagrebbengan nga impakumit kenka ti Nailangitan nga Ama ket nakasaganakan nga agsubli iti Pagarianna. Patpatgennaka unay ti pamiliak. Dimi masubsubadan ti kinaimbagmo kadakami idi agkasapulankami.
Bay-annak, Ma, a mangtaliaw—uray no ulit-ulitek—ti di mapekka a pinnategta, a nangrugi iti ‘Naabel a Linabag ti Rosas.’
Idi rimmuar ti umuna a daniwko nga ‘Allon ti Biag’ iti bilang ti Bannawag a Disiembre 10, 1962, pinatulodannak iti surat a panagdayaw. Ngem diak naawat ket napagbiddutannak a napannakkel ken di mangipirpirit idi dika sinubalitan. Makitakto la dayta a Lorenzo, a! Kinunam. Ngem nasebseban ti guram idi makitanak ta kaslaak met nagkeppet a bulong ti baimbain, a kunam a nagkunaan daydi Frank Quitasol nga immas-asibay met kenka: “Daydiay memmem ti pagpampannakkelmo?”
Ulitek, Ma, ti maudi a binatog ti daniw:
Dagitoy ti allon ti biag:/ No dakes ti liklikam, surotem ti naimbag;/ Adaywam ni sulit tapno masurotmo ni linak/ Tapno maililikanto iti ragsak,/ Dinto agati, dinto maumag ti inka maragpat!
Ngem daytoy suratmo iti editor, Ma, maipanggep iti immuna a nobelak ti nanglukat iti atiddog ken agsikkosikko a dana ti panagdaliasatta. Kastoy man:
Apo Editor, babaen daytoy a benneg, kayatko nga idanon ti naimpusuan a kablaawko ken ni maipagtangsit ti Kailokuan a mannuratna, ni Apo Lorenzo G. Tabin, gapu iti makaay-ayo ken dinto maumag a sinuratna, ‘Ti Imetda nga Impierno.’ Sapay koma ta agnanayon a tarabayen dagiti nasidap a sirsirmata tapno iti kasta napimpintasto manen dagiti sumaruno nga isagutna kadatayo amin. —SINAMAR A. ROBIANES.
Nabayag nga inar-arapaapko a makita ti agtagikua iti kapintasan a nagan kadagiti amin a babbai a mannurat nga Ilokana. Sinamar, raya ti init a sumingsingising iti daya!
Dayta ti nanglukat iti pakasaritaanta ken narikpan iti namitlo a kallaysa. Umuna, idi kinasarnata daydi Mayor Arturo M. Padua idiay Sison, Pangasinan, idi Agosto 1968. Maikadua daydi kasarta iti Aglipayano a simbaan idiay Cabugao, idi Disiembre 22, 1968. Sa ti maikatlo, ken kapatgan, daydi pannakaseliota idi Abril 17, 1985 idiay Manila Philippines Temple, a kaduata dagiti pito nga annakta, a nakairamanan dagidi Lorimar ken Arvin Salaknib a nasapa a pimmusay. Ay, Ma, aya, naturposta ti lima a dekada ken uppat a tawen ken uppat a bulan a panagtinnakunaynayta iti laksid ti adu a pannubok a nagpasaranta, ket pangpanggepenta a kun-osen ti limapulo-ket-lima a tawen.... ngem itan, ay!
Pinanawannak nga agmaymaysa, Ma, nupay adda dagiti annak ken appokota a mangan-andingay iti pannakaipusingmo kaniak. Marikriknak latta ti kaaddam, makitkitaka iti sibayko, mangmangngegko ti timekmo, a mangipalpalagip nga orasen ti panagtudokko iti insulin, a mangdawdawat iti panangpapagnak kenka iti sango ti computer a pangsidawsidawak iti biograpia nga isursuratko. Adu a rabii a no madlawmo a maymaysa ti nakasindi a silaw iti masansan nga isasarungkarmo iti pagpaknian, ibagam a sindiak ti karangrangan ta dimo makita ti pagnaam. Ibagbagam a lukatak ti paboritom a programa iti YouTube wenno iti damdamag iti TV, wenno kunam, ‘agkantaka man, da’ a kayatmo a sawen yakarko kadagiti kankanta nga Ilokano,’ a no dadduma dagdagusek met a kantaen ti mangsursurdo a potarko a ‘ti ayat ti maysa a baket,’ a dagus a pasardengennak a makasursuron. Ket yad-addaka met a surduen, agingga a kunak, agingga ita kalpasan ti agarup di mabilangen a tawen a panagkibkibinta a nangtalunton iti agiwet-iwet a kalsada a napno iti pannubok, dinak pay am-ammo? Wen, Ma, inar-aramidko ti kasdi kayatko la a palag-anen ti im-imetenta. Kanayon nga ipalpalagipko ti panagannadmo no kasdiay nga agdungsaka iti sango ti puzzle-mo ket kurang la a maidungpar ti rupam iti paradipad ti kama. Ket manen, ken manen, sublianta a katikaten ti adu a laglagip iti panagkibinta a nangdaliasat iti adu a pannubok. Salsaludsodek no dadduma: nakaaramidta kadi met laeng iti naimbag? Nakaan-anuska, ken pulos a dika nangngegan a nagreklamo wenno nangunget kadagiti agsumbangir a kakabsatta, a data a dua ti inaunaan iti agsumbangir, bayat ti panangrugida a mangtunton iti kaipasanganda itoy a biag. Agingga a nasaksianta ti pannakagun-odda ti nasimpa a pagtakderanda, ket kunkunata no kua, kitaem man ida... ket wen, a. Ket agrimrimat dagiti matam, Ma, a tumangad. Umangesta iti nauneg.
Nakaragragsakka a nangbuybuya iti panangkanta da Gabriel ken Serena iti "Happy Birthday, Gramma1" iti video nga impatulod ni Chichi, para iti kasangaymo, a diak ninamnama a maudin!
Wen, Ma, kanayon nga ipalpalagipmo kaniak a kitaek no napanen naturog ni Lindsay; no simmangpeten ni Dondon iti naladawen a rabii; nga awagak ni Lingling idiay Filipinas—nakunam itay nabiit, diak sa metten ida mauray...
Bayat ti papanko panangpaburek iti saggaysata nga itlog, isimsimpam met dagiti masapsapulta a mamigat iti kuartota ta kaykayatta a ditoy ti pamigatanta kalpasan ti panangalata iti rukod ti dara ken ti asukarta...
Ipalpalagipmo ti diak panagbaybayag no rummuarak a mapan mangala iti agpaay kadata, ta kunam nga awan ti kaduam...
Agsublisublida a mangduddudog iti kaunggak, Ma!
Ammok a temporario daytoy a leddaang; dumtengto ti panawen nga aglukat ti langit... Bayat ti panangur-urayko iti naituding a panawen a panagdennatanto manen, masapul a tumangadak ket idawatko ti naan-anay a pannarabay ti Apo. Tulongannak koma, Ma, a kumamang iti Ama a Nailangitan babaen ti Anakna a ni Jesucristo. Maikawaaak unay iti kaawanmo, Ma, ngem urayennak iti bangir ti belo ket agdanggaytanto manen gapu ta agnanayon ti pamilia. Patpatgenka unay-unay. Dios ti kumuyog, Ma…
NALPASEN. RIKPAK, babaen daytoy bendision nga impaayko iti tanem a paginanaan ti bagi ti ipatpategko unay, ken pakaitanemakto met, kas ipasimudaag dagitoy a numero: 3.54.4.1. (3 a kallaysa agraman ti temple sealing, 54 a tawen ken 4 a bulan a panagtinnakunaynay, ken 1 a paginanaan ti dua). Adtoy:
Amami a Nailangitan, babaen ti bileg ti Melchizedek Priesthood a naiparabur kaniak, idaton ken konsegrarak daytoy a tanem a lugar a paginanaan ti bagi ni Sinamar Robianes Tabin.
Ikararagko a maikkan-pateg ken masaluadan daytoy a lugar agingga a makasaklang ni Sinamar.
Ikararagko a nakasagana koma ti Imayo a mangkibin kenkuana nga agturong iti Pagarianyo, a dagiti anghel agdadanggayda nga agkakanta; kasta met a dagiti dadakkelna a Rafael Robianes ken Elena Alos Baradi, ken dagiti annakmi a Lorimar ken Arvin Salacnib, kasta met dagiti dadakkelko a Clemente ken Crispina, ken amin a miembro ti pamiliami nga addan dita, aglaplapusananda koma iti ragsak a mangabrasa kenkuana.
Apo, liwliwaenyo koma daytoy a pamilia, isuronakami a manglagip a ti ipupusayna ditoy daga, temprorario laeng ta addanto panawen nga agtitiponkaminto manen a sangapamilia. Ikkandakami iti naan-anay a kired a mangyabaga kadagiti pagrebbenganmi ken mangtungpal kadagiti karimi kadakayo ket maikarikaminto met koma a sumaklang dita pagarianyo, a kadennaminton ni Sinamar ingga’t inggana; ta mamatikami iti kinaagnanayon ti pamilia. Ikararagko nga iwanwan ken tarabayendakami koma. Iti nagan ni Jesucristo nga Anakyo. Amen.
Kalpasan ti sumagmamano nga aldaw, idi nadanon ti Aldaw dagiti Inna, idi naggapukamin a nangsarungkar iti tanem daydi ipatpategmi sakbay a sinangomi ti naisagana a taraon, idi dandanikamin agpipinnakada, adda impudno ni Jojo a nangsagid iti luluaan ti tunggal maysa kadatayo. Kinunana:
“Natungday ti tagtagainepko, no makuna a tagtagainep daydi, iti awag ni Manang Mimi. Iti tagtagainepko, adda kano da Papa ken ni Mama iti igid ti baybay; kaduada kampay idi dagidi Manong Lorimar ken Arvin Salaknib. Nagbadoda iti puraw. Idi kuan, manipud iti taaw, adda simmungad a puraw a paraw wenno bangka.
‘Ne, umunaakon, a?’ kinuna kano daydi Mama. Nakaal-alisto kano a napan naglugan iti paraw, a kasla awan ti an-anayenna. Idi kuan, in-inut a nabalkot iti puraw ti taaw ket nagpukawen daydi ipatpategmi ken daydi paraw. Napasardeng ni Jojo a nagistoria, ta agbaningroten, a nakaisursurotanmi amin. Idi la a nakitak a nagsangit ni Jojo.
Iti daydi nga istoriana naipalagip kaniak, ket inistoriak... manen, kadakuada, ti napasamak kadakami iti daydi kaingungot idi inatibayko nga inturong iti pagpaknian. Mangmangngegko pay laeng ti naudi a balikasna
“ANG SAKIT!”
Kunami iti daydi a panangistoria ni Jojo iti tagtagainepna, a dagidi dua a naudi a balikas daydi ipatpategmi, nalabit a ti kayatna a sawen ket ti kinasaem ti ipapanawna...
Awanen daydi, ngem mabatiak a mangnamnama, nga uray no kasano ti saem ti ipapanawna, addanto koma nalawag a pagbanaganna. Aginanan iti adu a sakit a sinagsagabana. Andingayennak koma ti Apo a Mannakabalin ta uray no ammok nga addan ni kaingungot iti naasi nga Imana, nasaem latta ti mapanawan; mabayagto sakbay nga aglunit ti sugat.
NAWATIWAT TI INUNORKO a dana iti walo a dekada a panagdaliasatko. Kayariganna ti sumalog-sumang-at a bakras ti naursa ken kasabawilan a Bantay Baybayabas; ti naapres ken kakandarumaan a Karayan Parsua; ti kabaggiingan a pantar ti kadilian ti Labut; uray pay dagiti marmarasiksik nga allon iti bibig ti tangrib ti Timmippang; sa iti siudad a pagkukuyamkuyaman ti agduduma nga igges ti panawen. Namurumoran ti langit iti bitbituen, kasta met dagiti siudad... yan ti bituenko?
Adda impaspasakbay daydi daniwko nga "Allon ti Biag": ditoy kadin nga aggibus ti walo a dekada a panagdaliasat? Kalpasan ti sumurok-kumurang tallopulo a panagakar-akar, daytoy kadin ti maudi, ditoy kaarruba ti Magna a ti bantayna ti pagtabonan ti init?
Liwliwaek ti bagik iti pananglagipko kadagiti adu a tattao a nangtartarabay kadakami ken ni kaingungot. No mabasada ti panunotko, ammoda a maysada kadakuada. Aduda... aduda! Diakto malipatan dagiti balitok a puspusoda.
Nagballigak kadi a nangtunton iti kaimudingak?
Saan a natungpal ti naudi a tarigagay daydi ingungotek, nga agsubli iti daga a nakayanakanna, ta naitanem iti ganggannaet a daga.
Kastaakto met, ta agur-uray ti maymaysa a tanem nga agpaay iti dua. Nagtugmok ti dalanmi manipud idi punganay ket aggibusto iti tanem, kas ipalnaad ti ababa a nobelana a “Tungpal Tanem.”T allo a kallaysa, limapulo ket uppat a tawen ken uppat a bulan a panagtinnakunaynay, ken maymaysa a paginanaan ti dua! (3.54.4.1) Mangnamnamaak nga agkitakaminto manen ket ituloyminto sadiay ti naputed a pinnategmi; sapay koma...
Iti panaggibus ti maysa a napalabas, agbukar koma ti baro nga agsapa kadagiti mapanawan ket masursuroda nga ipateg dagiti rissing ti namnama a naibudi iti tunggal linabag. Sakbay nga agkidem ti maudi a sardam, ibatik ti maysa a binatog: pasetnakami ti napalabas idinto a pasetnakayo ti agdama, nga agbalinto met a napalabas, nga ipus ti masakbayan.
Kabayatanna, matdaak a sumangsango iti laud, iti daydiay bantay iti likud ti Magna. Ur-urayek daydiay nalabaga nga init nga agpasaklot iti nalitem a lelennekan.
Iti likud ti lelennekan, a panungpalan ti walo a dekada a panagdaliasat a kabulig ti allon ti biag, addanto koma agur-uray a sinamar. Sapay koma!
(GIBUSNA)
Napalabas a paspaset: 1 | 2 | 3 | 4 | 5 | 6 | 7 | 8 | 9 | 10 | 11 | 12 | 13 | 14 | 15 | 16 | 17 | 18 | 19 | 20 | 21 | 22 | 23 | 24 | 25 | 26 | 27 | 28 | 29 | 30 | 31 | 33 | 34 |
